കാലാവസ്ഥ പോരാട്ടത്തിന് പുതിയ ദിശ; നഗരങ്ങൾ നയിക്കുന്ന തുടക്കം മുംബൈയിൽ

മുംബൈ : ഇന്ത്യയിൽ ആദ്യമായി ഒരു നഗരം തന്നെ നേതൃത്വം നൽകുന്ന വലിയ കാലാവസ്ഥ പ്രവർത്തനത്തിന് മുംബൈ വേദിയാകുന്നു. ‘Mumbai Climate Week 2026’ എന്ന പേരിൽ സംഘടിപ്പിക്കുന്ന ഈ പരിപാടി ഫെബ്രുവരി 17 മുതൽ 19 വരെ നടക്കും.

കാലാവസ്ഥ വ്യതിയാനത്തെ നേരിടുന്നതിൽ നഗരങ്ങളും പൗരന്മാരും നേരിട്ട് പങ്കാളികളാകുന്ന പുതിയ മാതൃകയാണ് ഈ സംരംഭം മുന്നോട്ടുവയ്ക്കുന്നത്. കാലാവസ്ഥ മാറ്റം നഗരങ്ങളിലെ ജീവിതത്തെ ഗുരുതരമായി ബാധിക്കുന്ന സാഹചര്യത്തിലാണ് ഈ സംരംഭം രൂപം കൊണ്ടത്.

ദേശീയ തലത്തിലുള്ള നയങ്ങളിലൊതുങ്ങാതെ, നഗരങ്ങളിൽ നേരിടുന്ന യഥാർത്ഥ പ്രശ്നങ്ങൾക്ക് നഗരതലത്തിൽ തന്നെ പരിഹാരങ്ങൾ കണ്ടെത്തുകയാണ് പരിപാടിയുടെ പ്രധാന ലക്ഷ്യം.

ഇതിലൂടെ നഗര ഭരണകൂടങ്ങളും പൊതുജനങ്ങളും ഒരുപോലെ കാലാവസ്ഥ പ്രവർത്തനങ്ങളിൽ പങ്കാളികളാകും. കാലാവസ്ഥ വ്യതിയാനത്തിന്റെ ദീർഘകാല പ്രത്യാഘാതങ്ങൾ ഏറ്റവും കൂടുതൽ ബാധിക്കുന്നത് കുട്ടികളെയും യുവജനങ്ങളെയുമാണെന്ന തിരിച്ചറിവിലാണ് ഈ പരിപാടി ആവിഷ്‌കരിച്ചിരിക്കുന്നത്.

കുട്ടികളുടെയും യുവാക്കളുടെയും അഭിപ്രായങ്ങളും ആശയങ്ങളും കാലാവസ്ഥ നയരൂപീകരണത്തിൽ ഉൾപ്പെടുത്തുക എന്നതാണ് ഈ സംരംഭത്തിന്റെ പ്രധാന സവിശേഷത.

ഈ പരിപാടി UNICEF India, YuWaah, Project Mumbai തുടങ്ങിയ സംഘടനകളുടെ സഹകരണത്തോടെയാണ് നടപ്പാക്കുന്നത്. യുവജനങ്ങളെ കാലാവസ്ഥ സംരക്ഷണ പ്രവർത്തനങ്ങളിലേക്ക് സജീവമായി ഉൾപ്പെടുത്തുന്നതിനായി വിവിധ ബോധവൽക്കരണവും പരിശീലനപരിപാടികളും ഇവർ സംഘടിപ്പിക്കും.

ഫെബ്രുവരി 9 മുതൽ 16 വരെ മുംബൈയിലെ വിവിധ കോളേജുകളിൽ ക്യാമ്പസ്‌ ക്ലൈമറ്റ് റോഡ്ഷോ സംഘടിപ്പിക്കും.

പരിസ്ഥിതി സംരക്ഷണം, സുസ്ഥിര ജീവിതശൈലി, ഇ-വേസ്റ്റ് നിയന്ത്രണം എന്നിവയെക്കുറിച്ച് വിദ്യാർത്ഥികളിൽ അവബോധം വളർത്തുകയാണ് ഈ പരിപാടികളുടെ ലക്ഷ്യം.

16 മുതൽ 24 വയസ്സ് വരെയുള്ള യുവജനങ്ങൾക്കായി Youth Green Innovation Challenge എന്ന പ്രത്യേക സംരംഭവും സംഘടിപ്പിക്കും.

ഭക്ഷ്യസുരക്ഷ, ഊർജ്ജ സംരക്ഷണം, നഗര സുസ്ഥിര വികസനം തുടങ്ങിയ മേഖലകളിൽ പുതുമയുള്ള ആശയങ്ങൾ അവതരിപ്പിക്കാൻ യുവാക്കൾക്ക് ഇതിലൂടെ അവസരം ലഭിക്കും.

തിരഞ്ഞെടുക്കപ്പെടുന്ന മികച്ച ആശയങ്ങൾ ‘Mumbai Climate Week 2026’ വേദിയിൽ വിദഗ്ധർക്കും നയരൂപീകരകര്ക്കും മുന്നിൽ അവതരിപ്പിക്കും.

കാലാവസ്ഥ ചർച്ചകൾ വാക്കുകളിൽ മാത്രം ഒതുങ്ങാതെ, പ്രായോഗിക നടപടികളിലേക്കും ദീർഘകാല പരിഹാരങ്ങളിലേക്കും മാറ്റുക എന്നതാണ് ഈ പരിപാടിയുടെ ദീർഘകാല ലക്ഷ്യം.