/kalakaumudi/media/agency_attachments/zz0aZgq8g5bK7UEc9Bb2.png)
/kalakaumudi/media/member_avatars/2025/01/24/2025-01-24t111056647z-bijuks.png )
/kalakaumudi/media/media_files/2025/07/24/himantha-2025-07-24-13-38-19.jpg)
അസം: നിലവിലെ ജനസംഖ്യാ പ്രവണതകള്‍ തുടര്‍ന്നാല്‍ 2041-ഓടെ അസമിലെ മുസ്ലീം ജനസംഖ്യ ഹിന്ദു ജനസംഖ്യയ്ക്ക് തുല്യമാകുമെന്ന് അസം മുഖ്യമന്ത്രി ഹിമന്ത ബിശ്വ ശര്‍മ്മ പറഞ്ഞു. സംസ്ഥാനത്ത് വലിയ ജനസംഖ്യാപരമായ മാറ്റങ്ങള്‍ സംഭവിക്കുന്നുണ്ടെന്ന് അദ്ദേഹം ചൂണ്ടിക്കാട്ടി.
മന്ത്രിസഭാ യോഗത്തിന് ശേഷം നടത്തിയ പത്രസമ്മേളനത്തില്‍ ശര്‍മ്മ, 2011 ലെ സെന്‍സസിലെ ഔദ്യോഗിക കണക്കുകള്‍ ഉദ്ധരിച്ചു. ഇത് പ്രകാരം അസമിലെ ജനസംഖ്യയുടെ 34 ശതമാനം മുസ്ലീങ്ങളാണെന്ന് അദ്ദേഹം വ്യക്തമാക്കി. ഇതില്‍ 31 ശതമാനം ''നേരത്തെ സംസ്ഥാനത്ത് സ്ഥിരതാമസമാക്കിയ കുടിയേറ്റക്കാരാണ്'' എന്നും അദ്ദേഹം കൂട്ടിച്ചേര്‍ത്തു.
''ഇത് എന്റെ അഭിപ്രായമല്ല; സെന്‍സസ് കണക്കുകളാണ് ഇവ. 2011 ലെ സെന്‍സസ് പ്രകാരം, ജനസംഖ്യയുടെ 34 ശതമാനം മുസ്ലീങ്ങളാണ്,'' വരും ദശകങ്ങളില്‍ തദ്ദേശീയരായ അസമീസ് ഹിന്ദുക്കള്‍ക്ക് ന്യൂനപക്ഷമാകാന്‍ കഴിയുമോ എന്ന ചോദ്യത്തിന് മറുപടിയായി ശര്‍മ്മ പറഞ്ഞു.
1951 ലെ ജനസംഖ്യാശാസ്ത്രവുമായി താരതമ്യപ്പെടുത്തുമ്പോള്‍ അസം വലിയ ജനസംഖ്യാപരമായ മാറ്റങ്ങള്‍ക്ക് വിധേയമായിട്ടുണ്ടെന്ന് ശര്‍മ്മ തിങ്കളാഴ്ചയും പ്രസ്താവിച്ചിരുന്നു. '1951 ലെ അസമിലെ ജനസംഖ്യാശാസ്ത്രവും ഇന്നത്തെ ജനസംഖ്യാശാസ്ത്രവും നോക്കുകയാണെങ്കില്‍, അടുത്ത 10 വര്‍ഷത്തിനുള്ളില്‍ അസമീസ് ജനത ഇവിടെ ന്യൂനപക്ഷമാകുന്ന ഒരു ഘട്ടത്തിലെത്തി നില്‍ക്കുകയാണ് . അടുത്ത 10 വര്‍ഷത്തിനുള്ളില്‍ അസമില്‍ ഹിന്ദുക്കള്‍ ന്യൂനപക്ഷമാകും,'' അദ്ദേഹം പറഞ്ഞു. അപ്രത്യക്ഷമാകാന്‍ പോകുന്ന സമൂഹത്തെ പുനഃസ്ഥാപിക്കാന്‍ പുതിയ തീരുമാനങ്ങള്‍ എടുക്കുമെന്നും അദ്ദേഹം കൂട്ടിച്ചേര്‍ത്തു.
''1930 മുതല്‍ അസമിലേക്കുള്ള നുഴഞ്ഞുകയറ്റം ആരംഭിച്ചിരുന്നു. ഒരു ഹിമന്ത ബിശ്വ ശര്‍മ്മയ്ക്ക് 100 വര്‍ഷം പഴക്കമുള്ള ചരിത്രം മാറ്റാന്‍ കഴിയില്ല, വെറും 4 വര്‍ഷം കൊണ്ട് എനിക്ക് പ്രശ്‌നം പരിഹരിക്കാന്‍ കഴിയില്ല. എനിക്ക് ശേഷം ആയിരക്കണക്കിന് ആളുകള്‍ ഈ ഉത്തരവാദിത്തം തുടരും. 100 വര്‍ഷത്തെ തെറ്റുകള്‍ ഒരു ഹിമന്ത ബിശ്വ ശര്‍മ്മയ്ക്ക് തിരുത്താന്‍ കഴിയില്ല,'' അസം മുഖ്യമന്ത്രി പറഞ്ഞു. ''എന്നാല്‍ എവിടെയോ നിരാശരായ സമൂഹത്തില്‍ നമുക്ക് വീണ്ടും ധൈര്യത്തിന്റെ വിത്തുകള്‍ വിതയ്ക്കാന്‍ കഴിയും. ഇന്ന് അനധികൃത വിദേശികളെ നാടുകടത്തുകയും ഭൂമി വീണ്ടെടുക്കുകയും ചെയ്തു. ധുബ്രി പോലുള്ള പ്രദേശങ്ങളില്‍ പോലും നമ്മുടെ തദ്ദേശവാസികള്‍ക്ക് അവരുടെ അവകാശങ്ങള്‍ തിരികെ ലഭിച്ചിട്ടുണ്ട്,'' അദ്ദേഹം കൂട്ടിച്ചേര്‍ത്തു.