അപ്രതീക്ഷിത ജനുവരി മഴ; മുംബൈ–താനെ–പാൽഘർ മേഖലകളിൽ ആരോഗ്യ വകുപ്പ് മുന്നറിയിപ്പ് നൽകി

മുംബൈ: ജനുവരി 1 ന് അപ്രതീക്ഷിതമായി പെയ്ത മഴയെ തുടർന്ന് മുംബൈ, താനെ, പാൽഘർ മേഖലകളിൽ ആരോഗ്യ വകുപ്പ് മുന്നറിയിപ്പ് നൽകി.

സാധാരണയായി വരണ്ട കാലാവസ്ഥ പ്രതീക്ഷിക്കുന്ന ഈ സമയത്ത് ഉണ്ടായ മഴയും കൂടിയ ഈർപ്പവും രോഗങ്ങൾക്ക് അനുകൂലമായ സാഹചര്യം സൃഷ്ടിച്ചുവെന്ന് ആരോഗ്യ വിദഗ്ധർ മുന്നറിയിപ്പ് നൽകി.

വെള്ളക്കെട്ടുകൾ ഇതുവരെ റിപ്പോർട്ട് ചെയ്തിട്ടില്ലെങ്കിലും, വീടുകളുടെ ടെറസുകൾ, നിർമാണ സ്ഥലങ്ങൾ, തുറന്ന പാത്രങ്ങൾ എന്നിവിടങ്ങളിൽ രൂപപ്പെട്ട ചെറിയ വെള്ളക്കെട്ടുകൾ കൊതുകുകളുടെ വർധനയ്ക്ക് വഴിയൊരുക്കുന്നതായി ഡോക്ടർമാർ പറയുന്നു.

ഇതോടെ ഡെങ്കിപ്പനി, മലേറിയ, ചിക്കൻഗുനിയ പോലുള്ള കൊതുകുജന്യ രോഗങ്ങൾ പടരാനുള്ള സാധ്യത വർധിച്ചിരിക്കുകയാണ്.

അതേസമയം, കാലാവസ്ഥയിലെ പെട്ടെന്നുള്ള മാറ്റം മൂലം ചുമ, ജലദോഷം, തൊണ്ടവേദന, ശ്വാസകോശ സംബന്ധമായ അസുഖങ്ങൾ എന്നിവയും കൂടുതലായി റിപ്പോർട്ട് ചെയ്യപ്പെടുന്നു.

ഈർപ്പമുള്ള അന്തരീക്ഷവും താപനിലയിലെ വ്യത്യാസവും വായു മലിനീകരണവും ചേർന്നതോടെ ആസ്ത്മയും അലർജിയും ഉള്ളവർക്കിടയിൽ ആരോഗ്യ പ്രശ്നങ്ങൾ കൂടുതൽ രൂക്ഷമാകുന്നതായും ഡോക്ടർമാർ ചൂണ്ടിക്കാട്ടുന്നു. 

വീടുകളിലും പരിസരങ്ങളിലും വെള്ളം കെട്ടിനിൽക്കാൻ ഇടവരുത്തരുതെന്നും, വൃത്തിയിലും വ്യക്തിഗത ആരോഗ്യ പരിപാലനത്തിലും പ്രത്യേകം ശ്രദ്ധിക്കണമെന്നും ആരോഗ്യ വകുപ്പ് ജനങ്ങളോട് ആവശ്യപ്പെട്ടു.

പനി, ശരീരവേദന, അതിയായ ക്ഷീണം തുടങ്ങിയ ലക്ഷണങ്ങൾ കണ്ടാൽ ചികിത്സ വൈകിക്കരുതെന്നും, കുട്ടികളും വയോധികരും ദീർഘകാല രോഗങ്ങളുള്ളവരും കൂടുതൽ സൂക്ഷ്മത പാലിക്കണമെന്നും ആരോഗ്യ വകുപ്പ് നിർദ്ദേശം നൽകി.