മേയർ കസേര ആരിലേക്ക്? മുംബൈയിൽ കാത്തിരിപ്പ് തുടരുന്നു

മുംബൈ: മുംബൈ മുനിസിപ്പൽ കോർപ്പറേഷനിലെ (BMC) മേയർ പദവി മഹായുതി സഖ്യത്തിനായിരിക്കും എന്ന് മഹാരാഷ്ട്ര ഡെപ്യൂട്ടി മുഖ്യമന്ത്രി ഏകനാഥ് ഷിൻഡെ വ്യക്തമാക്കി.

എന്നാൽ മേയർ സ്ഥാനത്തേക്ക് ഏത് പാർട്ടിയിലെ നേതാവാകും എത്തുക എന്ന കാര്യത്തിൽ ഇപ്പോഴും തീരുമാനമായിട്ടില്ല. 

227 അംഗങ്ങളുള്ള BMCയിൽ ബിജെപി– സേന സഖ്യമായ മഹായുതി 118 സീറ്റുകൾ നേടി. ബിജെപിക്ക് 89 സീറ്റും ഷിൻഡെ വിഭാഗം ശിവസേനയ്ക്ക് 29 സീറ്റുമുണ്ട്.

ഇതോടെ നഗരസഭയിൽ ഭരണം ഉറപ്പിക്കാൻ ആവശ്യമായ ഭൂരിപക്ഷം മഹായുതിക്ക് ലഭിച്ചു. പുതുതായി തിരഞ്ഞെടുക്കപ്പെട്ട ഷിൻഡെ സേനയിലെ കോർപ്പറേറ്റർമാരുമായി നടത്തിയ കൂടിക്കാഴ്ചയിലാണ് അദ്ദേഹം ഈ നിലപാട് വ്യക്തമാക്കിയത്.

മഹായുതിക്ക് മേയർ ഉറപ്പാണെങ്കിലും, മേയർ പദവി ബിജെപിക്കാണോ ഷിൻഡെ സേനയ്ക്കാണോ ലഭിക്കുക എന്ന ചർച്ചകൾ സഖ്യത്തിനുള്ളിൽ തുടരുകയാണ് എന്നും അദ്ദേഹം സൂചിപ്പിച്ചു.

ഇതിനാൽ, മുംബൈയുടെ പുതിയ മേയർ ആരാകും എന്ന ചോദ്യം ഇപ്പോഴും രാഷ്ട്രീയ വൃത്തങ്ങളിൽ സസ്‌പെൻസ് നിലനിർത്തുകയാണ്.