മഹാനടന് ഇന്ന് 74ാം പിറന്നാള്‍

കൊച്ചി: മലയാളികളുടെ പ്രിയപ്പെട്ട മമ്മൂട്ടിക്ക് ഇന്ന് 74ാം പിറന്നാള്‍. പൂര്‍ണ ആരോഗ്യവാനായി വീണ്ടും സിനിമയില്‍ സജീവമാകാന്‍ പോകുന്ന ഘട്ടത്തില്‍ പിറന്നാളിന് മാധുര്യമേറുകയാണ്. ഇത്തവണ ചെന്നൈയിലെ വീട്ടില്‍ കുടുംബാംഗങ്ങളോടൊത്ത് ലളിതമായാണ് മെഗാസ്റ്റാറിന്റെ പിറന്നാള്‍ ആഘോഷം. സമൂഹമാധ്യമങ്ങളില്‍ ആയിരങ്ങള്‍ ഇതിനകം അദ്ദേഹത്തെ ആശംസ അറിയിച്ചു.

'ലോകമെമ്പാടുമുള്ള ഒരുപാടുപേരുടെ പ്രാര്‍ഥനയ്ക്ക് ഫലം കണ്ടു' എന്ന് നിര്‍മാതാവ് ആന്റോ ജോസഫ് രണ്ടാഴ്ചമുന്പ് സമൂഹമാധ്യമങ്ങളില്‍ കുറിച്ചതോടെ മമ്മൂട്ടിക്ക് പ്രമുഖര്‍ ഉള്‍പ്പെടെ നിരവധി പേരാണ് ആശംസയറിയിച്ചത്. ചെറിയ ഇടവേളയ്ക്കുശേഷം താരത്തിന്റെ മടങ്ങിവരവ് അറിയിച്ച് നിര്‍മാതാവ് ആന്റോ ജോസഫും സന്തതസഹചാരി എസ് ജോര്‍ജും ഫെയ്സ്ബുക് പേജിലിട്ട രണ്ടുവരി കുറിപ്പ് മലയാളികളും സിനിമാപ്രേമികളും ഏറ്റെടുത്തു. അദ്ദേഹം പൂര്‍ണ ആരോഗ്യവാനായി സിനിമയിലേക്ക് മടങ്ങിവരാന്‍ കാത്തിരിക്കുകയാണ് ആരാധകര്‍.

'കളങ്കാവല്‍' ആണ് റിലീസിനൊരുങ്ങുന്ന മമ്മൂട്ടി ചിത്രം. ജിതിന്‍ കെ ജോസ് സംവിധാനംചെയ്ത ചിത്രത്തിന്റെ ടീസറിന് സമൂഹമാധ്യമങ്ങളില്‍ വന്‍ വരവേല്‍പ് ലഭിച്ചു. മകന്‍ ദുല്‍ഖര്‍ സല്‍മാന്റെ വേഫെറര്‍ ഫിലിംസ് നിര്‍മിച്ച ഓണക്കാല സൂപ്പര്‍ഹിറ്റ് ചിത്രം 'ലോകഃ - ചാപ്റ്റര്‍ 1: ചന്ദ്ര'യുടെ ട്രെയിലറും പോസ്റ്ററും മമ്മൂട്ടി സമൂഹമാധ്യമങ്ങളില്‍ പങ്കുവച്ചിരുന്നു. ആന്റോ ജോസഫ് നിര്‍മിച്ച് മഹേഷ് നാരായണന്‍ സംവിധാനം ചെയ്യുന്ന സിനിമയാണ് മമ്മൂട്ടി ഇനി പൂര്‍ത്തിയാക്കാനുള്ളത്.

മമ്മൂട്ടിയെ നായകനാക്കി ജോമോന്‍ സംവിധാനംചെയ്ത് വന്‍ വിജയം നേടിയ 'സാമ്രാജ്യം' റീ റിലീസിനൊരുങ്ങുകയാണ്. ചിത്രം ഫോര്‍കെ ഡോള്‍ബി അറ്റ്‌മോസ് പതിപ്പില്‍ 19ന് പ്രദര്‍ശനത്തിനെത്തും.