'റിസിന്‍' വിഷം ഉപയോഗിച്ച് ഭീകരാക്രമണത്തിന് കോപ്പുകൂട്ടി: ഡോക്ടറടക്കം മൂന്ന് ഐഎസ് ഭീകരര്‍ പിടിയില്‍

ഗാന്ധിനഗര്‍: ഭീകരാക്രമണത്തിന് കോപ്പുകൂട്ടിയ മൂന്ന് പേര്‍ അറസ്റ്റില്‍. ഗുജറാത്ത് ഭീകരവിരുദ്ധ സ്‌ക്വാഡാണ് രാജ്യവിരുദ്ധ പ്രവര്‍ത്തനത്തിന് ഗൂഢാലോചന നടത്തുകയും അതിന് വേണ്ടി നീക്കങ്ങളും ചെയ്ത മൂന്ന് ഇസ്ലാമിക് സ്റ്റേറ്റ് ഭീകരരെ അറസ്റ്റ് ചെയ്തത്. അറസ്റ്റിലായവരില്‍ ഒരു ഡോക്ടറും ഉള്‍പ്പെടുന്നുണ്ട്.

മൂന്ന് പേരും ചേര്‍ന്ന് റിസിന്‍ എന്ന മാരക വിഷവസ്തു തയ്യാറാക്കി അത് ഉപയോഗിച്ചുള്ള ആക്രമണത്തിനായിരുന്നു തയ്യാറെടുത്തത്. അഹമ്മദ് മൊഹിയുദ്ദീന്‍ സെയ്ദ് (35)എന്ന ഡോക്ടറാണ് വിഷവസ്തു തയ്യാറാക്കാന്‍ നേതൃത്വം നല്‍കിയത്. ചൈനയില്‍ നിന്നാണ് ഇയാള്‍ മെഡിക്കല്‍ ബിരുദം നേടിയതെന്നാണ് വിവരം. ഇയാളുടെ സഹായികളായ ആസാദ് സുലൈമാന്‍ ഷെയ്ഖ് (20) കോളേജ് വിദ്യാര്‍ത്ഥിയായ മുഹമ്മദ് സുഹൈല്‍(23) എന്നിവരെയാണ് പിടികൂടിയത്. യുപി സ്വദേശികളാണ് ഇരുവരും.

ഉയര്‍ന്ന വിഷാംശമുള്ള രാസവസ്തുവായ റിസിന്‍ തയ്യാറാക്കുന്ന തിരക്കിലായിരുന്നു ഡോ. അഹമ്മദ് മൊഹിയുദ്ദീന്‍. മൂന്ന് നഗരങ്ങളിലെ തിരക്കേറിയ ഭക്ഷ്യ വിപണികളില്‍ ഇയാള്‍ സര്‍വേ നടത്തിയിരുന്നു. കഴിഞ്ഞ ആറ് മാസത്തിനിടെ ഇയാള്‍ ഡല്‍ഹിയിലെ ആസാദ്പൂര്‍ മണ്ടി, അഹമ്മദാബാദിലെ നരോദ പഴച്ചന്ത, ലഖ്‌നൗവിലെ ആര്‍എസ്എസ് ഓഫീസ് എന്നിവിടങ്ങളില്‍ നിരീക്ഷണം നടത്തിയിരുന്നു. ജനക്കൂട്ടം കൂടുതലുള്ള ഈ സ്ഥലങ്ങള്‍ ആക്രമണത്തിന് സാധ്യതയുള്ള ലക്ഷ്യങ്ങളായി കണക്കാക്കപ്പെട്ടിരുന്നു.

ഒരു വലിയ ഭീകരാക്രമണം നടത്തുന്നതിനായി, അഹമ്മദ് മൊഹിയുദ്ദീന്‍ സയ്യിദ് 'റൈസിന്‍' (റിസിന്‍) എന്ന അത്യധികം മാരകമായ വിഷം തയ്യാറാക്കുകയായിരുന്നു. ഇതിനായി, ഇയാള്‍ ആവശ്യമായ ഗവേഷണം ആരംഭിച്ചു, ഉപകരണങ്ങള്‍, അസംസ്‌കൃത വസ്തുക്കള്‍ എന്നിവ ശേഖരിച്ചു, അത് തയ്യാറാക്കുന്നതിന് ആവശ്യമായ പ്രാരംഭ രാസ സംസ്‌കരണം ആരംഭിച്ചുവെന്ന് ഗുജറാത്ത് എടിഎസ് ഔദ്യോഗിക പ്രസ്താവനയില്‍ പറഞ്ഞു. 

രാസവസ്തുക്കളുടെ ഉറവിടം കണ്ടെത്തുന്നതിനും റിസിന്‍ പരീക്ഷണാത്മകമായി തയ്യാറാക്കാന്‍ തുടങ്ങിയിട്ടുണ്ടോ എന്ന് നിര്‍ണ്ണയിക്കുന്നതിനുമായി എ.ടി.എസും കേന്ദ്ര ഏജന്‍സികളും ഇപ്പോള്‍ പിടിച്ചെടുത്ത വസ്തുക്കളും ഇലക്ട്രോണിക് തെളിവുകളും വിശകലനം ചെയ്യുകയാണ്.