/kalakaumudi/media/agency_attachments/zz0aZgq8g5bK7UEc9Bb2.png)
ബി.ആര്. അംബേദ്കറെക്കുറിച്ചുള്ള ആഭ്യന്തര മന്ത്രി അമിത് ഷായുടെ വിവാദ പരാമര്ശത്തെത്തുടര്ന്നുണ്ടായ പ്രതിഷേധങ്ങള്ക്കിടെ പാര്ലമെന്റില് നാടകീയ സംഭവങ്ങള്. പാര്ലമെന്റ് കവാടത്തില് പ്രതിപക്ഷ പ്രതിഷേധങ്ങള്ക്കിടെ തങ്ങളുടെ രണ്ട് എംപിമാരെ പ്രതിപക്ഷ നേതാവ് രാഹുല് ഗാന്ധി തള്ളിവീഴ്ത്തി പരുക്കേല്പ്പിച്ചുവെന്ന് ബിജെപി ആരോപിച്ചു. ബിജെപി എംപിമാരായ മുകേഷ് രജ്പുത്, പ്രതാപ് സാരംഗി എന്നിവരെ ഡല്ഹിയിലെ റാം മനോഹര് ലോഹ്യ ആശുപത്രിയിലെ തീവ്രപരിചരണ വിഭാഗത്തില് പ്രവേശിപ്പിച്ചു. സംഭവത്തില് രാഹുലിനെതിരെ ബിജെപി പോലീസില് പരാതി നല്കിയിട്ടുണ്ട്. ഇതില് കേസെടുക്കുകയും ചെയ്തിട്ടുണ്ട്.
ബിജെപി എംപിമാര് തന്നെ കൈയേറ്റം ചെയ്തെന്ന് ആരോപിച്ച് കോണ്ഗ്രസ് അധ്യക്ഷന് മല്ലികാര്ജുന് ഖാര്ഗെയും രംഗത്തെത്തി. ബിജെപി എംപിമാര് തന്നെ തള്ളി. താന് നിലത്തുവീണു. ശസ്ത്രക്രിയയ്ക്ക് വിധേയമായ എന്റെ കാല്മുട്ടുകള്ക്ക് പരുക്കേറ്റുവെന്ന് ഖാര്ഗെ ലോക്സഭാ സ്പീക്കര് ഓം ബിര്ളയ്ക്ക് അയച്ച കത്തില് പറഞ്ഞു.
രാഹുല്ഗാന്ധിയുടെ കൈയേറ്റത്തില് ബിജെപി എംപിമാര്ക്ക് ഗുരുതരമായി പരുക്കേറ്റെന്ന് പാര്ലമെന്ററികാര്യ മന്ത്രി കിരണ് റിജിജു ആരോപിച്ചു. 'ഏത് നിയമപ്രകാരമാണ് മറ്റ് എംപിമാരെ ശാരീരികമായി ആക്രമിക്കാന് അദ്ദേഹത്തിന് അധികാരമുള്ളത്?, നിങ്ങള് മറ്റ് എംപിമാരെ തോല്പ്പിക്കാന് കരാട്ടെയും കുങ്ഫുവും പഠിച്ചിട്ടുണ്ടോ?' രാഹുലിനെ പരിഹസിച്ചുകൊണ്ട് റിജിജു ചോദിച്ചു.
ചൊവ്വാഴ്ച രാജ്യസഭയിലെ ചര്ച്ചയില് നടത്തിയ അംബേദ്കറെക്കുറിച്ചുള്ള വിവാദ പരാമര്ശത്തില് അമിത് ഷാ മാപ്പ് പറയണമെന്നും രാജിവെക്കണമെന്നും ആവശ്യപ്പെട്ട് പ്രതിപക്ഷ പാര്ട്ടി എംപിമാര് പാര്ലമെന്റ് കവാടത്തില് പ്ലക്കാര്ഡുകളുയര്ത്തി നടത്തിയ പ്രതിഷേധത്തിനിടെയാണ് സംഘര്ഷമുണ്ടായത്. ബിജെപി എംപിമാര് ഈ കവാടത്തിലൂടെ പ്രവേശിക്കുന്നത് സംബന്ധിച്ചുള്ള തര്ക്കമാണ് സംഘര്ഷത്തിലേക്ക് നയിച്ചത്. പ്രതിപക്ഷ നേതാവ് രാഹുല് ഗാന്ധിയും പ്രിയങ്കയും അടക്കമുള്ള നേതാക്കള് പ്രതിഷേധത്തില് അണിനിരന്നിരുന്നു. കോണിപ്പടിക്ക് സമീപം നില്ക്കുകയായിരുന്ന തന്റെമേലേക്ക് രാഹുല് മറ്റൊരു എംപിയെ തള്ളിയിടുകയായിരുന്നുവെന്ന് പ്രതാപ് സാരംഗി പറഞ്ഞു. എന്നാല് ബിജെപി എംപിമാരാണ് തന്നെ തടയാനും ഭീഷണിപ്പെടുത്താനും ശ്രമിച്ചതെന്ന് രാഹുല് ഗാന്ധി പ്രതികരിച്ചു.
രാഹുല് ഗാന്ധി മോശമായി പെരുമാറിയെന്നും സ്ത്രീത്വത്തെ അപമാനിക്കുന്ന പെരുമാറ്റമായിരുന്നു രാഹുലിന്റേതെന്നും നാഗാലന്ഡില് നിന്നുള്ള വനിതാ എംപിയായ ഫാംഗ് നോന് കൊന്യാക് പരാതി നല്കി. രാജ്യസഭ എംപിമാര്ക്ക് നേരെയുള്ള ആക്രമണം പരിശോധിക്കാമെന്ന് ഉപരാഷ്ട്രപതിയും സഭാധ്യക്ഷനുമായ ജഗദീപ് ധന്കര് ഉറപ്പ് നല്കി. അതേസമയം രാഹുല് ഗാന്ധിയെ പ്രതിരോധിച്ച് പ്രിയങ്ക ഗാന്ധി എംപി രംഗത്ത് വന്നു. രാഹുല് ഗാന്ധിയെ അപമാനിക്കാനുള്ള നീക്കമാണ് നടക്കുന്നത്. ബിജെപി എംപിമാരാണ് രാഹുലിനെ കൈയേറ്റം ചെയ്തതെന്ന് പ്രിയങ്ക പറഞ്ഞു.