ഇൻസ്റ്റാഗ്രാമിൽ പെൺകുട്ടിയുടെ നഗ്ന ചിത്രങ്ങൾ ഷെയർ ചെയ്ത യുവാവ് കസ്റ്റഡിയിൽ

വയനാട് :ഇൻസ്റ്റഗ്രാം വഴി സൗഹൃദം സ്ഥാപിച്ച പെൺകുട്ടിയുടെ  സ്വകാര്യ ചിത്രങ്ങൾ കൈക്കലാക്കി പെൺകുട്ടിയുടെ സുഹൃത്തുക്കൾക്ക് അയച്ചുനൽകിയ യുവാവിനെ പോലീസ് അറസ്റ്റ് ചെയ്തു. മലപ്പുറം എടപ്പാൾ വട്ടംകുളം സ്വദേശി പുതൃകാവില്‍ പി. സഹദ് (19) നെയാണ് മാനന്തവാടി  പോലീസ് അറസ്റ്റു ചെയ്തത്.ഇൻസ്റ്റഗ്രാം വഴി യുവതിയെ പരിചയപ്പെട്ട ശേഷം  പ്രതി വിവാഹവാഗ്ദാനം നൽകി പ്രണയം നടിച്ച് ലൈംഗിക ഉദ്ദേശത്തോടെ നഗ്നചിത്രങ്ങൾ കൈക്കലാക്കുകയായിരുന്നുവെന്ന് പോലീസ് പറയുന്നു. പിന്നീട് പ്രതിയുമായി ചില പ്രശ്നങ്ങൾ ഉണ്ടായതോടെ യുവതി ഇയാളെ  ഇൻസ്റ്റഗ്രാമിൽ അൺഫോളോ ചെയ്തു.ഇതിന്റെ  വിരോധം കാരണമാണ്  യുവതിയുടെ ചിത്രങ്ങൾ ഇയാൾ കൂട്ടുകാരികൾക്കും മറ്റും അയച്ചുകൊടുക്കാൻ കാരണം.തുടർന്ന് വിവരമറിഞ്ഞ പെൺകുട്ടി പോലീസിൽ പരാതി നൽകുക ആയിരുന്നു.പരാതിയുടെ അടിസ്ഥാനത്തിൽ പോലീസ് നടത്തിയ അന്വേഷണത്തിൽ നാല് വ്യത്യസ്ത ഇൻസ്റ്റഗ്രാം ഐഡികൾ വഴിയാണ് പ്രതി യുവതിയെ ബന്ധപ്പെട്ടിരുന്നതെന്ന് കണ്ടെത്തി.ഇൻസ്റ്റഗ്രാം അക്കൗണ്ടുകൾ നിർമ്മിക്കാൻ ഉപയോഗിച്ച ഫോൺ നമ്പറുകൾ പ്രതിയുടേതായിരുന്നില്ല. മൊബൈൽ ടെക്നീഷ്യൻ കോഴ്സ് പഠിച്ച സഹദ്, തനിക്ക് റിപ്പയർ ചെയ്യാൻ ലഭിക്കുന്ന ഫോണുകളിലെ സിം കാർഡ് ഉപയോഗിച്ച് ഉടമകളുടെ അറിവോ സമ്മതമോ കൂടാതെ വ്യാജ അക്കൗണ്ടുകൾ നിർമ്മിക്കുകയായിരുന്നു. ശാസ്ത്രീയമായ അന്വേഷണത്തിനൊടുവിലാണ് പ്രതിയെ പോലീസ് തിരിച്ചറിഞ്ഞത്.