/kalakaumudi/media/media_files/2025/01/21/5eXCzMifHPacT4VrD8rD.jpg)
Indian Military
റായ്പൂര്: ഛത്തീസ്ഗഡില് 14 മാവോയിസ്റ്റുകളെ വധിച്ച് സുരക്ഷാസേന. ഒഡീഷ അതിര്ത്തിയിലെ വനമേഖലയിലാണ് ഏറ്റുമുട്ടല് നടന്നത്. കൊല്ലപ്പെട്ടവരില് പൊലീസ് ഒരു കോടി രൂപ ഇനാം പ്രഖ്യാപിച്ച മാവോയിസ്റ്റുമുണ്ട്. ഏറ്റുമുട്ടലില് ഒരു ജവാന് പരിക്കേറ്റു.
ജില്ലാ റിസര്വ് ഗാര്ഡ് (ഡിആര്ജി), സെന്ട്രല് റിസര്വ് പോലീസ് ഫോഴ്സ് (സിആര്പിഎഫ്), ഛത്തീസ്ഗഡില് നിന്നുള്ള കോബ്ര, ഒഡീഷയില് നിന്നുള്ള സ്പെഷ്യല് ഓപ്പറേഷന് ഗ്രൂപ്പ് (എസ്ഒജി) എന്നീ സംയുക്ത സംഘമാണ് ഓപ്പറേഷനില് പങ്കെടുത്തത്.
ഒഡീഷയിലെ നുവാപാഡ ജില്ലയുടെ അതിര്ത്തിയില് നിന്ന് അഞ്ച് കിലോമീറ്റര് മാത്രം അകലെയുള്ള ഛത്തീസ്ഗഡിലെ കുളാരിഘട്ട് റിസര്വ് വനത്തില് മാവോയിസ്റ്റുകളുടെ സാന്നിധ്യമുണ്ടെന്ന രഹസ്യ വിവരത്തിന്റെ അടിസ്ഥാനത്തിലാണ് ഓപ്പറേഷന് ആരംഭിച്ചത്. തോക്കുകളും വെടിക്കോപ്പുകളും ഏറ്റുമുട്ടല് നടന്ന സ്ഥലത്ത് നിന്ന് കണ്ടെടുത്തതായി സേന അറിയിച്ചു. പ്രദേശത്ത് തെരച്ചില് തുടരുകയാണ്.
മാവോയിസ്റ്റുകളുടെ കേന്ദ്ര കമ്മിറ്റിയിലെ മുതിര്ന്ന അംഗമായിരുന്ന ചലപതിയും കൊല്ലപ്പെട്ടവരില് ഉള്പ്പെടുന്നു. ചലപതിയെ പിടികൂടാന് സഹായിക്കുന്ന വിവരങ്ങള് നല്കുന്നവര്ക്ക് ഒരു കോടി രൂപ നേരത്തെ പാരിതോഷികം പ്രഖ്യാപിച്ചിരുന്നു. 2024ല് ഛത്തീസ്ഗഡില് മാത്രം സുരക്ഷാ സേന 200-ലധികം മാവോയിസ്റ്റുകളെ വധിച്ചു.
2026 മാര്ച്ചോടെ മാവോയിസ്റ്റുകളെ ഉന്മൂലനം ചെയ്യുമെന്ന് പ്രഖ്യാപിച്ച അമിത് ഷാ, ഏറ്റുമുട്ടലിനെ നക്സലിസത്തിനേറ്റ മറ്റൊരു ശക്തമായ പ്രഹരം എന്ന് വിശേഷിപ്പിച്ചു. നക്സല് രഹിത ഭാരതം കെട്ടിപ്പടുക്കാനുള്ള ദൌത്യത്തില് നമ്മുടെ സുരക്ഷാ സേന വലിയ വിജയം കൈവരിച്ചു. ഒഡീഷ - ഛത്തീസ്ഗഡ് അതിര്ത്തിയില് സിആര്പിഎഫ്, എസ്ഒജി ഒഡീഷ, ഛത്തീസ്ഗഡ് പൊലീസ് എന്നിവയുടെ സംയുക്ത ഓപ്പറേഷനില് 14 നക്സലൈറ്റുകളെ കൊലപ്പെടുത്തി എന്നാണ് അമിത് ഷാ സമൂഹ മാധ്യമത്തില് കുറിച്ചത്.