വീണ്ടും ഉദ്ധവ് രാജ് കൂടിക്കാഴ്ച്ച:യോഗത്തിന്റെ അജണ്ട വെളിപ്പെടുത്താതെ ഇരുവരും

മുംബൈ: മഹാരാഷ്ട്ര തദ്ദേശ സ്വയംഭരണ സ്ഥാപനങ്ങളിലേക്കുള്ള തിരഞ്ഞെടുപ്പിന് ഒരുങ്ങുകയാണ്.ഈ സമയത്ത് രാജ് താക്കറെയും ഉദ്ധവ് താക്കറെയും തമ്മിലുള്ള കൂടിക്കാഴ്ചകൾ വർദ്ധിച്ചുവരുന്നത് മഹാരാഷ്ട്ര നവനിർമ്മാൺ സേന (എംഎൻഎസ്) ഉം ശിവസേന (ഉദ്ധവ് ബാലാസാഹേബ് താക്കറെ വിഭാഗം) ഉം തമ്മിലുള്ള സഖ്യത്തിനുള്ള സാധ്യതയേറിയതായി രാഷ്ട്രീയ നിരീക്ഷകർ വിലയിരുത്തുന്നു.

ബാന്ദ്രയിലെ എംസിഎം ക്ലബ്ബിൽ എംപി സഞ്ജയ് റാവത്തിന്റെ ചെറുമകളുടെ നാമകരണ ചടങ്ങിൽ പങ്കെടുത്തതിന് തൊട്ടുപിന്നാലെ, എംഎൻഎസ് മേധാവി രാജ് താക്കറെ ഞായറാഴ്ച ശിവസേന (യുബിടി) മേധാവി ഉദ്ധവ് താക്കറെയുടെ വസതിയായ മാതോശ്രീ സന്ദർശിച്ചു.

രശ്മി താക്കറെയ്ക്കും ആദിത്യ താക്കറെയ്ക്കുമൊപ്പം നേതാക്കൾ സംസാരിക്കുന്നതിന്റെ വീഡിയോ സോഷ്യൽ മീഡിയയിൽ പെട്ടെന്ന് വൈറലായി.

കൂടിക്കാഴ്ച സൗഹാർദ്ദപരമായി തോന്നിയെങ്കിലും, രാജ് താക്കറെ തന്റെ വസതിയിലേക്ക് മടങ്ങുന്നതിന് പകരം മാതോശ്രീ സന്ദർശിച്ചത് രാഷ്ട്രീയ വൃത്തങ്ങളിൽ അമ്പരപ്പ് ഉളവാക്കി.

എന്നാൽ രണ്ട് നേതാക്കളും തമ്മിലുള്ള അടച്ചിട്ട റൂമിൽ നടന്ന ചർച്ചയുടെ വിശദാംശങ്ങൾ വെളിപ്പെടുത്തിയിട്ടില്ല. 

മൂന്ന് മാസത്തിനിടെ അഞ്ചാമത്തെ കൂടിക്കാഴ്ചയായിരുന്നു ഇരുവരുടെയും.

ജൂലൈ 5 ന് മറാത്തി ഭാഷാ സമ്മേളനത്തിനിടെയാണ് സമീപകാലത്തുള്ള ഇടപെടലുകൾക്ക് തുടക്കം കുറിച്ചത്. തുടർന്ന് ജൂലൈ 27 ന് ഉദ്ധവിന് ജന്മദിനാശംസ നേരാൻ രാജ് താക്കറെ മാതോശ്രീ സന്ദർശിച്ചു. ഓഗസ്റ്റ് 27 ന്, രാജിന്റെ ശിവതീർത്ഥ് വസതിയിൽ നടന്ന ഗണേശോത്സവ ആഘോഷത്തിൽ ഉദ്ധവ് പങ്കെടുത്തു - ഏകദേശം രണ്ട് പതിറ്റാണ്ടുകൾക്ക് ശേഷം ഇത് ആദ്യമായിരുന്നു. സെപ്റ്റംബർ 10 ന് ഗണേശ ചതുർത്ഥിയോടനുബന്ധിച്ചും പിന്നീട് അതേ മാസം തന്നെ അനൗപചാരിക ചർച്ചകൾക്കുമായും ഇരുവരും വീണ്ടും കണ്ടുമുട്ടിയിരുന്നു.

മുനിസിപ്പൽ, തദ്ദേശ സ്വയംഭരണ സ്ഥാപന തിരഞ്ഞെടുപ്പുകൾക്ക് മുന്നോടിയായി മുംബൈയിലെയും മറ്റ് നഗരപ്രദേശങ്ങളിലെയും പ്രതിപക്ഷ ക്യാമ്പ് ശക്തിപ്പെടുത്തുക എന്ന ലക്ഷ്യത്തോടെയാണ് അടുപ്പം ഉണ്ടായതെന്ന് രാഷ്ട്രീയ നിരീക്ഷകർ വിശ്വസിക്കുന്നു.