ഹിമാചൽ പ്രദേശിൽ മേഘ വിസ്ഫോടനം; രണ്ടുപേർ മരിച്ചു, നിരവധിപേരെ കാണാതായി

ഹിമാചൽ : ഹിമാചൽ പ്രദേശിൽ ഉണ്ടായ മേഘവിസ്ഫോടനത്തിലും വെള്ളപ്പൊക്കത്തിലും കനത്ത മഴയിലും രണ്ട് പേർ മരിക്കുകയും 20 ഓളം പേർ ഒഴുകിപ്പോവുകയും ചെയ്തു .തുടർന്ന് കാംഗ്ര ജില്ലയിലെ മനുനി പുഴയിൽ നിന്ന് രണ്ട് മൃതദേഹങ്ങൾ കണ്ടെടുത്തു. ഖനിയാര മനുനി നദിയിൽ ജലനിരപ്പ് ഉയർന്നതിനെ തുടർന്ന് ഇന്ദിരാ പ്രിയദർശിനി ജലവൈദ്യുത പദ്ധതി സ്ഥലത്തിനടുത്തുള്ള ഒരു ലേബർ കോളനിയിൽ തമ്പടിച്ചിരുന്ന 20 ഓളം തൊഴിലാളികൾ ഒഴുക്കിൽപ്പെട്ടതായി റിപ്പോർട്ടുകൾ പുറത്തുവന്നു.

മഴ കാരണം പദ്ധതി പ്രവർത്തനങ്ങൾ നിർത്തിവച്ചിരിക്കുകയായിരുന്നുവെന്നും തൊഴിലാളികൾ സ്ഥലത്തിനടുത്തുള്ള താൽക്കാലിക ഷെൽട്ടറുകളിൽ വിശ്രമിക്കുകയായിരുന്നുവെന്നും  ഉദ്യോഗസ്ഥർ പറഞ്ഞു.

കുളു ജില്ലയിലെ പല ഭാഗങ്ങളിലും മേഘവിസ്ഫോടനത്തെ തുടർന്ന് ഉണ്ടായ വെള്ളപ്പൊക്കത്തിൽ മൂന്ന് പേരെ കാണാതായി. നിരവധി വീടുകൾ, ഒരു സ്കൂൾ കെട്ടിടം, കടകൾ, ബന്ധിപ്പിക്കുന്ന റോഡുകൾ, ചെറിയ പാലങ്ങൾ എന്നിവയ്ക്ക് നാശനഷ്ടമുണ്ടായതായി അധികൃതർ പറഞ്ഞു.