മുളുണ്ടിൽ മെട്രോ നിർമാണ തൂണിൽ നിന്ന് കോൺക്രീറ്റ് സ്ലാബ് താഴേക്ക് പതിച്ചു : 1 മരണം, 3 പേർക്ക് ഗുരുതര പരിക്ക്

മുംബൈ : മുളുണ്ട് വെസ്റ്റിൽ നിർമാണത്തിലിരുന്ന മുംബൈ മെട്രോ ലൈൻ 4 ന്റെ പദ്ധതിയുമായി ബന്ധപ്പെട്ട തൂണിൽ നിന്ന് കോൺക്രീറ്റ് സ്ലാബ് അപ്രതീക്ഷിതമായി താഴേക്ക് പതിച്ചു.

മുളുണ്ട് എൽ ബി എസ് മാർഗ് ജോൺസൺ & ജോൺസൺ കമ്പനിയുടെ മുന്നിൽ വെച്ചാണ് അപകടം നടന്നത്.റോഡിലൂടെ പോയിരുന്ന ഒരു ഓട്ടോറിക്ഷയുടെയും കാറിന്റെയും മേൽ പതിക്കുകയായിരുന്നു കോൺക്രീറ്റ് സ്ലാബ്.

അപകടത്തിൽ ഒരാളുടെ മരണം സ്ഥിരീകരിച്ചു.4 പേർക്ക് പരിക്കേറ്റതായാണ്‌ വിവരം. ഇതിൽ 3 പേരുടെ നില ഗുരുതരമാണ്.

പരിക്കേറ്റവരെ ഉടൻ സമീപത്തെ ആശുപത്രിയിലേക്ക് മാറ്റി. സംഭവത്തെ തുടർന്ന് പ്രദേശത്ത് ഗതാഗത തടസ്സം അനുഭവപ്പെട്ടു.

സംഭവത്തിന്റെ ദൃശ്യങ്ങൾ സമൂഹമാധ്യമങ്ങളിൽ വ്യാപകമായി പ്രചരിക്കുകയാണ്.

അതേസമയം നിർമാണ സ്ഥലത്തെ സുരക്ഷാ ക്രമീകരണങ്ങളെ കുറിച്ച് ബന്ധപ്പെട്ട അധികൃതർ അന്വേഷണം ആരംഭിച്ചു.