/kalakaumudi/media/agency_attachments/zz0aZgq8g5bK7UEc9Bb2.png)
/kalakaumudi/media/member_avatars/2025/01/24/2025-01-24t111056647z-bijuks.png )
/kalakaumudi/media/media_files/2026/01/12/priyanka-2-2026-01-12-09-45-13.jpg)
ലക്നൗ: ഉത്തര്പ്രദേശില് നഷ്ടപ്പെട്ട സ്വാധീനം തിരിച്ചുപിടിക്കാന് ലക്ഷ്യമിട്ട് കോണ്ഗ്രസ് പ്രിയങ്ക ഗാന്ധിയെ വീണ്ടും സജീവ രാഷ്ട്രീയത്തിലേക്ക് ഇറക്കുന്നു. 2022-ലെ നിയമസഭാ തിരഞ്ഞെടുപ്പിലെ കനത്ത പരാജയത്തിന് ശേഷം യുപി രാഷ്ട്രീയത്തില് നിന്ന് താല്ക്കാലികമായി വിട്ടുനിന്ന പ്രിയങ്ക, വരാനിരിക്കുന്ന നിര്ണായക തിരഞ്ഞെടുപ്പുകള് മുന്നില് കണ്ടാണ് തിരിച്ചെത്തുന്നത്.
2019-ല് പ്രിയങ്ക ഗാന്ധിയെ കിഴക്കന് ഉത്തര്പ്രദേശിന്റെ ചുമതലയുള്ള എഐസിസി ജനറല് സെക്രട്ടറിയായി നിയമിച്ചപ്പോള്, 2022-ലെ നിയമസഭാ തിരഞ്ഞെടുപ്പിന് മുന്നോടിയായി പാര്ട്ടി സംഘടനയെ പുനരുജ്ജീവിപ്പിക്കാന് അവരുടെ സജീവ രാഷ്ട്രീയ പ്രവേശനം സഹായിക്കുമെന്ന് സംസ്ഥാന നേതാക്കള് പ്രതീക്ഷിച്ചിരുന്നു. എന്നാല്, വെറും രണ്ട് സീറ്റുകളിലേക്ക് കോണ്ഗ്രസ് ഒതുക്കപ്പെട്ട തിരഞ്ഞെടുപ്പ് പരാജയത്തിന് പിന്നാലെ, പാര്ട്ടി കാര്യങ്ങളില് നിന്ന് പ്രിയങ്ക പിന്വാങ്ങുകയും 2023 അവസാനത്തോടെ ഉത്തര്പ്രദേശില് നിന്ന് പൂര്ണമായും വിട്ടുനില്ക്കുകയും ചെയ്തു.
ഇപ്പോള്, രണ്ട് വര്ഷത്തിന് ശേഷം, ഇന്ന് പ്രിയങ്കയുടെ ജന്മദിനം പ്രമാണിച്ച് യുപി കോണ്ഗ്രസ് 100 ദിവസത്തെ ജനസമ്പര്ക്ക പരിപാടി പ്രഖ്യാപിക്കാന് ഒരുങ്ങുകയാണ്. പാര്ട്ടി കാര്യങ്ങളില് പ്രിയങ്കാ ഗാന്ധി കൂടുതല് സജീവമാകുന്നത് ഇതിനോടകം തന്നെ വലിയ ശ്രദ്ധ നേടിക്കഴിഞ്ഞു. തങ്ങളുടെ പ്രധാന പ്രചാരണ പരിപാടികളെ പ്രിയങ്ക നയിക്കുന്നതിലൂടെ, 2027-ലെ നിയമസഭാ തിരഞ്ഞെടുപ്പില് അവര് നിര്ണായകവും സജീവവുമായ പങ്ക് വഹിക്കുമെന്ന സൂചനയാണ് ഉത്തര്പ്രദേശ് കോണ്ഗ്രസ് നേതൃത്വത്തിനും പ്രവര്ത്തകര്ക്കും നല്കുന്നത്.
