പൂര്‍ണിയ വികസന പദ്ധതികള്‍ക്ക് തുടക്കമിട്ട് പ്രധാനമന്ത്രി നരേന്ദ്ര മോദി

ന്യൂഡല്‍ഹി: പ്രധാനമന്ത്രി നരേന്ദ്ര മോദി ഇന്ന് ബിഹാറും പശ്ചിമ ബംഗാളും സന്ദര്‍ശിക്കും. ഇന്ത്യയുടെ സൈനിക തയാറെടുപ്പ്, പ്രാദേശിക ബന്ധം, സാമ്പത്തിക വളര്‍ച്ച എന്നിവ വര്‍ധിപ്പിക്കുന്നതിനായി അദ്ദേഹം പ്രധാന അടിസ്ഥാന സൗകര്യ വികസന പദ്ധതികള്‍ ഉദ്ഘാടനം ചെയ്യും. കൊല്‍ക്കത്തയില്‍ 16ആമത് കമ്പൈന്‍ഡ് കമാന്‍ഡേഴ്‌സ് കോണ്‍ഫറന്‍സ്-2025 പ്രധാനമന്ത്രി ഉദ്ഘാടനം ചെയ്യും.

സെപ്റ്റംബര്‍ 15 മുതല്‍ 17 വരെ നടക്കുന്ന മൂന്ന് ദിവസത്തെ ഈ സമ്മേളനം, ഇന്ത്യയുടെ സായുധ സേനകളുടെയും ഉന്നത സിവിലിയന്‍ നേതൃത്വത്തിന്റെയും ഉന്നതതല യോഗമാണ്. 'പരിഷ്‌കാരങ്ങളുടെ വര്‍ഷം  ഭാവിയിലേക്കുള്ള പരിവര്‍ത്തനം' എന്ന ഈ വര്‍ഷത്തെ പ്രമേയം, ഇന്ത്യയുടെ സൈനിക ശേഷികളുടെ ദീര്‍ഘകാല പരിവര്‍ത്തനത്തിലും ആധുനികവത്കരണത്തിലും സര്‍ക്കാര്‍ ശ്രദ്ധ കേന്ദ്രീകരിക്കുന്നതിനെ അടിവരയിടുന്നു. ബിഹാറിലെ പൂര്‍ണിയ സന്ദര്‍ശിക്കുന്ന പ്രധാനമന്ത്രി 36,000 കോടി രൂപയിലധികം വരുന്ന വിവിധ വികസന പദ്ധതികള്‍ക്കും തുടക്കമിടും.
പുതിയ പദ്ധതികള്‍

പൂര്‍ണിയയില്‍ പുതുതായി നിര്‍മിച്ച വിമാനത്താവള ടെര്‍മിനല്‍ പ്രധാനമന്ത്രി ഉദ്ഘാടനം ചെയ്യും. ഇതിലൂടെ ഈ മേഖലയുടെ ദീര്‍ഘകാലമായുള്ള വ്യോമയാന ആവശ്യം നിറവേറ്റപ്പെടും. കൂടാതെ, ബിഹാറിലെ ഏറ്റവും വലിയ സ്വകാര്യ മേഖലയിലെ നിക്ഷേപമായ ഭഗല്‍പൂരിലെ പിര്‍പൈന്തിയില്‍ 25,000 കോടി രൂപയുടെ 3800 മെഗാവാട്ട് താപവൈദ്യുത നിലയത്തിനും പ്രധാനമന്ത്രി തറക്കല്ലിടും. അള്‍ട്രാ-സൂപ്പര്‍ ക്രിട്ടിക്കല്‍, ലോ-എമിഷന്‍ സാങ്കേതികവിദ്യ ഉപയോഗിച്ച് രൂപകല്‍പ്പന ചെയ്തിട്ടുള്ള ഈ പദ്ധതി, ബിഹാറിന്റെ ഊര്‍ജ സുരക്ഷ ഗണ്യമായി മെച്ചപ്പെടുത്തുമെന്ന് പ്രതീക്ഷിക്കുന്നു.

