മഹാരാഷ്ട്രയിലെ വ്യാജ വോട്ടർ പട്ടിക ആരോപണം:നവംബർ ഒന്നിന് തിരഞ്ഞെടുപ്പ് കമ്മീഷൻ ഓഫീസിലേക്ക് എം വി എ സഖ്യത്തിന്റെ പ്രതിഷേധ മാർച്ച്

മുംബൈ: സംസ്ഥാനത്തെ വോട്ടർ പട്ടികയിൽ വൻതോതിലുള്ള ക്രമക്കേടുകളും വ്യാജ വോട്ടർമാരെയും ഉൾപ്പെടുത്തിയിട്ടുണ്ടെന്ന് ആരോപിച്ച് പ്രതിപക്ഷ മഹാ വികാസ് അഘാഡി (എംവിഎ) സഖ്യം നവംബർ 1 ന് മുംബൈയിലെ തിരഞ്ഞെടുപ്പ് കമ്മീഷൻ ഓഫീസിലേക്ക് വൻ പ്രതിഷേധ മാർച്ച് നടത്തുമെന്ന് പ്രഖ്യാപിച്ചു.

മുംബൈയിലെ ശിവസേന ഭവനിൽ നടന്ന പത്രസമ്മേളനത്തിൽ ശിവസേന (യുബിടി) എംപി സഞ്ജയ് റാവത്ത്, എൻസിപി (ശരദ് പവാർ ഗ്രൂപ്പ്) യുടെ മുതിർന്ന നേതാക്കളായ ജയന്ത് പാട്ടീൽ, കോൺഗ്രസ് വക്താവ് സച്ചിൻ സാവന്ത്, സിപിഐ (എം) നേതാവ് പ്രകാശ് റെഡ്ഡി എന്നിവർ ചേർന്നാണ് പ്രഖ്യാപനം നടത്തിയത്.

മാച്ച് ഫിക്സിംഗിനെതിരായ' പോരാട്ടമാണിതെന്ന് റാവത്ത് പറഞ്ഞു. തുടർച്ചയായി രണ്ട് ദിവസം തിരഞ്ഞെടുപ്പ് കമ്മീഷൻ ഉദ്യോഗസ്ഥരെ കണ്ടിട്ടും വോട്ടർ പട്ടികയിലെ പൊരുത്തക്കേടുകൾ സംബന്ധിച്ച പരാതികളിൽ തൃപ്തികരമായ മറുപടി ലഭിച്ചില്ലെന്ന് റാവത്ത് പറഞ്ഞു.

ഇത് വെറുമൊരു പ്രതിഷേധമല്ല, തിരഞ്ഞെടുപ്പ് കമ്മീഷന്റെ 'മാച്ച് ഫിക്സിംഗ്' നെതിരെയുള്ള പോരാട്ടമാണ്," റാവത്ത് കൂട്ടിച്ചേർത്തു. ഭരണകക്ഷി എംഎൽഎമാർ പോലും വോട്ടർ പട്ടികയിൽ ക്രമക്കേടുകൾ ഉണ്ടെന്ന് സമ്മതിച്ചിട്ടുണ്ട്. നവംബർ 1 മഹാരാഷ്ട്രയ്ക്ക് നിർണായക ദിനവും ജനാധിപത്യത്തിന് ഒരു സുപ്രധാന നിമിഷവുമായിരിക്കും," അദ്ദേഹം പറഞ്ഞു.

ഉദ്ധവ് താക്കറെ, ശരദ് പവാർ, മുതിർന്ന കോൺഗ്രസ് നേതാക്കൾ എന്നിവരുടെ നേതൃത്വത്തിലായിരിക്കും മാർച്ച് നടത്തുകയെന്നും യു ബി ടി നേതാവ് പറഞ്ഞു.

എൻസിപി, എംഎൻഎസ് നേതാക്കളും തിരഞ്ഞെടുപ്പ് കമ്മീഷന്റെ നിഷ്ക്രിയത്വത്തെ വിമർശിച്ചു. ഈ വിഷയത്തിൽ തിരഞ്ഞെടുപ്പ് കമ്മീഷൻ തുടരുന്ന മൗനത്തെ എൻസിപി നേതാവ് ജയന്ത് പാട്ടീൽ വിമർശിച്ചു. "വ്യാജ വോട്ടർമാരെ നീക്കം ചെയ്യാൻ എന്ത് നടപടികളാണ് സ്വീകരിക്കുന്നതെന്ന് കമ്മീഷൻ വ്യക്തമാക്കണം. പല വിലാസങ്ങളും തെറ്റാണ്, എന്നിട്ടും ഒരു നടപടിയും സ്വീകരിച്ചിട്ടില്ല. ജനാധിപത്യത്തിൽ വിശ്വസിക്കുന്ന മഹാരാഷ്ട്രയിലെ ജനങ്ങൾ ഈ പ്രതിഷേധത്തിൽ പങ്കുചേരണം," പാട്ടീൽ പറഞ്ഞു. വോട്ടർ പട്ടികയിലെ പൊരുത്തക്കേടുകൾ സംബന്ധിച്ച് പൗരന്മാർക്കിടയിൽ വ്യാപകമായ അവിശ്വാസം എംഎൻഎസ് നേതാവ് ബാല നന്ദ്ഗോൺകറും ഉയർത്തിക്കാട്ടി.

നിയമസഭാംഗങ്ങൾ പോലും ഈ വിഷയങ്ങളെക്കുറിച്ച് സംസാരിച്ചിട്ടുണ്ട്. ഞങ്ങൾ പരാതി സമർപ്പിച്ചതിനുശേഷം, തിരഞ്ഞെടുപ്പ് കമ്മീഷൻ ജില്ലാ കളക്ടർമാരോട് അന്വേഷിക്കാൻ നിർദ്ദേശിച്ചു, ഇത് പൊരുത്തക്കേടുകൾ നിലനിൽക്കുന്നുണ്ടെന്ന് സ്ഥിരീകരിക്കുന്നു. എന്നാൽ, ഞങ്ങൾക്ക് ലഭിക്കുന്ന പ്രതികരണങ്ങൾ അവ്യക്തവും തൃപ്തികരമല്ലാത്തതുമാണ്, ”അദ്ദേഹം പറഞ്ഞു.