സംസ്ഥാന കോണ്ഗ്രസ് അധ്യക്ഷന് അജയ് റായ് 20 ജില്ലാ-നഗര പാര്ട്ടി യൂണിറ്റുകള്ക്ക് കഴിഞ്ഞ ശനിയാഴ്ച ഒരു സര്ക്കുലര് അയച്ചിരുന്നു. നിലവിലുള്ളവരും മുന്പുണ്ടായിരുന്നവരുമായ എംപിമാരും എംഎല്എമാരും ഉള്പ്പെടെയുള്ള മുതിര്ന്ന കോണ്ഗ്രസ് നേതാക്കള് അതത് മേഖലകളില് പാര്ട്ടിയുടെ 100 ദിവസത്തെ രാഷ്ട്രീയ പ്രവര്ത്തന പദ്ധതി പുറത്തിറക്കുമെന്ന് അതില് പറയുന്നു.
സഹാരന്പൂരില് ഇമ്രാന് മസൂദ്, പ്രയാഗ്രാജില് ഉജ്ജ്വല് രാമന് സിംഗ്, ദേവിപട്ടണില് തനൂജ് പുനിയ, മീററ്റില് രാജീവ് ശുക്ല എന്നീ എംപിമാരും, അസംഗഡില് എംഎല്എ വീരേന്ദ്ര ചൗധരി, അയോധ്യയില് മുന് എംപി നിര്മ്മല് ഖത്രി, ഗാസിയാബാദില് മുന് കേന്ദ്രമന്ത്രി സല്മാന് ഖുര്ഷിദ്, ചിത്രകൂടില് പ്രദീപ് ജെയിന് ആദിത്യ എന്നിവരാണ് ഈ പരിപാടികള്ക്ക് നേതൃത്വം നല്കുന്നത്.
റാലികള്, മീറ്റിങ്ങുകള്, സെമിനാറുകള്
ഭരണഘടനാ സംരക്ഷണത്തിനായി 'സംവിധാന് സംവാദ് മഹാപഞ്ചായത്തുകള്' സംഘടിപ്പിക്കാനും, ബിജെപി ഭരിക്കുന്ന സംസ്ഥാന-കേന്ദ്ര സര്ക്കാരുകളെ ലക്ഷ്യമിട്ട് റാലികള് നടത്താനും കോണ്ഗ്രസിന്റെ 100 ദിവസത്തെ കര്മ്മപദ്ധതിയില് ഉള്പ്പെടുന്നുവെന്ന് പാര്ട്ടി വൃത്തങ്ങള് അറിയിച്ചു. തിരഞ്ഞെടുപ്പ് നടക്കാനിരിക്കുന്ന സംസ്ഥാനങ്ങളില് തിരഞ്ഞെടുപ്പ് കമ്മീഷന് നടത്തുന്ന വിവാദപരമായ വോട്ടര്പട്ടിക പുതുക്കല് മുതല്, യുപിഎ കാലത്തെ തൊഴിലുറപ്പ് പദ്ധതിയില് വരുത്തിയ മാറ്റങ്ങള് വരെയുള്ള ഭരണഘടനാപരവും ജനാധിപത്യപരവുമായ അവകാശങ്ങളില് ശ്രദ്ധ കേന്ദ്രീകരിച്ചായിരിക്കും പ്രചാരണം. കൂടാതെ, പ്രാദേശിക പ്രശ്നങ്ങളില് ഊന്നിനിന്നുകൊണ്ട് തെരുവ് യോഗങ്ങളും സെമിനാറുകളും വഴി ജനങ്ങളിലേക്ക് എത്താനും പാര്ട്ടി പദ്ധതിയിടുന്നു.
