ഏപ്രിൽ മുതൽ മുംബൈയിൽ ഓട്ടോമാറ്റിക് വാതിലുകളുള്ള 2 നോൺ -എസി ലോക്കൽ ട്രെയിനുകൾ ആരംഭിക്കും

മുംബൈ ലോക്കൽ ട്രെയിൻ യാത്ര കൂടുതൽ സുരക്ഷിതമാക്കാൻ റെയിൽവേ പുതിയ പദ്ധതി നടപ്പാക്കുന്നു. ഓട്ടോമാറ്റിക് വാതിലുകളുള്ള രണ്ട് നോൺ -എസി ലോക്കൽ ട്രെയിനുകൾ ഏപ്രിൽ മാസം മുതൽ സർവീസ് ആരംഭിക്കാൻ തീരുമാനമെടുത്തതായി റിപ്പോർട്ടുകൾ സൂചിപ്പിക്കുന്നു.

ഇതുവരെ ലോക്കൽ ട്രെയിനുകളിൽ വാതിലുകൾ തുറന്ന നിലയിലാണ് യാത്ര നടക്കുന്നത്. തിരക്കിനിടയിൽ യാത്രക്കാർ ട്രെയിനിൽ നിന്ന് വീഴുന്നതും അപകടങ്ങളിൽപ്പെടുന്നതും പതിവാണ്.

ഈ അപകടങ്ങൾ കുറയ്ക്കാനാണ് വാതിലുകൾ സ്വയം അടയുന്ന സംവിധാനം കൊണ്ടുവരുന്നത്.

പുതിയ ട്രെയിനുകൾ ചെന്നൈയിലെ ഇന്റഗ്രൽ കോച്ച് ഫാക്ടറിയിൽ നിർമ്മിച്ചു വരികയാണ്. മാർച്ച് മാസത്തോടെ നിർമ്മാണം പൂർത്തിയാകും.തുടർന്ന് പരീക്ഷണ ഓട്ടങ്ങൾ നടത്തും.

എല്ലാം വിജയകരമായാൽ ഏപ്രിൽ മുതൽ ട്രെയിനുകൾ സർവീസിൽ പ്രവേശിക്കും. ആദ്യഘട്ടത്തിൽ ഈ ട്രെയിനുകൾ സിഎസ്എംടി–കല്യാൻ റൂട്ടിൽ ഓടിക്കാനാണ് പദ്ധതി.ഇത് മുംബൈയിലെ ഏറ്റവും തിരക്കേറിയ റൂട്ടുകളിലൊന്നാണ്.

പുതിയ ട്രെയിനുകളിൽ നല്ല വായുസഞ്ചാരം ലഭിക്കാൻ പ്രത്യേക വെന്റിലേഷൻ സംവിധാനവും ഒരുക്കും.ഭാവിയിൽ കൂടുതൽ നോൺ -എസി ലോക്കൽ ട്രെയിനുകളിൽ ഈ സംവിധാനം വ്യാപിപ്പിക്കുമെന്ന് റെയിൽവേ അറിയിച്ചു.

യാത്രക്കാരുടെ സുരക്ഷയ്ക്ക് വലിയ ആശ്വാസം നൽകുന്ന മാറ്റമായാണ് ഈ തീരുമാനം വിലയിരുത്തപ്പെടുന്നത്.