'രണ്ടാമൂഴം' സംവിധാനം ഋഷഭ് ഷെട്ടി? പ്രഖ്യാപനം ഉടന്‍

കൊച്ചി: മലയാളത്തിന്റെ പ്രിയ എഴുത്തുകാരന്‍ എം.ടി. വാസുദേവന്‍ നായരുടെ ക്ലാസിക് നോവല്‍ 'രണ്ടാമൂഴം' സിനിമയാകുന്നു. കന്നഡ സംവിധായകന്‍ ഋഷഭ് ഷെട്ടിയാകും നോവലിന്റെ ചലച്ചിത്രാവിഷ്‌കാരം സംവിധാനം ചെയ്യുക എന്നാണ് റിപ്പോര്‍ട്ടുകള്‍. സിനിമ രണ്ട് ഭാഗമായിട്ടാകും പുറത്തിറങ്ങുക എന്നാണ് സൂചന. ഇതുമായി ബന്ധപ്പെട്ട ഔദ്യോഗിക പ്രഖ്യാപനം ഉടന്‍ ഉണ്ടായേക്കും.

'രണ്ടാമൂഴം' ഈ വര്‍ഷം സിനിമയാകുമെന്ന് എംടിയുടെ മകള്‍ അശ്വതി നേരത്തെ ന്യൂസ് മലയാളത്തോട് പറഞ്ഞിരുന്നു. പാന്‍ ഇന്ത്യന്‍ സിനിമയായി, ലോക നിലവാരത്തിലായിരിക്കും 'രണ്ടാമൂഴം' ഒരുക്കുക എന്നാണ് അശ്വതി പറഞ്ഞത്. വലിയ പ്രോജക്ട് ആയിട്ടാണ് 'രണ്ടാമൂഴം' ചെയ്യുന്നത്. അതുകൊണ്ടുതന്നെ സമയമെടുക്കും. വളരെ കൃത്യതയോടെ കൂടി സൂക്ഷിച്ചാണ് ചെയ്യുന്നതെന്നുമാണ് അശ്വതി അറിയിച്ചത്.

സിനിമയുടെ ടീം ബില്‍ഡിങ് പൂര്‍ത്തിയായി. കുറച്ച് സാങ്കേതിക കാര്യങ്ങള്‍ കൂടി പൂര്‍ത്തിയായാല്‍ ചിത്രീകരണം പ്രഖ്യാപിക്കും.' രണ്ടാമൂഴ'ത്തെ സംബന്ധിച്ച് അച്ഛന്റെ വിഷന്‍ എന്താണെന്ന് അറിയാവുന്ന ഒരാള്‍ എന്ന നിലയില്‍ ടീമിന് ക്രിയാത്മകമായി പിന്തുണ നല്‍കുമെന്നുമാണ് അശ്വതി പറഞ്ഞത് .

'രണ്ടാമൂഴം' സിനിമയായി കാണണമെന്ന സ്വപ്നം യാഥാര്‍ഥ്യമായി കാണാന്‍ സാധിക്കാതെയാണ് 2024 ഡിസംബര്‍ 25ന് എംടി വിടവാങ്ങിയത്. ഇതേ ഡിസംബര്‍ മാസത്തിലാണ് 41 വര്‍ഷങ്ങള്‍ക്ക് മുന്‍പ് രണ്ടാമൂഴത്തിന്റെ ആദ്യ പതിപ്പ് പുറത്തിറങ്ങുന്നതും. എംടി സ്വന്തം കൈപ്പടയില്‍ എഴുതിവച്ച 'രണ്ടാമൂഴം' തിരക്കഥ സിനിമയാക്കാന്‍ പ്രമുഖ സംവിധായകരടക്കം പലതവണ സമീപിച്ചെങ്കിലും ആ ചര്‍ച്ചകള്‍ എല്ലാം പാതിവഴിയില്‍ നിലയ്ക്കുകയായിരുന്നു. സംവിധായകന്‍ വി.എ. ശ്രീകുമാര്‍ മേനോനെ സംവിധായകനായി എംടി തെരഞ്ഞെടുത്തിരുന്നു. എന്നാല്‍, പിന്നീട് ഇത് വലിയ തര്‍ക്കങ്ങളിലും കോടതി വ്യവഹാരങ്ങളിലുമാണ് അവസാനിച്ചത്. ഒടുവില്‍ എം.ടി തിരക്കഥ തിരികെവാങ്ങി.

മഹാഭാരതത്തിലെ ഭീമസേനന് നായകപരിവേഷം നല്‍കി എംടി രചിച്ച 'രണ്ടാമൂഴം' ഇന്നും മലയാളികളുടെ ഇഷ്ട നോവലാണ്. വ്യാസന്റെ മൗനങ്ങള്‍ക്ക് ശബ്ദം നല്‍കുകയായിരുന്നു നോവലില്‍ എംടി. അദ്ദേഹത്തിന്റെ ഏറ്റവും അധികം വിറ്റഴിക്കപ്പെടുന്ന നോവലുകളില്‍ ഒന്നും ഇതാണ്.