ഒപ്പം ജീവിക്കാൻ ഒട്ടും എളുപ്പമല്ലാത്ത തന്നോടൊപ്പം എല്ലാ ബുദ്ധിമുട്ടുകളും സഹിച്ചു ശാലിനി കൂടെ നിന്നു. പ്രശസ്തി ,കുടുംബം ,കരിയർ എന്നിവയെകുറിച്ചു മനസ്സുതുറന്ന് 'അജിത്കുമാർ'

കുറച്ചു കാലമായി സിനിമയുടെ തിരക്കുകളിൽ നിന്നെല്ലാം മാറി റേസിങ്ങിൽ വളരെയധികം  ശ്രദ്ധ കേന്ദ്രീകരിച്ചിരിക്കുകയാണ് തെന്നിന്ത്യൻ സൂപ്പർ താരം അജിത്കുമാർ .

ഇതിന്റെ ദൃശ്യങ്ങൾ സമൂഹമാധ്യമങ്ങളിൽ വളരെ ശ്രദ്ധയാർജിക്കാറുമുണ്ട് .ഇപ്പോഴിതാ തന്റെ കരിയറിനെക്കുറിച്ചും പ്രശസ്തിയ്ക്ക് പിന്നിൽ അനുഭവിച്ച കഷ്ടപ്പാടുകളെക്കുറിച്ചും ഹോളിവുഡ് റിപ്പോർട്ടർ ഇന്ത്യയ്ക്കായി സിനിമാ നിരൂപക അനുപമാ ചോപ്രയ്ക്ക് നൽകിയ അഭിമുഖത്തിൽ പങ്കുവെച്ച കാര്യങ്ങൾ വളരെയധികം ശ്രദ്ധ നേടുകയാണ് .

തന്റെ പേരും പ്രശസ്തിയുമെല്ലാം ഒരു ദിവസം കൊണ്ട് നേടിയെടുത്തതല്ലെന്നും ജീവിതത്തിൽ സമ്പാദിച്ചതെല്ലാം തന്റെ കഠിനധ്വാനത്തിന്റെ ഫലമായി തനിക്ക് ലഭിച്ചതാണെന്നും വളർച്ചയുടെ ഘട്ടങ്ങളിലെല്ലാം ശാലിനിയുടെ പങ്ക് വളരെ വലുതായിരുന്നെന്നും അജിത്കുമാർ അഭിമുഖത്തിലൂടെ പറയുന്നു .

അജിത്കുമാറിന്റെ വാക്കുകളിലേക്ക് 
എനിക്ക് ഭാഷ ശരിയായി സംസാരിക്കാൻ കഴിഞ്ഞിരുന്നില്ല. പ്രത്യേക രീതിയിലായിരുന്നു എന്റെ തമിഴ് ഉച്ചാരം.

പക്ഷേ ഞാൻ നന്നായി പരിശ്രമിച്ചു.” കരിയറിന്റെ തുടക്കത്തിൽ പേര് മാറ്റണമെന്ന് പലരും നിർദ്ദേശിച്ചിരുന്നതായും അദ്ദേഹം വെളിപ്പെടുത്തി.

"അത്ര സാധാരണമല്ലാത്ത പേരായതുകൊണ്ട് തുടക്കത്തിൽ പേര് മാറ്റാൻ എന്നോട് പലരും ആവശ്യപ്പെട്ടിരുന്നു. പക്ഷേ, എനിക്ക് മറ്റൊരു പേര് വേണ്ടെന്ന് ഞാൻ നിർബന്ധം പിടിച്ചു."

ഇന്ന് കാണുന്നതെല്ലാം തൻ്റെ കഠിനാധ്വാനത്തിൻ്റെ ഫലമാണെന്ന് അദ്ദേഹം കൂട്ടിച്ചേർത്തു.

