റിപ്പബ്ലിക് ദിനത്തിൽ മുംബൈ മെട്രോ ലൈൻ–9 ഭാഗികമായി തുറക്കാൻ സാധ്യത

മുംബൈ: മുംബൈയിലെ ഗതാഗത സൗകര്യങ്ങൾ ശക്തിപ്പെടുത്തുന്ന മെട്രോ വികസന പദ്ധതികളുടെ ഭാഗമായി, മെട്രോ ലൈൻ–9 റിപ്പബ്ലിക് ദിനമായ ജനുവരി 26-ന് ഭാഗികമായി പൊതുജനങ്ങൾക്ക് തുറക്കാൻ സാധ്യതയുണ്ടെന്ന് റിപ്പോർട്ട്.

ആവശ്യമായ അന്തിമ സുരക്ഷാ അനുമതികൾ ലഭിക്കുന്നതിനെ ആശ്രയിച്ചായിരിക്കും ഉദ്ഘാടനം.

ആദ്യഘട്ടത്തിൽ ദഹിസർ ഈസ്റ്റ് മുതൽ കാശിഗാവ് വരെ നീളുന്ന 4.4 കിലോമീറ്റർ ദൈർഘ്യമുള്ള സെക്ഷൻ ആണ് പ്രവർത്തനം ആരംഭിക്കാൻ തയ്യാറാക്കിയിരിക്കുന്നത്.ഇതിൽ നാല് സ്റ്റേഷനുകൾ ഉണ്ടാകും. ഈ റൂട്ടിന്റെ പ്രവർത്തനം ആരംഭിച്ചാൽ, മിരാ-ഭായന്ദർ മേഖലയിലെ യാത്രക്കാർക്ക് വലിയ ആശ്വാസമാകും.

മെട്രോ റെയിൽ സുരക്ഷാ കമ്മീഷണറുടെ (CMRS) പരിശോധനകൾ നിലവിൽ അവസാനഘട്ടത്തിലാണ്. പരിശോധനയ്ക്കുശേഷം നിർദേശിച്ച ചില സാങ്കേതിക നിർദ്ദേശങ്ങൾ മുംബൈ മെട്രോ റീജിയണൽ ഡെവലപ്‌മെന്റ് അതോറിറ്റി (MMRDA) പരിഹരിച്ചുവരികയാണ്. ഇവ പൂർത്തിയായാൽ, അടുത്ത ദിവസങ്ങളിൽ തന്നെ സുരക്ഷാ സർട്ടിഫിക്കറ്റ് ലഭിക്കുമെന്നാണ് പ്രതീക്ഷ.

കഴിഞ്ഞ ക്രിസ്മസ് ദിനത്തിൽ തന്നെ മെട്രോ ലൈൻ–9 ഉൾപ്പെടെ ചില പുതിയ മെട്രോ റൂട്ടുകൾ തുറക്കുമെന്ന് അറിയിപ്പുണ്ടായിരുന്നെങ്കിലും, സുരക്ഷാ പരിശോധനകൾ പൂർത്തിയാകാത്തതിനാൽ ഉദ്ഘാടനം മാറ്റിവെക്കേണ്ടിവന്നു. ഇതിന്റെ പശ്ചാത്തലത്തിലാണ് റിപ്പബ്ലിക് ദിനം ലക്ഷ്യമിട്ട് ഭാഗിക ഉദ്ഘാടനം ആലോചിക്കുന്നത്.

അതേസമയം, മറ്റ് മെട്രോ പദ്ധതികളായ ലൈൻ 2B ഉൾപ്പെടെയുള്ള റൂട്ടുകൾക്ക് ഇനി കുറച്ച് സമയം കൂടി ആവശ്യമായി വരുമെന്ന് അധികൃതർ വ്യക്തമാക്കിയിട്ടുണ്ട്.

ഇവയുടെ നിർമ്മാണവും സാങ്കേതിക പരിശോധനകളും പുരോഗമിക്കുകയാണ്. മെട്രോ ലൈൻ–9 പൂർണമായി പ്രവർത്തനസജ്ജമാകുന്നതോടെ മിരാ-ഭായന്ദർ മേഖലയിൽ നിന്ന് മുംബൈ വിമാനത്താവളം ഉൾപ്പെടെയുള്ള പ്രധാന കേന്ദ്രങ്ങളിലേക്കുള്ള യാത്ര കൂടുതൽ വേഗത്തിലും സൗകര്യപ്രദവുമായിത്തീരും.

നഗരത്തിലെ ട്രാഫിക് സമ്മർദം കുറയ്ക്കാനും പദ്ധതി വലിയ തോതിൽ സഹായകമാകുമെന്നാണ് വിലയിരുത്തൽ.