സൗജന്യ 4ജി ഇന്റർനെറ്റ് പാക്കുമായി എയർടെൽ: ജിയോ ഓഫറുകൾക്ക് വൻ വെല്ലുവിളി

എയർടെല്ലിൽ നിന്നു വമ്പൻ ഓഫർ. ജിയോ നൽകുന്ന സൗജന്യ ഇന്റർനെറ്റ് ഓഫറിനു വൻ വെല്ലുവിളിയായി ഒരു വർഷം സൗജന്യ 4ജി ഇന്റർനെറ്റ് നൽകുന്ന പദ്ധതി എയർടെൽ പ്രഖ്യാപിച്ചു. ഓരോ മാസവും 3ജിബി 4ജി ഡാറ്റയാകും വരുന്ന 12 മാസത്തേക്ക് ഈ ഓഫറിൽ ലഭിക്കുക.

പുതുതായി എയർടെൽ 4ജി കണക്ഷൻ എടുക്കുന്നവർക്കാണ് സൗജന്യ ഇന്റർനെറ്റ് ലഭിക്കുക. ഇന്നു മുതൽ ഫെബ്രുവരി 28 വരെയുള്ള സമയത്തിനുള്ളിൽ എയർടെല്ലിലേക്കു മാറണം. നിലവിലുള്ള എയർടെൽ വരിക്കാർ 4ജിയിലേക്ക് അപ്ഗ്രേഡ് ചെയ്താലും ഈ ഓഫർ കിട്ടും.

ഓരോ 345 രൂപയുടെ റീചാർജ് ചെയ്യുമ്പോളും 3ജിബി ഡാറ്റ സൗജന്യമായി നൽകുന്ന മറ്റൊരു പ്ലാനും എയർടെൽ പ്രഖ്യാപിച്ചു. 345 രൂപയ്ക്കു റീചാർജ് ചെയ്താൽ ഇന്ത്യയിലെവിടെയും ഒരു മാസത്തേക്കു സൗജന്യ കോളുകളും 1 ജിബി + 3ജിബി ഫ്രീ ഇന്റർനെറ്റ് എന്നിവയടക്കം 4ജിബി ഡാറ്റയും കിട്ടും.