ആസിയാന്‍ ഉച്ചകോടിയില്‍ വെര്‍ച്വലായി പങ്കെടുക്കാന്‍ മോദി

ന്യൂഡല്‍ഹി: ക്വാലലംപുരില്‍ നടക്കുന്ന 47-ാമത് ആസിയാന്‍ ഉച്ചകോടിയില്‍ പ്രധാനമന്ത്രി നരേന്ദ്ര മോദി നേരിട്ട് പങ്കെടുക്കില്ല. പകരം വെര്‍ച്വലായി പങ്കെടുക്കും. ഇതോടെ ഈ വര്‍ഷം ട്രംപ്  മോദി കൂടിക്കാഴ്ച നടക്കാനുള്ള സാധ്യത അവസാനിച്ചു. പ്രധാനമന്ത്രി തന്നെയാണ് ഉച്ചകോടിയില്‍ വെര്‍ച്വലായി പങ്കെടുക്കുന്ന കാര്യം എക്‌സിലൂടെ അറിയിച്ചത്. 

നേരത്തേ ഐക്യരാഷ്ട്ര സംഘടനയുടെ പൊതുസഭയില്‍ നരേന്ദ്ര മോദി എത്തുമെന്നു പ്രതീക്ഷിച്ചിരുന്നെങ്കിലും വിദേശകാര്യ മന്ത്രി എസ്.ജയശങ്കര്‍ ആണ് ഇന്ത്യന്‍ സംഘത്തെ നയിച്ചത്. ഇതോടെ ന്യൂയോര്‍ക്കില്‍ വച്ച് ട്രംപ്  മോദി കൂടിക്കാഴ്ച നടക്കാതെ പോകുകയായിരുന്നു.

''മലേഷ്യന്‍ പ്രധാനമന്ത്രി അന്‍വര്‍ ഇബ്രാഹിമുമായി ഊഷ്മളമായ സംഭാഷണം നടത്തി. വരാനിരിക്കുന്ന ഉച്ചകോടികളുടെ വിജയത്തിനായി ആശംസകള്‍ നേര്‍ന്നു. ആസിയാന്റെ അധ്യക്ഷ സ്ഥാനത്ത് മലേഷ്യ എത്തിയതില്‍ അദ്ദേഹത്തെ അഭിനന്ദിക്കുകയും ചെയ്തു. ആസിയാന്‍ - ഇന്ത്യ ഉച്ചകോടിയില്‍ വെര്‍ച്വലായി പങ്കെടുക്കും. ആസിയാന്‍ - ഇന്ത്യ പങ്കാളിത്തം കൂടുതല്‍ ആഴത്തിലാക്കുന്നതിന് ആഗ്രഹിക്കുന്നു''  പ്രധാനമന്ത്രി എക്സില്‍ കുറിച്ചു. ഒക്ടോബര്‍ 26-28 വരെയാണ് ക്വാലലംപുരില്‍ വച്ച് 47-ാമത് ആസിയാന്‍ ഉച്ചകോടി നടക്കുന്നത്.

അതിനിടെ, ട്രംപുമായുള്ള ഏറ്റുമുട്ടല്‍ ഒഴിവാക്കാനാണ് മോദി തന്റെ തീരുമാനം മാറ്റിയതെന്ന് ആരോപിച്ച് കോണ്‍ഗ്രസ് നേതാവ് ജയറാം രമേശ് രംഗത്തെത്തി. ''മിസ്റ്റര്‍ മോദി ഉച്ചകോടിക്ക് ക്വാലലംപുരിലേക്ക് പോകുമോ ഇല്ലയോ? പ്രധാനമന്ത്രി പോകില്ലെന്ന് ഇപ്പോള്‍ ഉറപ്പാണ്. ലോക നേതാക്കളുമായി കെട്ടിപ്പിടിക്കാനും ഫോട്ടോ എടുക്കാനും അല്ലെങ്കില്‍ സ്വയം പ്രഖ്യാപിത വിശ്വഗുരുവായി സ്വയം അവതരിപ്പിക്കാനുമുള്ള നിരവധി അവസരങ്ങള്‍ നഷ്ടപ്പെടുന്നു എന്നാണ് ഇതിനര്‍ഥം. 

മോദി പോകാത്തതിന്റെ കാരണം ലളിതമാണ്. പ്രസിഡന്റ് ട്രംപിന്റെ നിയന്ത്രണത്തിലാകാന്‍ അദ്ദേഹം ആഗ്രഹിക്കുന്നില്ല. അദ്ദേഹവും അവിടെ ഉണ്ടാകും. ഏതാനും ആഴ്ചകള്‍ക്ക് മുമ്പ് ഈജിപ്തില്‍ നടന്ന ഗാസ സമാധാന ഉച്ചകോടിയില്‍ പങ്കെടുക്കാനുള്ള ക്ഷണം അദ്ദേഹം നിരസിച്ചതും ഈ കാരണത്താലാണ്''  ജയറാം രമേശ് പറഞ്ഞു.