പ്രവചനങ്ങളെ കാറ്റിൽപ്പറത്തി മൊത്ത ആഭ്യന്തര ഉൽപാദനത്തിൽ കുതിപ്പ്; രാജ്യത്തിന്റെ ജിഡിപി 7.8%

അമേരിക്കയുടെ താരിഫ് ഭീഷണികൾക്കിടയിലും ഇന്ത്യയുടെ സാമ്പത്തിക വളർച്ച (ജിഡിപി) ഈ സാമ്പത്തിക വർഷത്തിന്റെ ആദ്യ പാദത്തിൽ (ഏപ്രിൽ-ജൂൺ) അപ്രതീക്ഷിത കുതിപ്പ് നടത്തി. 7.8% വളർച്ചയാണ് രാജ്യം കൈവരിച്ചത്. കഴിഞ്ഞ അഞ്ച് പാദങ്ങളിലെ ഏറ്റവും ഉയർന്ന നിരക്കാണിത്. റിസർവ് ബാങ്കിന്റെ 6.5% വളർച്ചാ പ്രവചനത്തെ മറികടക്കുന്നതാണ് ഈ കണക്ക്. കഴിഞ്ഞ വർഷം ഇതേ പാദത്തിൽ ജിഡിപി വളർച്ച 6.7% ആയിരുന്നു. ശരാശരി 6.7% വളർച്ച കൈവരിക്കുമെന്നായിരുന്നു മറ്റ് സാമ്പത്തിക വിദഗ്ധരുടെ അനുമാനം. 2025-26 സാമ്പത്തിക വർഷത്തിലെ ആദ്യ പാദത്തിൽ ജിഡിപി 47.89 ലക്ഷം കോടി രൂപയാണ്. കഴിഞ്ഞ വർഷം ഇത് 44.42 ലക്ഷം കോടി രൂപയായിരുന്നു. 7.8% വളർച്ചയാണ് ഇത് സൂചിപ്പിക്കുന്നത്.
മേഖല തിരിച്ചുള്ള പ്രകടനം

പ്രാഥമിക മേഖല: കൃഷിയും ഖനനവും ഉൾപ്പെടുന്ന ഈ മേഖല 2.8% വാർഷിക വളർച്ച രേഖപ്പെടുത്തി. കൃഷി മാത്രം 3.7% വളർച്ച കൈവരിച്ചു. എന്നാൽ, ഖനന മേഖലയിൽ 3.1% ഇടിവുണ്ടായി.
ദ്വിതീയ മേഖല: ഉൽപാദന രംഗം ഉൾപ്പെടുന്ന ഈ മേഖല 7% വാർഷിക വളർച്ച നേടി. ഉൽപാദന മേഖല മാത്രം 7.7% വളർച്ച രേഖപ്പെടുത്തി.

തൃതീയ മേഖല: സേവന മേഖലയിൽ 9.3% വാർഷിക വളർച്ചയുണ്ടായി. വ്യാപാരം, ഹോട്ടൽ, ഗതാഗതം, വാർത്താവിനിമയം തുടങ്ങിയവ 8.6% വളർന്നു. ധനകാര്യം, റിയൽ എസ്റ്റേറ്റ്, പ്രൊഫഷണൽ സേവനങ്ങൾ എന്നിവ 9.5% വളർച്ച നേടി.
വളർച്ചയ്ക്ക് പിന്നിലെ ഘടകങ്ങൾ

വളർച്ചയ്ക്ക് പിന്നിലെ ഘടകങ്ങൾ
കേന്ദ്രം ചെലവഴിക്കുന്ന തുക 52% വർധിച്ചത് സാമ്പത്തിക വളർച്ചയ്ക്ക് ഒരു പ്രധാന കാരണമായി. നിർമ്മാണം, കൃഷി തുടങ്ങിയ മേഖലകളുടെ മികച്ച പ്രകടനവും ഇതിന് സഹായകമായി. കൂടാതെ, വ്യോമയാന ചരക്ക് ഗതാഗതം, ജിഎസ്ടി പിരിവ്, സ്റ്റീൽ ഉത്പാദനം എന്നിവയിലെല്ലാം വർധനവുണ്ടായി.

മുന്നോട്ടുള്ള വെല്ലുവിളികൾ അമേരിക്കയുടെ പുതിയ താരിഫ് ഇന്ത്യയുടെ സാമ്പത്തിക വളർച്ചയെ എങ്ങനെ ബാധിക്കുമെന്നതാണ് ഇനി നിർണായകം. അമേരിക്കൻ പ്രസിഡന്റ് ട്രംപിന്റെ പുതിയ നയങ്ങൾ പ്രകാരം ഇന്ത്യയിൽ നിന്നുള്ള ഇറക്കുമതിക്ക് 25% താരിഫ് ഏർപ്പെടുത്തിയിരുന്നു. പിന്നീട് ഇത് റഷ്യൻ എണ്ണയുമായി ബന്ധപ്പെട്ട പുതിയ അധിക തീരുവകൾ കൂടി വന്നതോടെ 50% വരെയായി ഉയർന്നു. ഇത് ഇന്ത്യയുടെ സാമ്പത്തിക വളർച്ചയിൽ 30 ബേസിസ് പോയിന്റിന്റെ കുറവുണ്ടാക്കാൻ സാധ്യതയുണ്ടെന്നാണ് വിലയിരുത്തൽ.