ഭൈരവയുടെ ചങ്ങാതിയായ ബുജ്ജി ആരാണ്?ച 'കൽക്കി 2898 എഡി'യിലെ പുതിയ കഥാപാത്രം

പ്രേക്ഷകർ ഏറെ കൗതുകത്തോടെ കാത്തിരിക്കുന്ന ചിത്രമാണ് പ്രഭാസ്, കമലഹാസൻ, അമിതാഭ് ബച്ചൻ, ദീപിക പദുക്കോൺ തുടങ്ങിയവർ ഒന്നിക്കുന്ന  'കൽക്കി 2898 എ ഡി'. ഇന്ത്യൻ ഇതിഹാസങ്ങളിലും പുരാണങ്ങളിലും ഊന്നിക്കൊണ്ട് ഭാവിയിൽ നടക്കുന്ന സയൻസ് ഫിക്ഷൻ കഥയായതിനാലും, ചിത്രത്തിലുള്ള പ്രതീക്ഷകൾ ഏറെയാണ്. ഇപ്പോഴിതാ ചിത്രത്തിൽ പ്രഭാസ് അവതരിപ്പിക്കുന്ന ഭൈരവ എന്ന കഥാപാത്രത്തിന്റെ ഉറ്റ ചങ്ങാതിയായ ബുജ്ജിയുടെ രൂപം പ്രേക്ഷകർക്കു മുന്നിൽ മേയ് 22-ന് വെളിപ്പെടുത്താൻ പോവുകയാണ്.

'ബിൽഡിങ് എ സൂപ്പർസ്റ്റാർ ബുജ്ജി' എന്ന വീഡിയോയിൽ ഒരു കൊച്ചു റോബോട്ട് ആയ ബുജ്ജിയ്ക്ക് മറ്റൊരു രൂപം നൽകാൻ ചിത്രത്തിന്റെ അണിയറപ്രവർത്തകർ ശ്രമിക്കുകയായിരുന്നു. എന്നാൽ അവരുടെ ശ്രമങ്ങളെല്ലാം ഫലിക്കാതെ വരുന്ന വേളയിൽ നിരാശനായി ബുജ്ജി നിൽക്കുമ്പോൾ പ്രഭാസിന്റെ കഥാപാത്രമായ ഭൈരവ തന്നെ ബുജ്ജിയെ സഹായിക്കാൻ രംഗത്തെത്തുകയാണ്.

ബുജ്ജിയ്ക്കായി പുതിയൊരു ഉടലും വാഹനവും ഭൈരവ ഒരുത്തുന്നുണ്ട്. അത് മേയ് 22-ന് വെളിപ്പെടുന്നതിലൂടെ ബുജ്ജിയുടെ പുതിയ രൂപവും ആരാണ് ബുജ്ജിയുടെ വേഷമിടുക എന്നു വെളിവാകും. മുൻപ് പുറത്തുവിട്ട കൽക്കിയിലെ കഥാപാത്രങ്ങളായ ഭൈരവ, അശ്വത്ഥാമാ തുടങ്ങിയ കഥാപാത്രങ്ങളെ പ്രേക്ഷകർ സ്വീകരിച്ച പോലെ ബുജ്ജിയെയും സ്വീകരിക്കുമെന്നാണ് പ്രതീക്ഷ.

 ആഗോളതലത്തിൽ ശ്രദ്ധയാകർഷിച്ച ഈ ചിത്രം ഈ വർഷത്തെ ഏറ്റവും പ്രതീക്ഷയുള്ള ഇന്ത്യൻ ചിത്രങ്ങളിൽ ഒന്നാണ്. വമ്പൻ ബജറ്റിൽ വിവിധ ഭാഷകളിലായാണ് ചിത്രം ഒരുങ്ങുന്നത്. വൈജയന്തി മൂവീസിന്റെ ബാനറിൽ സി അശ്വിനി ദത്ത് നിർമ്മിച്ച് നാഗ് അശ്വിൻ സംവിധാനം ചെയ്യുന്ന ചിത്രം ജൂൺ 27-നാണ് തിയേറ്ററുകളിൽ എത്തുക.