ജമ്മു കശ്മീര്‍ ടൂറിസം തിരിച്ചുവരവിന്റെ പാതയിൽ; പഹൽഗാം ഭീകരാക്രമണത്തിന് ശേഷം അടച്ചിട്ട 12 കേന്ദ്രങ്ങൾ കൂടി തുറന്നു

ശ്രീനഗര്‍: പഹൽഗാം ആക്രമണത്തിന് പിന്നാലെ അടച്ച വിനോദ സഞ്ചാര കേന്ദ്രങ്ങൾ തുറന്നു. ജമ്മുകശ്മീരിലെ 12 വിനോദ സഞ്ചാര കേന്ദ്രങ്ങളാണ് തുറന്നു നൽകിയത്.

ഇതിൽ ഏഴെണ്ണം കശ്മീരിലും അഞ്ചെണ്ണം ജമ്മുവിലുമാണ്.

 ജമ്മു കശ്മീർ ലെഫ്റ്റനന്റ് ഗവർണർ മനോജ് സിൻഹ അടുത്തിടെ ഒരു സുപ്രധാന സുരക്ഷാ യോഗം വിളിച്ചിരുന്നു.

 ഈ യോ​ഗത്തിൽ നടന്ന സുരക്ഷ വിലയിരുത്തലുകൾക്ക് ശേഷമാണ് നടപടി. ഈ വർഷം ഏപ്രിൽ 22ന് പഹൽഗാമിലുണ്ടായ ഭീകരാക്രമണത്തിന് പിന്നാലെ 50 കേന്ദ്രങ്ങൾ അടച്ചിരുന്നു.

 മെയ് 7ന് ഇന്ത്യ ഓപ്പറേഷൻ സിന്ദൂറിലൂടെ പഹൽ​ഗാം ഭീകരാക്രമണത്തിന് മറുപടി നൽകിയതോടെ ഇരുരാജ്യങ്ങളും തമ്മിലുള്ള സംഘർഷം യുദ്ധസമാനമായ സാഹചര്യത്തിലേയ്ക്ക് നീങ്ങിയിരുന്നു.

പഹൽഗാമിലും പരിസരത്തുമുള്ള പാർക്കുകളും ഉദ്യാനങ്ങളും, അരു വാലി, യാനർ റാഫ്റ്റിംഗ് പോയിന്റ്, ⁠അക്കാദ് പാർക്ക്, പാദ്ഷാഹി പാർക്ക്, ബിജ്ബെഹാര, ദാര ഷിക്കോ ഗാർഡൻ എന്നിവയും വിനോദസഞ്ചാരികൾക്കായി വീണ്ടും തുറന്നു.

 ജമ്മു ഡിവിഷനിൽ വീണ്ടും തുറന്നവയിൽ റംബാനിലെ ദാഗൻ ടോപ്പ്, കതുവയിലെ ധഗ്ഗർ, റിയാസിയിലെ ചിങ്ക, സലാലിലെ ശിവ് കേവ്, റിയാസി, ദോഡയിലെ പാദ്രി എന്നിവ ഉൾപ്പെടുന്നു.

എന്നാൽ, ഭീകരാക്രമണം നടന്ന ബൈസരൻ വാലി സുരക്ഷാ കാരണങ്ങളാൽ ഇപ്പോൾ തുറക്കില്ല. ദൂത്പത്രി, അഹർബൽ എന്നിവയുൾപ്പെടെ നിരവധി ജനപ്രിയ സ്ഥലങ്ങൾ ഇപ്പോഴും അടച്ചിട്ടിരിക്കുകയാണ്.

ജമ്മു കശ്മീർ ലെഫ്റ്റനന്റ് ഗവർണർ മനോജ് സിൻഹയുടെ നേതൃത്വത്തിൽ വെള്ളിയാഴ്ച ശ്രീനഗറിലെ 'യൂണിഫൈഡ് കമാൻഡ്' ആസ്ഥാനത്ത് ഒരു ഉന്നതതല യോഗം നടന്നിരുന്നു.

 സുരക്ഷാ സംബന്ധമായ നിരവധി വിഷയങ്ങൾ ഈ യോ​ഗത്തിൽ ചർച്ച ചെയ്തു.

 യോഗത്തിൽ നോർത്തേൺ ആർമി കമാൻഡർ ലെഫ്റ്റനന്റ് ജനറൽ പ്രതീക് ശർമ്മ, ചീഫ് സെക്രട്ടറി അടൽ ഡുള്ളു, ഡയറക്ടർ ജനറൽ ഓഫ് പൊലീസ് നളിൻ പ്രഭാത്, ജിഒസി 15 കോർപ്സ് ലെഫ്റ്റനന്റ് ജനറൽ പ്രശാന്ത് ശ്രീവാസ്തവ, ജിഒസി 16 കോർപ്സ് ലെഫ്റ്റനന്റ് ജനറൽ പികെ മിശ്ര, ജിഒസി 9 കോർപ്സ് ലെഫ്റ്റനന്റ് ജനറൽ രാജൻ ഷരാവത്ത്, എയർ വൈസ് മാർഷൽ വികാസ് ശർമ്മ, എഡിജിപി സിഐഡി നിതീഷ് കുമാർ എന്നിവരും പങ്കെടുത്തു.

 യോഗത്തിൽ ഉന്നത സൈനിക ഉദ്യോഗസ്ഥർക്ക് പുറമേ, പ്രാദേശിക പൊലീസ് ഭരണകൂടത്തിലെ ഉന്നത ഉദ്യോഗസ്ഥരും പങ്കെടുത്തതായാണ് റിപ്പോർട്ട്.

പഹൽഗാമിലെ ഭീകരാക്രമണത്തിന് ശേഷം ഇന്ത്യയും പാകിസ്ഥാനും തമ്മിലുണ്ടായ സംഘർഷത്തെ തുടർന്നാണ് സുരക്ഷ കണക്കിലെടുത്ത് ജമ്മു കശ്മീരിലെ വിനോദസഞ്ചാര കേന്ദ്രങ്ങൾ അടച്ചിടാൻ തീരുമാനിച്ചത്.

 ഇത് ടൂറിസത്തെ സാരമായി ബാധിക്കുകയും ചെയ്തിരുന്നു.

തദ്ദേശവാസികളുടെ പ്രധാന വരുമാന സ്രോതസ്സാണിത്. ഇപ്പോൾ വീണ്ടും സഞ്ചാരികൾ ജമ്മു കശ്മീരിലേയ്ക്ക് എത്തിത്തുടങ്ങിയിട്ടുണ്ട്.

 അതിനാൽ, നവരാത്രി, ദുർഗ്ഗാ പൂജ, ദീപാവലി, ഛഠ് പൂജ തുടങ്ങിയ ഉത്സവങ്ങൾ ആഘോഷിക്കുന്ന സമയത്ത് 12 വിനോദസഞ്ചാര കേന്ദ്രങ്ങൾ കൂടി തുറക്കാനുള്ള തീരുമാനം ജമ്മു കശ്മീർ ടൂറിസത്തിന് ഉത്തേജനം നൽകുമെന്നാണ് പ്രതീക്ഷ.