ഛഗൻ ഭുജ്ബൽ ഇന്ന് മന്ത്രിയായി സത്യപ്രതിജ്ഞ ചെയ്യും

മുംബൈ:മഹാരാഷ്ട്ര രാഷ്ട്രീയത്തിലെ ഒരു പ്രധാന നേതാവായ നാഷണലിസ്റ്റ് കോൺഗ്രസ് പാർട്ടി-അജിത് പവാർ (എൻസിപി-എപി) വിഭാഗത്തിൽ നിന്നുള്ള ഛഗൻ ഭുജ്ബൽ മെയ് 20 ചൊവ്വാഴ്ച്ച മന്ത്രിയായി സത്യപ്രതിജ്ഞ ചെയ്യും. രാവിലെ 10 മണിക്ക് മുംബൈയിലെ രാജ്ഭവനിൽ സത്യപ്രതിജ്ഞാ ചടങ്ങ് നടക്കുമെന്ന് റിപ്പോർട്ടുകളുണ്ട്. ഭക്ഷ്യ-സിവിൽ സപ്ലൈസ് വകുപ്പ് വഹിച്ചിരുന്ന ധനഞ്ജയ് മുണ്ടെ രാജിവച്ചതിനെത്തുടർന്ന് അഭ്യൂഹങ്ങൾക്കിടെയാണ് ഭുജ്ബലിന്റെ നിയമനം. മഹായുതി സഖ്യ സർക്കാരിൽ അജിത് പവാറിന്റെ അടുത്ത അനുയായി ആയാണ് ഭുജ്ബലിനെ കാണുന്നത്. ദേവേന്ദ്ര ഫഡ്‌നാവിസിന്റെ നേതൃത്വത്തിലുള്ള മഹാരാഷ്ട്ര സർക്കാരിൽ നിന്നോ എൻസിപിയിൽ നിന്നോ ഇതുവരെ ഔദ്യോഗിക സ്ഥിരീകരണം ലഭിച്ചിട്ടില്ലെങ്കിലും, മന്ത്രിസഭയിലേക്കുള്ള ഭുജ്ബലിന്റെ തിരിച്ചുവരവ് വ്യാപകമായി പ്രതീക്ഷിക്കപ്പെട്ടിരുന്നു. ഇത് യാഥാർഥ്യമായാൽ മുതിർന്ന നേതാവിന്റെ രാഷ്ട്രീയ തിരിച്ചുവരവായിരിക്കും ഇത്.