മറ്റ് പ്രധാന പദ്ധതികളില്‍, 2,680 കോടിയിലധികം രൂപ വിലമതിക്കുന്ന കോസി-മേച്ചി ഇന്‍ട്രാ-സ്റ്റേറ്റ് നദീ ലിങ്ക് പദ്ധതിയുടെ ഒന്നാം ഘട്ടത്തിനും പ്രധാനമന്ത്രി മോദി തുടക്കം കുറിക്കും. കനാലിന്റെ ജലവിതരണ ശേഷി വര്‍ധിപ്പിച്ചും നിര്‍ണായക അടിസ്ഥാന സൗകര്യങ്ങള്‍ നവീകരിച്ചും വടക്കുകിഴക്കന്‍ ബിഹാറിലെ ജലസേചനം, വെള്ളപ്പൊക്ക നിയന്ത്രണം, കൃഷി എന്നിവ ഈ പദ്ധതി പ്രോത്സാഹിപ്പിക്കും. വിവിധ റെയില്‍വേ പദ്ധതികള്‍ക്ക് തറക്കല്ലിടുകയും പുതിയ ട്രെയിനുകള്‍ ഫ്‌ലാഗ് ഓഫ് ചെയ്യുകയും ചെയ്യും.
ദേശീയ മഖാന ബോര്‍ഡ്

കേന്ദ്ര ബജറ്റില്‍ പ്രഖ്യാപിച്ച ദേശീയ മഖാന ബോര്‍ഡിന് പ്രധാനമന്ത്രി ബിഹാറില്‍ തുടക്കം കുറിക്കും. രാജ്യത്തെ മഖാന ഉല്‍പാദനത്തില്‍ 90 ശതമാനവും സംഭാവന ചെയ്യുന്നത് ബിഹാറാണ്. ഈ ബോര്‍ഡ് ഉല്‍പാദന വര്‍ധന, വിളവെടുപ്പിന് ശേഷമുള്ള മാനേജ്‌മെന്റ്, സാങ്കേതികവിദ്യ, മൂല്യവര്‍ധന, വിപണനം, കയറ്റുമതി എന്നിവയില്‍ ശ്രദ്ധ കേന്ദ്രീകരിക്കും.

മഖാന ഉല്‍പാദനത്തില്‍ ബിഹാറിനെ ആഗോള ഭൂപടത്തില്‍ കൂടുതല്‍ ശക്തമാക്കാനാണ് ബോര്‍ഡ് ലക്ഷ്യമിടുന്നത്. ഈ നീക്കം മഖാന കര്‍ഷകര്‍ക്ക് വലിയ സഹായകരമാകും. രാഷ്ട്രീയ ഗോകുല്‍ മിഷന്റെ കീഴില്‍, ഒരു വര്‍ഷം 5 ലക്ഷം ഡോസ് ഉത്പാദിപ്പിക്കാന്‍ ശേഷിയുള്ള ആധുനിക സെമന്‍ സ്റ്റേഷനും പ്രധാനമന്ത്രി ഉദ്ഘാടനം ചെയ്യും.

പ്രധാനമന്ത്രി ആവാസ് യോജന ഗ്രാമിന്‍, അര്‍ബന്‍ പദ്ധതികളിലെ ഗുണഭോക്താക്കള്‍ക്ക് താക്കോല്‍ കൈമാറുകയും ദീന്‍ദയാല്‍ അന്ത്യോദയ യോജനയുടെ കീഴിലുള്ള ക്ലസ്റ്റര്‍ ലെവല്‍ ഫെഡറേഷനുകള്‍ക്ക് 500 കോടി രൂപ വിതരണം ചെയ്യുകയും ചെയ്യും. പ്രധാനമന്ത്രിയുടെ സന്ദര്‍ശനത്തോട് അനുബന്ധിച്ച് പൂര്‍ണിയയില്‍ വിപുലമായ സുരക്ഷാ ക്രമീകരണങ്ങള്‍ ഒരുക്കിയിട്ടുണ്ട്. ഇതിന്റെ ഭാഗമായി ദേശീയ, സംസ്ഥാന ഹൈവേകളിലെ ഗതാഗതം 24 മണിക്കൂറിനായി നിര്‍ത്തിവച്ചിട്ടുണ്ട്.