ഉപരാഷ്ട്രപതിയെ കണ്ട് മമ്മൂട്ടി

ന്യൂഡല്‍ഹി: തന്റെ സിനിമ ജീവിതം മാറ്റിമറിച്ച 'ന്യൂഡല്‍ഹി'ക്കുശേഷം ഷൂട്ടിങ്ങിനായി മമ്മൂട്ടി രാജ്യതലസ്ഥാനത്ത്. ആന്റോ ജോസഫ് നിര്‍മിച്ച് മഹേഷ് നാരായണന്‍ സംവിധാനം ചെയ്യുന്ന ചിത്രത്തിന്റെ ഡല്‍ഹിയിലെ ഷൂട്ടിങ്ങിനാണ് മമ്മൂട്ടി രാജ്യതലസ്ഥാനത്ത് എത്തിയത്. മമ്മൂട്ടിയും ഭാര്യ സുല്‍ഫത്തും ഉപരാഷ്ട്രപതി ജഗ്ദീപ് ധന്‍കറും ഭാര്യ സുധേഷ് ധന്‍കറുമായും കൂടിക്കാഴ്ച നടത്തി. ജോണ്‍ ബ്രിട്ടാസ് എംപിക്കൊപ്പമായിരുന്നു കൂടിക്കാഴ്ച. ഈ മാസം 25 വരെയാണ് ഡല്‍ഹിയില്‍ ചിത്രത്തിന്റെ ഷൂട്ടിങ്ങുള്ളത്.

ഷൂട്ടിങ്ങിനായി മോഹന്‍ലാല്‍ നാളെ ഡല്‍ഹിയില്‍ എത്തും. ആദ്യമായാണ്  രണ്ടു സൂപ്പര്‍ താരങ്ങളും ഒരു ഷൂട്ടിനായി ഡല്‍ഹിയില്‍ ഒരുമിക്കുന്നത്. മമ്മൂട്ടിയുടെ സിനിമാ ജീവിതത്തിലെ വലിയ വഴിത്തിരിവായിരുന്നു ജോഷി സംവിധാനം ചെയ്ത ന്യൂഡല്‍ഹി. അതിനുശേഷം സുരേഷ് ഗോപിക്കൊപ്പം ഷാജി കൈലാസിന്റെ ദി കിങ് ആന്‍ഡ് കമ്മിഷണര്‍ ആണ് ഡല്‍ഹിയില്‍ ഷൂട്ട് ചെയ്ത മമ്മൂട്ടി ചിത്രം.  

മമ്മൂട്ടിയും മോഹന്‍ലാലും ഡല്‍ഹിയില്‍ ഒരുമിക്കുന്നു എന്നതിനു പുറമെ 18 വര്‍ഷങ്ങള്‍ക്കുശേഷം ഇരുവരും ഒന്നിച്ചെത്തുന്ന ചിത്രം കൂടിയാണിത്.  ഫഹദ് ഫാസില്‍, നയന്‍താര, കുഞ്ചാക്കോ ബോബന്‍ തുടങ്ങിയവരടക്കം ചിത്രത്തിലുണ്ട്.