ഡല്‍ഹിയില്‍ നവംബറിലെ ഏറ്റവും തണുപ്പുള്ള ദിവസം രേഖപ്പെടുത്തി

ഡല്‍ഹിയില്‍ നവംബറിലെ ഏറ്റവും തണുപ്പുള്ള ദിവസം രേഖപ്പെടുത്തി

ന്യൂഡല്‍ഹി: ശക്തമായ കാറ്റ് ഡല്‍ഹിയിലെ വായുവിന്റെ ഗുണനിലവാരം നേരിയ തോതില്‍ മെച്ചപ്പെടുത്തിയെങ്കിലും, തുടര്‍ച്ചയായ നാലാം ദിവസവും 'വളരെ മോശം' വിഭാഗത്തില്‍ തന്നെ തുടര്‍ന്നു. തിങ്കളാഴ്ച രാവിലെ 359 ആണ് എയര്‍ ക്വാളിറ്റി ഇന്‍ഡക്‌സ് രേഖപ്പെടുത്തിയത്.

ദേശീയ തലസ്ഥാനം കട്ടിയുള്ള പുകമഞ്ഞില്‍ മൂടിയിരിക്കുകയാണ്. തിങ്കളാഴ്ചത്തെ എക്യുഐ ഞായറാഴ്ചത്തെ 377-ല്‍ നിന്നും ശനിയാഴ്ചത്തെ 386-ല്‍ നിന്നും നേരിയ പുരോഗതിയാണ് കാണിച്ചത്.

സെന്‍ട്രല്‍ പൊല്യൂഷന്‍ കണ്‍ട്രോള്‍ ബോര്‍ഡിന്റെ 'സമീര്‍' ആപ്പില്‍ നിന്നുള്ള ഡാറ്റ അനുസരിച്ച്, ദേശീയ തലസ്ഥാനത്തെ 39 നിരീക്ഷണ കേന്ദ്രങ്ങളില്‍ ആറെണ്ണത്തിലെ വായു ഗുണനിലവാര സൂചിക 'അതീവ ഗുരുതരം' വിഭാഗത്തിലായിരുന്നു.

ബവാന 427 എക്യുഐയുമായി ഏറ്റവും മോശം നില രേഖപ്പെടുത്തി. ഡിടിയു (402), ജഹാംഗീര്‍പുരി (406), നരേല (406), രോഹിണി (404), വസീര്‍പൂര്‍ (402) എന്നീ പ്രദേശങ്ങളിലെ വായു ഗുണനിലവാരവും മോശമായി.

സിപിസിബി മാനദണ്ഡങ്ങള്‍ അനുസരിച്ച്, 0 നും 50 നും ഇടയിലുള്ള എക്യുഐ 'നല്ലത്', 51 നും 100 നും ഇടയിലുള്ളത് 'തൃപ്തികരം', 101 നും 200 നും ഇടയിലുള്ളത് 'മിതമായത്', 201 നും 300 നും ഇടയിലുള്ളത് 'മോശം', 301 നും 400 നും ഇടയിലുള്ളത് 'വളരെ മോശം', 401 നും 500 നും ഇടയിലുള്ളത് 'അതീവ ഗുരുതരം' എന്നിങ്ങനെയാണ് കണക്കാക്കുന്നത്.

ലോധി റോഡ് (226), എന്‍എസ്‌ഐടി ദ്വാരക (225) എന്നിവിടങ്ങളിലാണ് ഏറ്റവും കുറഞ്ഞ മലിനീകരണ തോത് രേഖപ്പെടുത്തിയത്. ഇവിടെ എക്യുഐ 'മോശം' വിഭാഗത്തിലാണ്.

ദേശീയ തലസ്ഥാന മേഖലയില്‍, 395 എക്യുഐ രേഖപ്പെടുത്തിയ ഗാസിയാബാദ് ആണ് ഏറ്റവും കൂടുതല്‍ മലിനീകരണമുള്ള നഗരം. ഇത് 'വളരെ മോശം' വിഭാഗത്തിലാണ് വരുന്നത്. ഗ്രേറ്റര്‍ നോയിഡ (386), നോയിഡ (361) എന്നിവിടങ്ങളിലും 'വളരെ മോശം' വായു ഗുണനിലവാരമാണ് രേഖപ്പെടുത്തിയത്.

ഫരീദാബാദില്‍ 'മോശം' വിഭാഗത്തില്‍ വരുന്ന 247 ആണ് ഏറ്റവും കുറഞ്ഞ എക്യുഐ. തൊട്ടുപിന്നാലെ ഗുഡ്ഗാവും (260) 'മോശം' വായു ഗുണനിലവാരം രേഖപ്പെടുത്തി.

അതേസമയം, ഞായറാഴ്ച ഡല്‍ഹിയില്‍ 9 ഡിഗ്രി സെല്‍ഷ്യസ് കുറഞ്ഞ താപനില രേഖപ്പെടുത്തി, ഇത് സാധാരണയേക്കാള്‍ 4.5 നോച്ച് കുറവാണ്. ഇതോടെ ദേശീയ തലസ്ഥാനത്ത് മൂന്ന് വര്‍ഷത്തിനിടെ നവംബറിലെ ഏറ്റവും തണുപ്പുള്ള ദിവസമായി ഇത് മാറി.

ഡല്‍ഹിയില്‍ 2022 നവംബര്‍ 29-ന് 7.3 ഡിഗ്രി സെല്‍ഷ്യസ് രേഖപ്പെടുത്തിയതിന് ശേഷം ഈ മാസത്തെ ഏറ്റവും കുറഞ്ഞ താപനിലയാണിത്. 2023-ല്‍ നവംബര്‍ 23-ന് 9.2 ഡിഗ്രിയും 2024-ല്‍ നവംബര്‍ 29-ന് 9.5 ഡിഗ്രിയുമായിരുന്നു ഏറ്റവും കുറഞ്ഞ താപനില.

തിങ്കളാഴ്ച നേരിയ മൂടല്‍മഞ്ഞിന് സാധ്യതയുണ്ടെന്ന് ഇന്ത്യ കാലാവസ്ഥാ വകുപ്പ് പ്രവചിച്ചു. കൂടിയതും കുറഞ്ഞതുമായ താപനില യഥാക്രമം 25-ഉം 9-ഉം ഡിഗ്രി സെല്‍ഷ്യസില്‍ എത്താനാണ് സാധ്യത.