മിരാ റോഡിലെ ആഡംബര റിസോർട്ടിൽ അശ്ലീല ചിത്ര നിർമ്മാണം:മലയാളി മാധ്യമ പ്രവർത്തകൻ ഡോ. ബിനു വർഗീസിന്റെ ഇടപെടലിനെ തുടർന്ന് എഫ് ഐ ആർ

മുംബൈ:മീര-ഭയന്ദർ പോലിസ് കമ്മീഷണറേറ്റ് പരിധിയിലെ ഒരു ആഡംബര റിസോർട്ടിലാണ് അശ്ലീല വീഡിയോകൾ നിർമിച്ചിരുന്നതായി കണ്ടെത്തിയത്. മിരാ റോഡിലെ പാലി വില്ലേജ് റിസോർട്ട് ആൻഡ് ക്ലബ്ബിലെ കോട്ടേജുകളാണ് വേശ്യാവൃത്തിക്കും അശ്ലീല സിനിമ ചിത്രീകരണത്തിനുമായി വാടകയ്ക്ക് നൽകിയതായി കണ്ടെത്തിയതിനെ തുടർന്ന് പോലിസ് കേസെടുത്തത്.

മാധ്യമ പ്രവർത്തകനും സാമൂഹിക പ്രവർത്തകനുമായ മലയാളി ഡോ. ബിനു വർഗീസിന് ലഭിച്ച രഹസ്യ വിവരത്തിന്റെ അടിസ്ഥാനത്തിൽ, വിവരങ്ങൾ ഉടൻ തന്നെ എംബിവിവിയിലെ സോൺ-1 ലെ ഡിസിപി പ്രകാശ് ഗെയ്ക്‌വാദിന് കൈമാറുക യായിരുന്നു. അതനുസരിച്ച് അദ്ദേഹത്തിന്റെ മൊഴി ഔദ്യോഗികമായി രേഖപ്പെടുത്തിയ ശേഷം കാശിഗാവ് പോലീസ് സ്റ്റേഷനിൽ എഫ്‌ഐആർ രെജിസ്റ്റർ ചെയ്തത്.

പ്രദേശത്തെ ജനപ്രിയ ഫാമിലി റിസോർട്ടിൽ ചിത്രീകരിച്ചതായി പറയപ്പെടുന്ന ഈ അശ്ലീല ചിത്രം പോൺ സൈറ്റിൽ വൈറലായതിനെത്തുടർന്നാണ് ഈ വിവരം പുറത്ത് വന്നത്. ഭാരതീയ ന്യായ സംഹിത, 2023 ലെ സെക്ഷൻ 294(2), 296(a) എന്നിവ പ്രകാരമാണ് എഫ്‌ഐആർ രജിസ്റ്റർ ചെയ്തത്.

"ബാറിന്റെ ഉടമയും മാനേജ്‌മെന്റും ഉത്തരവാദിത്തം ഏറ്റെടുക്കണം, കാരണം ഏകദേശം 8 മുറികളാൽ ചുറ്റപ്പെട്ട പ്രദേശം മുഴുവൻ വാടകയ്ക്ക് നൽകിയിരുന്നു എന്നത് വ്യക്തമാണ്.പൂളിന് സമീപം ഔട്ട്ഡോറിലും അശ്ലീല സിനിമയുടെ ചിത്രീകരണം നടന്നു, പ്രത്യേകിച്ച്, ഷൂട്ടിംഗിനിടെ ഒരു ജീവനക്കാരനോ വെയിറ്ററോ പോലും അവിടെ ഉണ്ടായിരുന്നില്ല. ഇവിടെ ഇതിന് മുമ്പ് എത്ര വീഡിയോകൾ റെക്കോർഡു ചെയ്‌തിട്ടുണ്ടാകാമെന്നത് ലോക്കൽ പോലീസ് സമഗ്രമായി അന്വേഷിക്കണം". ഡോ. ബിനു വർഗീസ് പ്രതികരിച്ചു.

അതേസമയം കുടുംബാംഗങ്ങളു മായി ഇത്തരം റിസോർട്ടുകൾ സന്ദർശിക്കുമ്പോൾജാഗ്രത പാലിക്കണമെന്ന് അധികൃതർ പൊതുജനങ്ങളോട് അഭ്യർത്ഥിച്ചിട്ടുണ്ട്, കാരണം ഗോഡ്ബന്ദർ റോഡിലെ നിരവധി റിസോർട്ടുകൾ സമാനമായ നിയമവിരുദ്ധ പ്രവർത്തനങ്ങൾക്കായി ഉപയോഗിക്കുന്നതായി സംശയിക്കുന്നു.