നിയമസഭാ തെരഞ്ഞെടുപ്പിലെ പരാജയത്തെക്കുറിച്ച് കോൺഗ്രസ്‌ ആത്മപരിശോധന നടത്തണം:രാഹുൽ ഗാന്ധിക്ക് മറുപടിയുമായി ദേവേന്ദ്ര ഫഡ്നാഫിസ്

മുംബൈ:2024 ലെ സംസ്ഥാന നിയമസഭാ തെരഞ്ഞെടുപ്പിലെ പരാജയത്തെക്കുറിച്ച് പ്രതിപക്ഷവും കോൺഗ്രസ്സും ആത്മപരിശോധന നടത്തുകയാണ് വേണ്ടതെന്നും ജനങ്ങൾ രാഹുൽ ഗാന്ധിയെ നിരസിച്ചതിനാലാണ് അദ്ദേഹം ജനവിധി നിരാകരിക്കുന്നതെന്നും മഹാരാഷ്ട്ര മുഖ്യമന്ത്രി ദേവേന്ദ്ര ഫഡ്‌നാവിസ് ഇന്ന് പറഞ്ഞു.

ബീഹാർ ഉൾപ്പെടെയുള്ള വരാനിരിക്കുന്ന നിയമസഭാ തെരഞ്ഞെടുപ്പുകളിലെ ഭാവി തോൽവികൾക്ക് ലോക്‌സഭയിലെ പ്രതിപക്ഷ നേതാവ് മുൻ‌കൂർ ജാമ്യം എടുക്കുകയാണെന്നും ഇന്ത്യൻ എക്‌സ്പ്രസിലും മറാത്തി ദിനപത്രമായ ലോക്സത്തയിലും പ്രസിദ്ധീകരിച്ച തന്റെ ലേഖനങ്ങളിൽ ഫഡ്‌നാവിസ് പറഞ്ഞു.

"2024 ലെ മഹാരാഷ്ട്ര നിയമസഭാ തെരഞ്ഞെടുപ്പ് ജനാധിപത്യത്തെ അട്ടിമറിച്ച ഒരു ബ്ലൂപ്രിന്റ്" ആയിരുന്നുവെന്നും ഈ "മാച്ച് ഫിക്സിംഗ്" അടുത്ത് ബീഹാറിൽ നടക്കുമെന്നും ശനിയാഴ്ച, നിരവധി പത്രങ്ങളിലും എക്‌സിലും പ്രസിദ്ധീകരിച്ച ഒരു ലേഖനത്തിൽ, രാഹുൽ ഗാന്ധി ആരോപിച്ചിരുന്നു.

അതേസമയം രാഹുൽ ഗാന്ധിയുടെ അവകാശവാദങ്ങൾക്ക് മറുപടിയായി, കോൺഗ്രസ് നേതാവ് ജനാധിപത്യ പ്രക്രിയയെയും ജനങ്ങളുടെ വിധിയെ നിരന്തരം "അപമാനിച്ചു" കൊണ്ടിരിക്കുകയാണെന്ന് ഫഡ്‌നാവിസ് തന്റെ ലേഖനത്തിൽ പറഞ്ഞു. "ജനങ്ങൾ രാഹുൽ ഗാന്ധിയെ നിരാകരിച്ചു, പ്രതികാരമായി, അദ്ദേഹം ജനങ്ങളെയും അവരുടെ വിധിയെത്തന്നെയും നിരസിക്കുകയാണ്," അദ്ദേഹം ആരോപിച്ചു.