ഇന്‍ഡിഗോ വിമാനത്തില്‍ ചാവേര്‍ ഭീഷണി, എമര്‍ജന്‍സി ലാന്‍ഡിങ്

മുംബൈ: മനുഷ്യ ബോംബ് ഭീഷണി സന്ദേശം ലഭിച്ചതിനെ തുടര്‍ന്ന് കുവൈത്തില്‍ നിന്ന് ഹൈദരാബാദിലേക്ക് പോകുകയായിരുന്ന ഇന്‍ഡിഗോ വിമാനം മുംബൈയിലേക്ക് തിരിച്ചുവിട്ടു. ഹൈദരാബാദ് വിമാനത്താവളത്തില്‍ ലഭിച്ച ഇമെയില്‍ വഴിയുള്ള ഭീഷണി അധികാരികള്‍ വിലയിരുത്തി. ഉദ്യോഗസ്ഥര്‍ സ്ഥിതിഗതികള്‍ വിലയിരുത്തി സുരക്ഷാ സംഘങ്ങളെ സജ്ജരായിരുന്നു. വിമാനത്തിലെ യാത്രക്കാരുടെ എണ്ണത്തെക്കുറിച്ച് വിവരങ്ങളൊന്നും ലഭിച്ചിട്ടില്ല. ഇന്‍ഡിഗോ എയര്‍ലൈന്‍സിന്റെ ഔദ്യോഗിക പ്രസ്താവനവും പുറത്തുവന്നില്ല. കഴിഞ്ഞ ദിവസം മഹാരാഷ്ട്രയിലെ താനെ ജില്ലയിലെ മീര റോഡ് പ്രദേശത്തെ ഒരു സ്വകാര്യ സ്‌കൂളിന് ബോംബ് സ്‌ഫോടന ഭീഷണി ലഭിച്ചിരുന്നു. 

കഴിഞ്ഞ ദിവസം ട്രിച്ചി വിമാനത്താവളത്തില്‍ നിന്ന് 160 യാത്രക്കാരുമായി ദുബായിലേക്ക് പുറപ്പെട്ട എയര്‍ ഇന്ത്യ എക്‌സ്പ്രസ് വിമാനം അടിയന്തിരമായി നിലത്തിറക്കി. എയര്‍ ഇന്ത്യ എക്‌സ്പ്രസ് വിമാനം (നമ്പര്‍ IXO61) വിമാനമാണ് പറന്നുയര്‍ന്ന അതേ വിമാനത്താവളത്തില്‍ ഇറക്കിയത്. ഉച്ചയ്ക്ക് 12.45 ന് തിരുച്ചിറപ്പള്ളി വിമാനത്താവളത്തില്‍ നിന്ന് പുറപ്പെടേണ്ട വിമാനം വൈകി ഉച്ചയ്ക്ക് 1.55 നാണ് പറന്നുയര്‍ന്നത്. വിമാനത്തില്‍ ഏകദേശം 160 യാത്രക്കാര്‍ ഉണ്ടായിരുന്നു. പറന്നുയര്‍ന്ന് ഉടന്‍ തന്നെ വിമാനത്തില്‍ സാങ്കേതിക തകരാര്‍ ജീവനക്കാര്‍ ശ്രദ്ധിച്ചു. ഏകദേശം രണ്ട് മണിക്കൂറോളം, ഇന്ധനം ഒഴിവാക്കുന്നതിനായി വിമാനം തിരുച്ചിറപ്പള്ളി, പുതുക്കോട്ടൈ എന്നിവിടങ്ങളിലെ വ്യോമാതിര്‍ത്തിയില്‍ ചുറ്റി പറന്നതിന് ശേഷമാണ് അടിയന്തരമായി ലാന്‍ഡിംഗ് നടത്തിയത്. ഉച്ചകഴിഞ്ഞ് 3.53നായിരുന്നു എമര്‍ജന്‍സി ലാന്‍ഡിങ്.