രണ്ടുവയസ്സുകാരൻ സുരക്ഷിതൻ; താനെ പൊലീസിന്റെ ദ്രുതഗതിയിലുള്ള ഇടപെടൽ വിജയം

താനെ : മുംബ്രയിൽ നിന്ന് തട്ടിക്കൊണ്ടുപോയ രണ്ടുവയസ്സുകാരന്റെ കേസ് താനെ പോലീസ് വിജയകരമായി തെളിയിച്ചു.

കുഞ്ഞിന്റെ നഷ്ടപ്പെട്ട സോക്സും നഗരത്തിലുടനീളം സ്ഥാപിച്ചിരിക്കുന്ന ഏകദേശം 1,600 സിസിടിവി ക്യാമറകളിലെ ദൃശ്യങ്ങളും അന്വേഷണത്തിൽ നിർണായകമായി.

കുഞ്ഞ് അവസാനമായി കണ്ട പ്രദേശത്തിന് സമീപം ലഭിച്ച സോക്സ് കേന്ദ്രീകരിച്ചാണ് പൊലീസ് അന്വേഷണം ആരംഭിച്ചത്.

തുടർന്ന് പരിസര പ്രദേശങ്ങളിലെ സിസിടിവി ദൃശ്യങ്ങൾ ശേഖരിച്ച് പരിശോധിച്ചപ്പോൾ, കുട്ടിയെ ഒരാൾ എടുത്തുകൊണ്ടുപോകുന്ന ദൃശ്യങ്ങൾ ലഭിച്ചു.

ഈ ദൃശ്യങ്ങളുടെ അടിസ്ഥാനത്തിൽ പ്രതിയുടെ സഞ്ചാരപാത കണ്ടെത്തുകയും ഇയാളെ അറസ്റ്റ് ചെയ്യുകയും ചെയ്തു.

കുട്ടിയെ സുരക്ഷിതമായി കണ്ടെത്തിയതായും ആരോഗ്യപ്രശ്നങ്ങളൊന്നുമില്ലെന്നും പൊലീസ് അറിയിച്ചു.

സാങ്കേതികവിദ്യയും സൂക്ഷ്മ അന്വേഷണവും ഫലപ്രദമായി ഉപയോഗിച്ചാൽ കുറ്റകൃത്യങ്ങൾ വേഗത്തിൽ തെളിയിക്കാൻ കഴിയുമെന്ന് ഈ കേസ് തെളിയിക്കുന്നതായി പൊലീസ് വ്യക്തമാക്കി.