അല്ലുവിന് കുരുക്ക് മുറുകുന്നു, സെക്യൂരിറ്റി മാനേജര്‍ കസ്റ്റഡില്‍

ഹൈദരാബാദ്: പുഷ്പ 2 പ്രീമിയര്‍ പ്രദര്‍ശനത്തിനിടെ ഹൈദരാബാദ് സന്ധ്യ തിയേറ്ററില്‍ യുവതി കൊല്ലപ്പെട്ട സംഭവത്തില്‍ അല്ലു അര്‍ജുന്റെ ചോദ്യം ചെയ്യല്‍ പൂര്‍ത്തിയായി. ഇതേ കേസില്‍ അല്ലുവിന്റെ സ്വകാര്യ സെക്യൂരിറ്റി മാനേജര്‍ കസ്റ്റഡിലായിട്ടുണ്ട്. ഹൈദരാബാദ് സ്വദേശി ആന്റണി ജോണിനെയാണ് ഹൈദരാബാദ് പൊലീസ് കസ്റ്റഡിയില്‍ എടുത്തത്. നാട്ടുകാരെ കൈകാര്യം ചെയ്തതിന് ആന്റണിയെയും പ്രൈവറ്റ് സെക്യൂരിറ്റി ടീമിലെ മറ്റ് അംഗങ്ങളെയും കേസില്‍ പ്രതി ചേര്‍ത്തിരുന്നു. കൂടാതെ അര്‍ജുന്റെ കേസ് വാദിക്കുന്ന നിയമ സംഘം സന്ധ്യ തിയേറ്റര്‍ സന്ദര്‍ശിച്ചു. അതേ സമയം അല്ലു അര്‍ജുനെ ചോദ്യം ചെയ്ത സമയം  തന്നെ സന്ധ്യ തിയേറ്ററില്‍ നടന്ന അപകടത്തിന്റെ ഞെട്ടിക്കുന്ന ദൃശ്യം ഹൈദരാബാദ് പൊലീസ് പുറത്തുവിട്ടു. നവംബര്‍ 4 ന് രാത്രി നടന്ന തിക്കിലും തിരിക്കിലും മരിച്ച രേവതിയെ ബൗണ്‍സര്‍മാര്‍ തൂക്കിയെടുത്ത് പുറത്തേക്ക് കൊണ്ടുവരുന്ന ദൃശ്യങ്ങള്‍ സിസിടിവിയിലുണ്ട്. വടികള്‍ ഉപയോഗിച്ച് ആളുകളെ സ്വകാര്യ സെക്യൂരിറ്റി സംഘം തല്ലുന്നതും സിസിടിവി ദൃശ്യങ്ങളിലുണ്ട്. ബൗണ്‍സര്‍മാര്‍ക്ക് ഒപ്പം ചില നാട്ടുകാരും ഇതില്‍ ഉള്‍പ്പെട്ടുവെന്നാണ് വിവരം.അതേസമയം ചോദ്യം ചെയ്യലില്‍ അല്ലു മൗനം പാലിക്കുകയായിരുന്നു . അനുമതി നിഷേധിച്ചിട്ടും റോഡ് ഷോ നടത്തിക്കൊണ്ട് തിയേറ്ററിലേക്ക് എത്തിയത് എന്തിനെന്ന് പൊലീസ് അല്ലു അര്‍ജുനോട് ചോദിച്ചു. സ്വകാര്യ സുരക്ഷാ സംഘം ജനങ്ങളെ മര്‍ദ്ദിച്ചതില്‍ ഇടപെടാതിരുന്നത് എന്തുകൊണ്ട് എന്നായിരുന്നു പൊലീസിന്റെ മറ്റൊരു ചോദ്യം. ഇവയോട് അല്ലു ഒന്നും പ്രതികരിച്ചില്ല. നേരത്തെ പൊലീസ് സംഘം പുറത്തുവിട്ട, സന്ധ്യ തിയേറ്ററില്‍ നിന്നുള്ള 10 മിനിറ്റ് വീഡിയോയും ചോദ്യംചെയ്യലിനിടെ അല്ലു അര്‍ജുന് മുന്നില്‍ പ്രദര്‍ശിപ്പിച്ചു. എപ്പോഴാണ് സ്ത്രീയുടെ മരണത്തെക്കുറിച്ച് അറിഞ്ഞതെന്നും പൊലീസ് അല്ലുവിനോട് ചോദിച്ചു. പരസ്പര വിരുദ്ധ പ്രസ്താവനകളല്ലേ മാധ്യമങ്ങള്‍ക്ക് മുന്നില്‍ നടത്തിയതെന്നും പൊലീസ് അല്ലുവിനോട് ആരാഞ്ഞു. എന്നാല്‍ ഇതിനൊന്നും മറുപടി പറയാതെയാണ് അല്ലു അര്‍ജുന്‍ ഉദ്യോഗസ്ഥര്‍ക്ക് മുന്നില്‍ ഇരുന്നത്. ഡിസിപിയും എസിപിയും നേതൃത്വം നല്‍കുന്ന നാലംഗ പൊലീസ് സംഘമാണ് അല്ലുവിനെ ചോദ്യം ചെയ്തത്.