/kalakaumudi/media/agency_attachments/zz0aZgq8g5bK7UEc9Bb2.png)
/kalakaumudi/media/member_avatars/2025/01/24/2025-01-24t111056647z-bijuks.png )
/kalakaumudi/media/media_files/2025/11/25/assam-2025-11-25-20-16-53.jpg)
ഗുവാഹത്തി: പ്രശസ്ത ഗായകന് സുബിന് ഗാര്ഗിന്റെ മരണം കൊലപാതകമെന്ന് അസം മുഖ്യമന്ത്രി ഹിമന്ത ബിശ്വ ശര്മ. നിയമസഭയിലാണ് ഹിമന്ത ബിശ്വ ശര്മ്മ ഇക്കാര്യം പറഞ്ഞത്. ഒരു കൊലപാതകിയും അഞ്ച് സഹായികളും ഉണ്ടെന്നും ഇവരെ നിയമത്തിന് മുന്നില് കൊണ്ടുവരുമെന്നും ഹിമന്ത ബിശ്വ ശര്മ പറഞ്ഞു.
'വളരെ എളുപ്പത്തില് നടത്തിയ കൊലപാതകമാണിത്. ഒരാള് സുബിന് ഗാര്ഗിനെ കൊലപ്പെടുത്തുകയും മറ്റുള്ളവര് അതിന് സഹായിക്കുകയും ചെയ്തു. ഇത് ആസൂത്രിതമായി നടപ്പാക്കിയ കൊലപാതകമാണെന്ന് അസം പൊലീസിന് വ്യക്തമായിട്ടുണ്ട്.'- ഹിമന്ത ബിശ്വ ശര്മ പറഞ്ഞു.
നോര്ത്ത് ഈസ്റ്റ് ഇന്ത്യ ഫെസ്റ്റിവലില് പങ്കെടുക്കാനായി സിംഗപ്പൂരില് എത്തിയ സുബീന് ഗാര്ഗ് സെപ്തംബര് 19നാണ് മരിച്ചത്. സ്കൂബ ഡൈവിങ്ങിനിടെ മരിച്ചതാണ് എന്നായിരുന്നു പ്രാഥമിക വിലയിരുത്തല് എന്നാല് ലാറസ് ദ്വീപില് നീന്തുന്നതിനിടെ ഗായകന് അപസ്മാരം വന്നുവെന്ന് ഭാര്യ ഗരിമ സൈകിയ വെളിപ്പെടുത്തുകയും സ്കൂബ ഡൈവിങ് സംബന്ധിച്ച വാദങ്ങള് തള്ളുകയും ചെയ്തു. പിന്നാലെ അന്വേഷണത്തിനായി പ്രത്യേക സംഘത്തെ അസം സര്ക്കാര് രൂപീകരിച്ചു. അന്വേഷണത്തില് അദ്ദേഹത്തിന്റെ ബന്ധുവും അസം പൊലീസ് സര്വീസില് ഡെപ്യൂട്ടി സൂപ്രണ്ടുമായ സന്ദീപന് ഗര്ഗ്, ഡ്രമ്മര് ശേഖര്, മാനേജര് സിദ്ധാര്ത്ഥ ശര്മ എന്നിവരടക്കം അഞ്ച് പേര് അറസ്റ്റിലായിരുന്നു.
അസം സ്വദേശിയായ സുബിന് ഗാര്ഗ് ഹിന്ദി, ബംഗാളി, അസാമീസ് ഭാഷകളിലെ സിനിമകളില് പാടിയിട്ടുണ്ട്. ഇമ്രാന് ഹാഷ്മി കേന്ദ്ര കഥാപാത്രമായി എത്തിയ ഗാങ്സ്റ്റര് എന്ന ചിത്രത്തില് സുബിന് ആലപിച്ച 'യാ അലി' എന്ന ഗാനം ഏറെ ശ്രദ്ധേയമായിരുന്നു. ഗാങ്സ്റ്ററിലെ യാ അലിക്ക് പുറമേ ക്രിഷ് 3-ലെ ദില് തൂ ഹി ബതാ, ഒ ബോന്ദൂ രേ, ഹോരി നാം തുടങ്ങിയവയും ശ്രദ്ധേയമായ ഗാനങ്ങളാണ്. കാഞ്ചന്ജുംഗ, മിഷന് ചൈന, ദിനബന്ധു, മോന് ജൈ തുടങ്ങിയ സിനിമകളിലും അഭിനയിച്ചിട്ടുണ്ട്.