പ്രതിസന്ധി തുടരവേ ഇൻഡിഗോയ്ക്ക് ആശ്വാസം ; പൈലറ്റുമാരുടെ ഡ്യൂട്ടിസമയത്തിലെ നിബന്ധന പിൻവലിച്ച് ഡിജിസിഎ

ന്യൂഡൽഹി :ഇൻഡിഗോയുടെ വിമാനസർവീസുകൾ റദ്ദാക്കിയതിനു പിന്നാലെ യാത്രക്കാർ പ്രതിസന്ധിയിലാവുകയും പ്രതിഷേധം തുടരുകയും ചെയ്ത സാഹചര്യത്തിൽ ആശ്വാസകരമായ നടപടിയുമായി ഡിജിസിഎ.

പൈലറ്റുമാരുടെ ഡ്യൂട്ടിസമയം സംബന്ധിച്ച നിബന്ധന ഡി ജി സി എ ( ഡയറക്ടറേറ്റ് ജനറൽ ഓഫ് സിവിൽ ഏവിയേഷൻ)  പിൻവലിച്ചു .

ഇൻഡിഗോ ഇന്നലെ മാത്രം 550ഓളം സർവീസുകളാണ് റദ്ദാക്കിയത്.

പൈലറ്റുമാരുടെ ഡ്യൂട്ടി സമയ നിബന്ധന അടക്കമുള്ള പരിഷ്കരണങ്ങൾ കാരണം ഇൻഡിഗോയുടെ 600-ലധികം സർവീസുകൾ ഇന്നും  മുടങ്ങിയിരുന്നു.

ഇതേത്തുടർന്ന് വലിയ പ്രതിസന്ധിയാണ് ഡൽഹി അടക്കമുള്ള വിമാനത്താവളങ്ങളിൽ ഉണ്ടായത്.

 ഇതിനുപിന്നാലെ ഇൻഡിഗോ കേന്ദ്ര വ്യോമയാന മന്ത്രാലയത്തിന് പരാതി നൽകിയിരുന്നു.

ഇതിനുപിന്നാലെയാണ് ഡിജിസിഎ യുടെ ഭാഗത്തുനിന്ന് സമാശ്വാസകരമായ   നടപടി ഉണ്ടായിരിക്കുന്നത് .

ഡൽഹി അടക്കം രാജ്യത്തെ എല്ലാ വിമാനത്താവളങ്ങളിലും വിമാനസർവീസുകൾ നിശ്ചലമാകുന്ന സാഹചര്യമായിരുന്നു ഉണ്ടായിരുന്നത് .

പാർലമെന്റിൽ ഈ വിഷയം ചർച്ചയാകുകയും ശക്തമായ പ്രതിഷേധം ഉയരുകയും ചെയ്തിരുന്നു.

 വിമാന ജീവനക്കാർക്ക് പ്രതിവാര വിശ്രമവും അവധിയും രണ്ടായി നൽകണമെന്ന നിർദ്ദേശമാണ് പിൻവലിച്ചത് .

ഇതോടെ കൂടുതൽ വിമാന സർവീസുകൾ ആരംഭിക്കാൻ കമ്പനിക്ക് കഴിയും .വിമാനസർവീസുകൾ പുനരാരംഭിക്കാൻ രണ്ട് ദിവസം വേണ്ടി വന്നേക്കുമെന്ന് കമ്പനി അറിയിച്ചിട്ടുണ്ട് .