ഹരിയാനയില്‍ വിനോദസഞ്ചാരികള്‍ കയറിയ യന്ത്ര ഊഞ്ഞാല്‍ തകര്‍ന്നു വീണ് ഒരു മരണം

ചണ്ഡിഗഡ്: ഹരിയാനയിലെ സൂരജ്കുണ്ഡില്‍ നടന്ന മേളക്കിടെ യന്ത്ര ഊഞ്ഞാല്‍ തകര്‍ന്നു വീണ് ഒരു മരണം. വിനോദസഞ്ചാരികള്‍ കയറിയ 'സുനാമി' യന്ത്ര ഊഞ്ഞാലാണു പ്രവര്‍ത്തിക്കുന്നതിനിടെ തകര്‍ന്നു വീണത്. അപകടത്തില്‍ ഒരാള്‍ മരിച്ചു. ഹരിയാന പൊലീസിലെ സബ് ഇന്‍സ്‌പെക്ടര്‍ ജഗദീഷ് പ്രസാദാണു മരിച്ചത്. അപകടത്തില്‍ 13 പേര്‍ക്ക് പരുക്കേറ്റു. വൈകീട്ട് 6:15 ഓടെയാണ് അപകടം നടന്നത്. 

അപകടസമയത്ത് യന്ത്ര ഊഞ്ഞാലില്‍ 15 പേര്‍ ഉണ്ടായിരുന്നതായാണ് റിപ്പോര്‍ട്ട്. മെക്കാനിക്കല്‍ തകരാര്‍ മൂലം ഊഞ്ഞാല്‍ തകര്‍ന്നു വീഴുകയായിരുന്നുവെന്നാണു പ്രാഥമിക നിഗമനം. അപകടസമയത്ത് സഞ്ചാരികളുമായി ഉയരത്തില്‍ പറക്കുകയായിരുന്നു യന്ത്ര ഊഞ്ഞാല്‍. അപകടത്തിന് പിന്നാലെ മേള നടന്നിരുന്ന ഗ്രൗണ്ട് അധികൃതര്‍ ഒഴിപ്പിച്ചു. ജില്ലാ മജിസ്ട്രേറ്റിന്റെ നേതൃത്വത്തിലാണ് രക്ഷാപ്രവര്‍ത്തനം നടത്തിയത്. സംഭവത്തില്‍ അന്വേഷണത്തിന് ഉത്തരവിട്ടിട്ടുണ്ടെന്ന് പൊലീസ് മേധാവി പറഞ്ഞു. പൊലീസ് ഉദ്യോഗസ്ഥന്റെ മരണത്തില്‍ മുഖ്യമന്ത്രി നയാബ് സെയ്‌നി അനുശോചനം രേഖപ്പെടുത്തി.