ഈ പ്രചാരണ പരിപാടികളുടെ സമാപനം കുറിച്ച് വന്കിട റാലികളും കോണ്ഗ്രസ് നേതാക്കള് ആസൂത്രണം ചെയ്തിട്ടുണ്ട്. ലക്നൗവില് നടക്കുന്ന റാലിയില് പ്രിയങ്ക ഗാന്ധിയും പ്രതിപക്ഷ നേതാവ് രാഹുല് ഗാന്ധിയും പങ്കെടുക്കാന് സാധ്യതയുണ്ട്. പരിവര്ത്തന് പ്രതിജ്ഞ പ്രചാരണം 2027-ന്റെ തുടക്കത്തില് നടക്കുന്ന റാലിയോടെ അവസാനിക്കും.
'ഏകദേശം ഒരു വര്ഷത്തോളമായി സംഘടന കെട്ടിപ്പടുക്കുന്ന തിരക്കിലായിരുന്നതിനാല്, ദീര്ഘനാളത്തെ ഇടവേളയ്ക്ക് ശേഷമാണ് പാര്ട്ടി ഇത്തരമൊരു സംഘടിത പ്രചാരണ പരിപാടിക്ക് സംസ്ഥാനത്ത് തുടക്കം കുറിക്കുന്നത്. പ്രിയങ്ക ഗാന്ധിയുടെ ജന്മദിനത്തില് ഞങ്ങള് 100 ദിവസത്തെ കര്മ്മപദ്ധതി പ്രഖ്യാപിക്കാന് തീരുമാനിച്ചിട്ടുണ്ട്. 2027-ലെ നിയമസഭാ തിരഞ്ഞെടുപ്പിന് മുന്നോടിയായുള്ള ഞങ്ങളുടെ ആദ്യത്തെ പ്രചാരണ പരിപാടിയായിരിക്കും ഇത്,' മുതിര്ന്ന പാര്ട്ടി നേതാവ് പറഞ്ഞു.
യുപിയിലെ ചുമതലയുണ്ടായിരുന്ന സമയത്ത് മുഖ്യമന്ത്രി യോഗി ആദിത്യനാഥ് സര്ക്കാരിനെതിരെ ആക്രമണാത്മകമായ നിലപാടായിരുന്നു പ്രിയങ്ക സ്വീകരിച്ചിരുന്നത്. 2021-ല് അവര് 'ലഡ്കി ഹൂം, ലഡ് ശക്തി ഹൂം' (ഞാന് ഒരു പെണ്കുട്ടിയാണ്, എനിക്ക് പോരാടാന് കഴിയും) എന്ന പ്രചാരണം ആരംഭിക്കുകയും, ലഖിംപൂര് ഖേരി അക്രമത്തിനെതിരായ പ്രതിഷേധങ്ങള്ക്ക് നേതൃത്വം നല്കുകയും ചെയ്തിരുന്നു. ഇതോടെ പ്രിയങ്ക പാര്ട്ടിയെ നയിക്കാന് പ്രാപ്തയാണെന്ന രീതിയില് വിലയിരുത്തപ്പെട്ടിരുന്നു. എന്നിരുന്നാലും, 2022-ലെ തോല്വിക്ക് ശേഷം പ്രിയങ്ക സംസ്ഥാനത്ത് നിന്ന് അപ്രത്യക്ഷമാവുകയും പാര്ട്ടി സംഘടനാപരമായി പ്രതിസന്ധിയിലാവുകയും ചെയ്തു.
2024 ലെ ലോക്സഭാ തിരഞ്ഞെടുപ്പിലെ മികച്ച പ്രകടനം മുതലെടുക്കാനും പ്രിയങ്കയെ പ്രചാരണ മുഖമാക്കി 2027 ലെ പോരാട്ടത്തിന് തയ്യാറെടുക്കാനും കോണ്ഗ്രസ് ശ്രമിക്കുമെന്ന് കോണ്ഗ്രസ് വൃത്തങ്ങള് അറിയിച്ചു.