കേരളത്തില്‍ നൈറ്റ് ലൈഫ് ആസ്വദിച്ച് ധോണി

തിരുവനന്തപുരം:  സൂപ്പര്‍താരം വിരാട് കോലിക്ക് മുന്‍ ഇന്ത്യന്‍ ക്യാപ്റ്റന്‍ എം.എസ്.ധോണി അത്താഴവിരുന്നൊരുക്കിയത് കഴിഞ്ഞദിവസം വാര്‍ത്തകളില്‍ നിറഞ്ഞിരുന്നു. ദക്ഷിണാഫ്രിക്കയ്ക്കെതിരായ ഏകദിന പരമ്പരയിലെ ആദ്യ മത്സരത്തിനായി റാഞ്ചിയിലെത്തിയ കോലിക്ക് ധോണി തന്റെ വീട്ടിലാണ് വിരുന്നൊരുക്കിയത്. അത്താഴത്തിനു ശേഷം തന്റെ സ്വന്തം കാറില്‍ കോലിയെ തിരികെ ഹോട്ടലിലേക്കു കൊണ്ടുപോകുന്ന ധോണിയുടെ ചിത്രം സമൂഹമാധ്യമങ്ങളില്‍ വൈറലാകുകയും ചെയ്തു. ഇന്ത്യന്‍ താരം ഋഷഭ് പന്തും വിരുന്നില്‍ പങ്കെടുത്തിരുന്നു.

എന്നാല്‍ മറ്റൊരു ഇന്ത്യന്‍ താരത്തിന്റെ 'അതിഥിസല്‍ക്കാരവും' സമൂഹമാധ്യമങ്ങളില്‍ വൈറലാണ്. മറ്റാരുമല്ല, ചെന്നൈ സൂപ്പര്‍ കിങ്‌സില്‍ എം.എസ്.ധോണിയുടെ സഹതാരവും മലയാളിയുമായ സഞ്ജു സാംസനാണ് ആ 'ആതിഥേയന്‍'. പക്ഷേ നിര്‍മിതബുദ്ധിയുടെ (എഐ) സഹായത്തോടെയുള്ള ചിത്രങ്ങളാണ് ഇതെന്നു മാത്രം.

എം.എസ്.ധോണിക്കും ചെന്നൈ സൂപ്പര്‍ കിങ്‌സ് ക്യാപ്റ്റന്‍ ഋതുരാജ് ഗെയ്ക്വാദിനുമാണ് സഞ്ജു'വിരുന്ന്' ഒരുക്കിയത്. 'ടീം സാംസണ്‍' എന്ന ഇന്‍സ്റ്റഗ്രാം പേജില്‍ വന്ന പോസ്റ്റിനു താഴെ സഞ്ജു സാംസണ്‍ തന്നെ കമന്റുമായി എത്തിയതോടെയാണ് ചിത്രങ്ങള്‍ വൈറലായത്. പിന്നാലെ ചെന്നൈ സൂപ്പര്‍ കിങ്‌സിന്റെ ഉള്‍പ്പെടെ പേജുകളില്‍ ഇതു പങ്കുവയ്ക്കുകയും ചെയ്തു.

കേരളത്തിലെത്തിയ ധോണിക്കും ഗെയ്ക്വാദിനും നാട്ടിലെ സ്ഥലങ്ങളും ഭക്ഷണങ്ങളും സഞ്ജു പരിചയപ്പെടുത്തുന്ന രീതിയിലാണ് ചിത്രങ്ങള്‍. മുണ്ടുടുത്ത് രാത്രിയില്‍ നഗരത്തിലൂടെ നടക്കുന്ന ധോണിയെയും കുളത്തില്‍ മീന്‍ പിടിക്കുന്ന ധോണിയെയുമെല്ലാം ചിത്രങ്ങളില്‍ കാണാം. ഊണും ചായയും പഴംപൊരിയുമെല്ലാം ധോണിക്കും ഗെയ്ക്വാദിനും സഞ്ജു വാങ്ങിനല്‍കുന്നു.

ആകെ ഏഴു ചിത്രങ്ങളാണുള്ളത്. ദൈവത്തിന്റെ സ്വന്തം നാട്ടില്‍ തലയ്ക്കും ഋതുവിനും സഞ്ജു ചേട്ടന്‍ ആതിഥേയനായപ്പോള്‍ എന്ന കുറിപ്പോടെയാണ് പോസ്റ്റ്. അവരെ ഉടന്‍ കേരളത്തില്‍ കൊണ്ടുവരാനായി കാത്തിരിക്കുന്നു എന്നായിരുന്നു ഇതിനു സഞ്ജുവിന്റെ കമന്റ്. കമന്റിന്റെ സ്‌ക്രീന്‍ഷോട്ട് സഹിതമാണ് സിഎസ്‌കെ പോസ്റ്റ് പങ്കുവച്ചത്.