/kalakaumudi/media/agency_attachments/zz0aZgq8g5bK7UEc9Bb2.png)
/kalakaumudi/media/member_avatars/2025/01/24/2025-01-24t111056647z-bijuks.png )
/kalakaumudi/media/media_files/2025/08/14/pace-2025-08-14-15-46-45.jpg)
കൊല്‍ക്കത്ത : ഇന്ത്യന്‍ കായിക രംഗത്തെ ഇതിഹാസതാരവും ഒളിമ്പിക്‌സ് മെഡല്‍ ജേതാവുമായ വെസ് പേസ് അന്തരിച്ചു. 80 വയസ്സായിരുന്നു.
ഇതിഹാസ ടെന്നീസ് താരം ലിയാന്‍ഡര്‍ പേസിന്റെ പിതാവാണ്. ദീര്‍ഘനാളായി പാര്‍ക്കിന്‍സണ്‍സ് രോഗത്തെ തുടര്‍ന്ന് ചികിത്സയിലായിരുന്നു. 1972 ലെ മ്യൂണിക്ക് ഒളിമ്പിക് ഗെയിംസില്‍ വെങ്കലം നേടിയ ഇന്ത്യന്‍ ഹോക്കി ടീമിലെ അംഗമായിരുന്നു വെസ് പേസ്.
ചൊവ്വാഴ്ച പുലര്‍ച്ചെ ആയിരുന്നു രോഗം മൂര്‍ച്ഛിച്ചതിനെ തുടര്‍ന്ന് അദ്ദേഹത്തെ കൊല്‍ക്കത്തയിലെ വുഡ്ലാന്‍ഡ്‌സ് ആശുപത്രിയില്‍ പ്രവേശിപ്പിച്ചിരുന്നത്. വ്യാഴാഴ്ച മരണം സംഭവിക്കുകയായിരുന്നു. 1971 ലെ ബാഴ്സലോണയില്‍ നടന്ന ഹോക്കി ലോകകപ്പില്‍ വെങ്കല മെഡല്‍ നേടിയ ഇന്ത്യന്‍ പുരുഷ ഹോക്കിയിലും പേസ് ഭാഗമായിരുന്നു. ഇന്ത്യന്‍ ഹോക്കി ടീമിലെ പ്രമുഖ മിഡ്ഫീല്‍ഡര്‍ ആയിരുന്നു അദ്ദേഹം.
ഹോക്കിക്ക് പുറമേ ഫുട്‌ബോള്‍, ക്രിക്കറ്റ്, റഗ്ബി തുടങ്ങിയ നിരവധി കായിക ഇനങ്ങളിലും അദ്ദേഹം തന്റെ കഴിവ് പരീക്ഷിച്ചു. 1996 മുതല്‍ 2002 വരെ ഇന്ത്യന്‍ റഗ്ബി ഫുട്‌ബോള്‍ യൂണിയന്റെ പ്രസിഡന്റായും വെസ് പേസ് സേവനമനുഷ്ഠിച്ചു. ഒരു സ്‌പോര്‍ട്‌സ് മെഡിസിന്‍ ഫിസിഷ്യന്‍ എന്ന നിലയില്‍, അദ്ദേഹം ബിസിസിഐയിലും പ്രവര്‍ത്തിച്ചിട്ടുണ്ട്, കൂടാതെ ഏഷ്യന്‍ ക്രിക്കറ്റ് കൗണ്‍സില്‍, ഇന്ത്യന്‍ ക്രിക്കറ്റ് കണ്‍ട്രോള്‍ ബോര്‍ഡ്, ഇന്ത്യന്‍ ഡേവിസ് കപ്പ് ടീം എന്നിവയുള്‍പ്പെടെ നിരവധി കായിക സംഘടനകളില്‍ മെഡിക്കല്‍ കണ്‍സള്‍ട്ടന്റായും പ്രവര്‍ത്തിച്ചിട്ടുണ്ട്. അദ്ദേഹത്തിന്റെ മകന്‍ ലിയാന്‍ഡര്‍ പേസും ഒളിമ്പിക് മെഡല്‍ ജേതാവാണ്.