നാഗചൈതന്യയുമായുള്ള വിവാഹമോചനം; 200 കോടി നിരസിച്ച് സാമന്ത

ചെന്നൈ: സിനിമാ ലോകം ഏറെ നാളായി ചര്‍ച്ചചെയ്യുന്ന ഒന്നാണ് നടി സാമന്തയും നാഗചൈതന്യയും തമ്മിലുള്ള വിവാഹമോചനം. വിവാഹമോചനത്തിന്റെ പശ്ചാത്തലത്തില്‍ സാമന്തക്ക് ജീവനാംശമായി 200 കോടി വാഗ്ദാനം ചെയ്തുവെന്നും എന്നാല്‍ നടി ഇത് നിഷേധിച്ചെന്നുമാണ് റിപ്പോര്‍ട്ടുകള്‍. 

നാഗചൈന്യയും കുടുംബവും വാഗ്ദാനം ചെയ്ത ഒരു തുകയും വാങ്ങാന്‍ നടി തയ്യാറായിരുന്നില്ല. വിവാഹത്തില്‍ നിന്ന് പങ്കാളിയുടെ സ്നേഹമാണ് പ്രതീക്ഷിക്കുന്നതെന്നും മറ്റൊന്നും ആവശ്യമില്ലെന്നും നടിയുമായി അടുത്ത വൃത്തങ്ങള്‍ അന്ന് വ്യക്തമാക്കിയിരുന്നു. ജീവനാംശം നിരസിച്ച നടിയുടെ തീരുമാനമാണ് സാമൂഹിക മാധ്യമങ്ങളില്‍ വന്‍ ചര്‍ച്ചയാകുന്നത്. വിവാഹമോചനം ഏറെ ആലോചിച്ച ശേഷം രണ്ടുപേരും ഒരുമിച്ചെടുത്ത തീരുമാനമായിരുന്നുവെന്ന് അടുത്തിടെ നടന്‍ നാഗചൈതന്യ വ്യക്തമാക്കിയിരുന്നു.

'ഞങ്ങള്‍ക്ക് ഞങ്ങളുടേതായ വഴികളിലൂടെ സഞ്ചരിക്കണമായിരുന്നു. ഞങ്ങളുടേത് മാത്രമായ കാരണങ്ങളാല്‍ ഒരുമിച്ചെടുത്ത തീരുമാനമാണത്. രണ്ടുപേരും നമ്മുടേതായ രീതിയില്‍ മുന്നോട്ട് പോകുന്നു. ഇതില്‍ കൂടുതല്‍ എന്ത് വിശദീകരണമാണ് വേണ്ടതെന്ന് മനസ്സിലാകുന്നില്ല. പ്രേക്ഷകരും മാധ്യമങ്ങളും അതിനെ ബഹുമാനിക്കുമെന്ന് കരുതുന്നു. ഈ വിഷയത്തില്‍ ഞങ്ങളുടെ സ്വകാര്യതയെ നിങ്ങള്‍ മാനിക്കേണ്ടതുണ്ട്. ഇത് എന്റെ ജീവിതത്തില്‍ മാത്രം നടക്കുന്ന സംഭവമല്ല, പിന്നെ എന്തിനാണ് എന്നെ ഒരു കുറ്റവാളിയായി കാണുന്നത്', നാഗചൈതന്യ ചോദിച്ചു.

'ഞങ്ങളുമായി ബന്ധപ്പെട്ട് നില്‍ക്കുന്ന എല്ലാവരുടേയും താത്പര്യം മനസ്സില്‍ വെച്ചാണ് ഇതുചെയ്തത്. വേര്‍പിരിയേണ്ടി വന്ന ഒരു കുടുംബത്തിന്റെ ഭാ?ഗമായാണ് ഞാനും വളര്‍ന്നത്. അതിനാല്‍, ഒരു ബന്ധം തകരുന്നതിന്റെ അനന്തരഫലങ്ങളെക്കുറിച്ച് നല്ല ബോധ്യമുണ്ട്. അതിനാല്‍, വളരെ ശ്രദ്ധയോടെയാണ് ഓരോ ചുവടുമെടുത്തത്. ഞാന്‍ വീണ്ടും മറ്റൊരു പ്രണയത്തെ കണ്ടുമുട്ടി. സന്തോഷത്തോടെയാണ് ഇപ്പോള്‍ ജീവിക്കുന്നത്. അവരും അങ്ങനെതന്നെ', നാഗചൈതന്യ പറഞ്ഞു.

2021 ഒക്ടോബര്‍ രണ്ടിനാണ് സാമന്തയും നാഗചൈതന്യയും തങ്ങള്‍ വേര്‍പിരിയുകയാണെന്ന കാര്യം സോഷ്യല്‍ മീഡിയയിലൂടെ അറിയിച്ചത്. 2017-ലായിരുന്നു ഇവരുടെ വിവാഹം. ജീവിത പങ്കാളികള്‍ എന്ന നിലയില്‍ തങ്ങള്‍ വേര്‍പിരിയുകയാണെന്നും ഏതാണ്ട് പത്ത് വര്‍ഷത്തിലധികമായി തമ്മിലുള്ള സൗഹൃദം ഇനിയും നിലനില്‍ക്കുമെന്ന് പ്രതീക്ഷിക്കുന്നതായും വിവാഹമോചന വാര്‍ത്തയില്‍ സ്ഥിരീകരണം അറിയിച്ച് താരങ്ങള്‍ പങ്കുവച്ച കുറിപ്പില്‍ വ്യക്തമാക്കിയിരുന്നു.