മധ്യപ്രദേശില്‍ ട്രാക്ടര്‍ ട്രോളി കുളത്തിലേക്ക് മറിഞ്ഞ് 8 കുട്ടികള്‍ ഉള്‍പ്പെടെ 13 മരണം

വ്യാഴാഴ്ച വൈകുന്നേരം നാല് മണിയോടെയാണ് സംഭവം. വിഗ്രഹ നിമജ്ജനത്തിനായി കുളത്തിന് സമീപമുള്ള താല്‍ക്കാലിക പാലത്തില്‍ നിര്‍ത്തിയിട്ടിരുന്ന ട്രാക്ടര്‍-ട്രോളി കുളത്തിലേക്ക് മറിയുകയായിരുന്നു. ട്രാളിയിലുണ്ടായിരുന്ന എല്ലാവരും വെള്ളത്തില്‍ വീണു

author-image
Biju
New Update
tractor

ഭോപ്പാല്‍: മധ്യപ്രദേശ് സംസ്ഥാനത്തെ ഖണ്ഡ്വ ജില്ലയില്‍ ട്രാക്ടര്‍ ട്രോളി കുളത്തിലേക്ക് മറിഞ്ഞ് 8 കുട്ടികള്‍ ഉള്‍പ്പെടെ 13 പേര്‍ മരിച്ചു. പാണ്ഡന മേഖലയിലാണ് അപകടം നടന്നതെന്ന് പൊലീസ് ഉദ്യോഗസ്ഥര്‍ അറിയിച്ചു. ദുര്‍ഗാദേവി വിഗ്രഹങ്ങള്‍ നിമജ്ജനം ചെയ്യാന്‍ പോയവരാണ് അപകടത്തില്‍പെട്ടത്.

നിമജ്ജനത്തിനായി വിവിധ ഗ്രാമങ്ങളില്‍ നിന്ന് ദുര്‍ഗാ വിഗ്രഹങ്ങളുമായി പോവുകയായിരുന്ന ട്രാക്ടറിലാണ് ഭക്തരുണ്ടായിരുന്നതെന്ന് പൊലീസ് വൃത്തങ്ങള്‍ പറഞ്ഞു. വ്യാഴാഴ്ച വൈകുന്നേരം നാല് മണിയോടെയാണ് സംഭവം. വിഗ്രഹ നിമജ്ജനത്തിനായി കുളത്തിന് സമീപമുള്ള താല്‍ക്കാലിക പാലത്തില്‍ നിര്‍ത്തിയിട്ടിരുന്ന ട്രാക്ടര്‍-ട്രോളി കുളത്തിലേക്ക് മറിയുകയായിരുന്നു. ട്രാളിയിലുണ്ടായിരുന്ന എല്ലാവരും വെള്ളത്തില്‍ വീണു.

സംസ്ഥാന ദുരന്ത നിവാരണ സേനയുടെയും (എസ് ഡി ആര്‍ എഫ്.) പ്രാദേശിക മുങ്ങല്‍ വിദഗ്ധരുടെയും സഹായത്തോടെ രാത്രി എട്ട് മണി വരെ 13 മൃതദേഹങ്ങള്‍ കണ്ടെടുത്തിട്ടുണ്ട്. തിരച്ചിലും രക്ഷാപ്രവര്‍ത്തനവും തുടരുകയാണ്. ട്രാക്ടര്‍ ട്രോളി മറിഞ്ഞ സ്ഥലത്ത് ഏകദേശം 50 അടിയോളം വെള്ളമുണ്ടായിരുന്നു എന്ന് ദൃക്സാക്ഷി പ്രദീപ് ജഗധന്നെ അറിയിച്ചു.

അധിക എസ് ഡി ആര്‍ എഫ്. ടീമിനെ സംഭവസ്ഥലത്തേക്ക് അയച്ചിട്ടുണ്ട്. അഞ്ചോ ആറോ ഭക്തര്‍ രക്ഷപ്പെട്ടതായാണ് അറിയാന്‍ കഴിഞ്ഞതെന്നും, അപകടത്തെക്കുറിച്ച് അന്വേഷണം ആരംഭിച്ചതായും അധികൃതര്‍ കൂട്ടിച്ചേര്‍ത്തു.

madhyapradesh