പാകിസ്ഥാനെതിരായ പോരാട്ടത്തിനായി സർക്കാർ നിയോഗിച്ചതിൽ സന്തോഷം :പാകിസ്ഥാന്റെ യഥാർത്ഥ മുഖം ലോകത്തിന് മുന്നിൽ തുറന്നുകാട്ടുമെന്നും അസദുദ്ദീൻ ഒവൈസി

ഹൈദരാബാദ്;പാകിസ്ഥാനെതിരായ പോരാട്ടത്തിനായി കേന്ദ്ര സർക്കാർ നിയോഗിച്ച പ്രതിനിധി സംഘത്തിൽ ഉൾപ്പെട്ടതിൽ സന്തോഷം പ്രകടിപ്പിച്ച് ഹൈദരാബാദ് എംപി അസദുദ്ദീൻ ഒവൈസി. "ഞങ്ങൾ ഇന്ത്യൻ സർക്കാരിനെയും നമ്മുടെ രാജ്യത്തെയും പ്രതിനിധീകരിക്കുന്നു. ഞങ്ങൾ മറ്റ് രാജ്യങ്ങളിലേക്ക് പോയി പാകിസ്ഥാൻ കാരണം നമ്മുടെ പെൺമക്കൾ എങ്ങനെ വിധവകളാകുന്നു നമ്മുടെ കുട്ടികൾ എങ്ങനെ അനാഥരാകുന്നു, പാകിസ്ഥാൻ നമ്മുടെ രാജ്യത്തെ എങ്ങനെ അസ്ഥിരപ്പെടുത്താൻ ആഗ്രഹിക്കുന്നു എന്ന് അവരെ ബോധ്യപ്പെടുത്തും, പറയും, ഞാൻ ഉൾപ്പെട്ടിരിക്കുന്ന ഗ്രൂപ്പിനെ നയിക്കുന്നത് എന്റെ അടുത്ത സുഹൃത്ത് എംപി ബൈജയന്ത് ജയ് പാണ്ഡെയാണ്" ഒവൈസി പറഞ്ഞു. പാകിസ്ഥാൻ നമ്മുടെ രാജ്യത്ത് തീവ്രവാദത്തെ പ്രോത്സാഹിപ്പിക്കുന്നു, ഇതിനെക്കുറിച്ച് നമ്മൾ ലോകത്തോട് മുഴുവൻ പറയണം.ഇത് ഏതെങ്കിലും പാർട്ടിയുമായി ബന്ധപ്പെട്ട വിഷയമല്ല. വിദേശത്തേക്ക് പോകുന്നതിന് മുമ്പ് ഞങ്ങൾ ഒരു മീറ്റിംഗും നടത്തും. ഇതൊരു വലിയ ജോലിയാണ്. ഈ ഉത്തരവാദിത്തം നന്നായി നിറവേറ്റാൻ ഞാൻ പരമാവധി ശ്രമിക്കും. പാകിസ്ഥാൻ്റെ യഥാർത്ഥ മുഖം ലോകത്തിന് മുന്നിൽ തുറന്നുകാട്ടും.വിദേശ സർക്കാരുകൾക്ക് മുന്നിൽ പാകിസ്ഥാന്റെ ഉദ്ദേശ്യങ്ങൾ വെളിപ്പെടുത്തും. മുൻ പ്രസിഡന്റ് മുഹമ്മദ് സിയാ-ഉൾ-ഹഖിന്റെ കാലം മുതൽ ഇന്ത്യ പാകിസ്ഥാൻ സ്പോൺസർ ചെയ്യുന്ന ഭീകരതയുടെ ദുരിതം അനുഭവിക്കുകയാണ്. കാണ്ഡഹാർ വിമാന റാഞ്ചൽ, 26/11 മുംബൈ ആക്രമണം, 2001 ലെ പാർലമെന്റ് ആക്രമണം, ഉറി, പത്താൻകോട്ട് സംഭവങ്ങൾ, റിയാസിയിലും പഹൽഗാമിലും വിനോദസഞ്ചാരികളുടെ സമീപകാല കൊലപാതകങ്ങൾ എന്നിവയുൾപ്പെടെ ഈ ചരിത്രത്തെക്കുറിച്ച് നമ്മൾ ലോകത്തെ അറിയിക്കണം. ഇത് മനുഷ്യരാശിക്കുള്ള ഭീഷണിയാണ്. ഒരു ഇസ്ലാമിക രാഷ്ട്രമായി സ്വയം ചിത്രീകരിക്കാനുള്ള പാകിസ്ഥാന്റെ ശ്രമങ്ങളെ വിമർശിച്ച ഒവൈസി, ഇന്ത്യ ഏകദേശം 200 ദശലക്ഷം മുസ്ലീങ്ങളുടെ ആവാസ കേന്ദ്രമാണെന്നും ചൂണ്ടിക്കാട്ടി.