ഇന്ത്യ-യുകെ വ്യാപാര കരാര്‍ യാഥാര്‍ത്ഥ്യമാകുന്നു

ന്യൂഡല്‍ഹി : ഏറെ നാളായി ചര്‍ച്ച തുടരുന്ന ഇന്ത്യ-യുകെ വ്യാപാര കരാര്‍ അടുത്ത ആഴ്ചയോടെ യാഥാര്‍ത്ഥ്യമാകും. വ്യാപാര കരാര്‍ ഒപ്പ് വയ്ക്കുന്നതിന്റെ ഭാഗമായി പ്രധാനമന്ത്രി നരേന്ദ്രമോദി അടുത്തയാഴ്ച യുകെ സന്ദര്‍ശിക്കും. ജൂലൈ 23 മുതല്‍ ആണ് മോദിയുടെ യുകെ സന്ദര്‍ശനം.

ഇന്ത്യ-യുകെ സ്വതന്ത്ര വ്യാപാര കരാര്‍ ചര്‍ച്ചകള്‍ അന്തിമമായതോടെയാണ് പ്രധാനമന്ത്രി യുകെ സന്ദര്‍ശിക്കാന്‍ ഒരുങ്ങുന്നത്. പ്രധാന വ്യാപാര കരാറുകളിലൂടെയും രാഷ്ട്രീയ ഇടപെടലുകളിലൂടെയും ഇന്ത്യയുടെ നയതന്ത്ര ബന്ധം ശക്തിപ്പെടുത്തുകയെന്നതാണ് ഇന്ത്യ ലക്ഷ്യമിടുന്നത്. ഉഭയകക്ഷി വ്യാപാര മേഖലയെ നിര്‍ണായകമായി സ്വാധീനിക്കുന്ന ഈ കരാറുമായി ബന്ധപ്പെട്ട് കഴിഞ്ഞ മൂന്നുവര്‍ഷം ഇന്ത്യയും യുകെയും തമ്മില്‍ ചര്‍ച്ചകള്‍ നടത്തിയിരുന്നു.

ജൂലൈ 23-24 തീയതികളില്‍ പ്രധാനമന്ത്രി മോദിയുടെ യുണൈറ്റഡ് കിംഗ്ഡത്തിലേക്കുള്ള യാത്രയുടെ ആദ്യ ഘട്ടത്തില്‍ അദ്ദേഹം സ്വതന്ത്ര വ്യാപാര കരാറില്‍ (എഫ്ടിഎ) ഒപ്പുവെക്കും. ഇന്ത്യയില്‍ നിന്നും യുകെയിലേക്കുള്ള 99% കയറ്റുമതിക്കും ബാധകമാക്കുന്നതാണ് സ്വതന്ത്ര വ്യാപാരക്കരാര്‍. ഇന്ത്യയിലേക്കുള്ള വിസ്‌കി, കാറുകള്‍ തുടങ്ങിയ ബ്രിട്ടീഷ് കയറ്റുമതിയും സുഗമമാക്കാന്‍ ഈ കരാറിലൂടെ സാധിക്കും.