വിമാനാപകട വാർത്ത ടി.വിയിൽ വരുമ്പോൾ അജിത് പവാറിന്റെ അമ്മ ടി വി യുടെ മുന്നിൽ ; ഉടൻ കേബിൾ വിച്ഛേദിച്ച് സ്റ്റാഫ്

പൂനെ : മഹാരാഷ്ട്ര ഉപമുഖ്യമന്ത്രി അജിത് പവാറിന്റെ വിമാനാപകടം നടന്ന സമയത്ത്, അദ്ദേഹത്തിന്റെ അമ്മ ആശാ പവാർ വീട്ടിൽ ടി.വി. കാണുകയായിരുന്നുവെന്ന് അടുത്ത വൃത്തങ്ങൾ വ്യക്തമാക്കി.

അപകടവാർത്ത ടെലിവിഷൻ ചാനലുകളിൽ സംപ്രേഷണം ചെയ്യാൻ തുടങ്ങുമെന്ന സൂചന ലഭിച്ചതോടെ, കുടുംബാംഗങ്ങളുടെയും സ്റ്റാഫിന്റെയും ഇടപെടലിലൂടെ ഉടൻ ടി.വി. കേബിൾ വിച്ഛേദിച്ചു.

വാർത്ത അമ്മയുടെ ശ്രദ്ധയിൽപ്പെടാതിരിക്കാനായി, വീട്ടിലെ ജീവനക്കാർ മൊബൈൽ ഫോണുകളും ഫ്ലൈറ്റ് മോഡിലാക്കി.

അപ്രതീക്ഷിതമായ ദുഖവാർത്ത മൂലം അവർ മാനസികമായി തകർന്നുപോകാതിരിക്കാനായിരുന്നു ഈ മുൻകരുതൽ നടപടികൾ.

എങ്കിലും വീട്ടിലെ അസാധാരണമായ ചലനങ്ങൾ ശ്രദ്ധിച്ച ആശാ പവാർ, “ദാദയ്ക്ക് എന്തെങ്കിലും സംഭവിച്ചോ?” എന്ന് ആവർത്തിച്ച് ചോദിച്ചതായി അടുത്ത വൃത്തങ്ങൾ അറിയിച്ചു.

പിന്നീട് അവർ വീട്ടിൽ നിന്ന് പുറത്തേക്ക് പോകാൻ ശ്രമിക്കുകയും “ദാദയെ കാണണം” എന്ന് പറയുകയും ചെയ്തുവെന്ന് റിപ്പോർട്ടുണ്ട്.

ഏറെ പരിശ്രമിച്ച ശേഷം കുടുംബാംഗങ്ങളും ജീവനക്കാരും ചേർന്ന് അവരെ വീണ്ടും വീട്ടിനുള്ളിൽ പ്രവേശിപ്പിച്ചു.

നാലു ദിവസങ്ങൾക്ക് മുമ്പ് തന്നെ അജിത് പവാർ അമ്മയെ സന്ദർശിച്ചിരുന്നുവെന്നും, ഏറെ നേരം ഒപ്പം ചെലവഴിച്ച ശേഷമാണ് യാത്ര തിരിച്ചതെന്നും കുടുംബാംഗങ്ങൾ അറിയിച്ചു.