ശരിയായ ടീമിനെ കണ്ടെത്തുകയും വിജയിക്കാനുള്ള അതിയായ ആഗ്രഹം ഉണ്ടാകുകയും  ചെയ്യുന്നത് തൻ്റെ അഭിനയത്തിനും റേസിങ് കരിയറിനും ഒരുപോലെ പ്രധാനമാണെന്നും അജിത് പറഞ്ഞു.

‘ഒരുപാട് വെല്ലുവിളികൾ ഉണ്ടായിരുന്നു അതെല്ലാം അതിജീവിച്ചു. റേസിങ്ങിൻ്റെ കാര്യത്തിൽ പോലും. റേസിങ് ഒരു കരിയറാക്കാൻ ആഗ്രഹിക്കുന്ന 19 വയസ്സുള്ള ഒരാളെപ്പോലെ കഠിനമായി പ്രയത്നിച്ചു.

എൻ്റെ കൂടെ പ്രവർത്തിക്കുന്ന  സംവിധായകർ, നിർമ്മാതാക്കൾ, സാങ്കേതിക വിദഗ്ധർ എന്നിവരുടെ കാര്യത്തിൽ ഞാൻ ഭാഗ്യവാനാണ്’. തൻ്റെ സിനിമാ ജീവിതത്തിൻ്റെ ഭാഗമായി 29 ശസ്ത്രക്രിയകൾക്ക്  വിധേയനായിട്ടുണ്ടെന്നും അദ്ദേഹം അഭിമുഖത്തിൽ പങ്കുവെച്ചു .

തൻ്റെ എല്ലാ വിജയങ്ങളുടെ ക്രെഡിറ്റ് അദ്ദേഹം ഭാര്യ ശാലിനിയ്ക്കാണ് നൽകിയത്. ‘കൂടെ ജീവിക്കാൻ എളുപ്പമുള്ള ഒരാളല്ല ഞാൻ.

 ഒരുപാട് വിഷമഘട്ടങ്ങളിലൂടെ അവർ കടന്നുപോയിട്ടുണ്ട് .

പക്ഷേ എനിക്ക് വലിയ പിന്തുണ നൽകി. കുട്ടികൾ ഉണ്ടാകുന്നതുവരെ, എൻ്റെ റേസുകൾക്ക് അവൾ എൻ്റെ കൂടെ യാത്ര ചെയ്യുമായിരുന്നു.

 അവളുടെ പിന്തുണയില്ലാതെ ഇതൊന്നും സാധ്യമാകുമായിരുന്നില്ല’- അജിത് പറഞ്ഞു.

പ്രശസ്തികൾക്കിടയിലും കുടുംബത്തോടൊപ്പമുള്ള സമയം ഉൾപ്പെടെ ഒരുപാട് കാര്യങ്ങൾ ത്യജിക്കാൻ നിർബന്ധിതരാക്കുമെന്ന് അജിത് പറയുന്നു.

 ‘മിക്കവാറും സമയത്തും എൻ്റെ വീട്ടിൽ ഒതുങ്ങിക്കൂടുകയാണ്.

ആരാധകർ നൽകുന്ന എല്ലാ സ്നേഹത്തിനും ഞാൻ നന്ദിയുള്ളവനാണ്, പക്ഷേ അതേ സ്നേഹം കാരണം, എനിക്ക് എൻ്റെ കുടുംബത്തോടൊപ്പം പുറത്തുപോകാൻ കഴിയാറില്ല.

എനിക്ക് എൻ്റെ മകനെ സ്കൂളിൽ കൊണ്ടുവിടാൻ കഴിയില്ല. എന്നോട് അവിടെ നിന്ന് പോകാൻ വളരെ മാന്യമായി, ആവശ്യപ്പെട്ട സന്ദർഭങ്ങളുണ്ട്’- അജിത് പറയുന്നു .

കരിയർ .കുടുംബം ,പ്രശസ്തി എന്നിവയെകുറിച്ചെല്ലാം വളരെയധികം വാചാലമായാണ് അജിത്കുമാർ അഭിമുഖത്തിൽ ഓരോ കാര്യങ്ങളും പങ്കുവെച്ചത് .