വന്ദേഭാരത് സ്ലീപ്പര്‍ കോട്ടയം വഴി? രാത്രി 7.30 ന് തിരുവനന്തപുരം നോര്‍ത്തില്‍ നിന്ന് യാത്ര ആരംഭിക്കും

ബെംഗളൂരു: ഏറെ പ്രതീക്ഷയോടെ കാത്തിരിക്കുന്ന തിരുവനന്തപുരം  ബെംഗളൂരു വന്ദേഭാരത് സ്ലീപ്പര്‍ ട്രെയിന്‍ കോട്ടയം വഴിയാകാന്‍ സാധ്യത. രാത്രി 7.30ന് തിരുവനന്തപുരം നോര്‍ത്തില്‍ നിന്ന് പുറപ്പെട്ട് കോട്ടയം വഴി ബെംഗളൂരുവിലെത്തുന്ന സമയക്രമമാണ് റെയില്‍വേ ബോര്‍ഡിന്റെ അംഗീകാരത്തിന് സമര്‍പ്പിച്ചിട്ടുള്ളത്. ട്രെയിന്‍ എന്ന് സര്‍വീസ് തുടങ്ങുമെന്നാണ് യാത്രക്കാര്‍ ഉറ്റുനോക്കുന്നത്. ബയ്യപ്പനഹള്ളി എസ്എംവിടി മുതല്‍ തിരുവനന്തപുരം നോര്‍ത്ത് വരെയാകും സ്ലീപ്പര്‍ സര്‍വീസ്. 

ബെംഗളൂരുവില്‍ നിന്ന് തിരുവനന്തപുരം നോര്‍ത്ത് വരെ 842 കിലോമീറ്ററുണ്ട്. യാത്രാസമയം 12 മണിക്കൂറില്‍ താഴെയായിരിക്കും. ഈ സമയക്രമം നടപ്പാക്കാനായാല്‍ മറുനാട്ടില്‍ ജോലി ചെയ്യുന്നവര്‍ക്കും വിദ്യാര്‍ഥികള്‍ക്കും ഏറെ പ്രയോജനപ്പെടും. ഭക്ഷണം ഉള്‍പ്പെടെ തേഡ് എസിയില്‍ ഏകദേശം 2300 രൂപയായിരിക്കും നിരക്കെന്നാണു സൂചന. 

സെക്കന്‍ഡ് എസിയില്‍ 3000, ഫസ്റ്റ് എസിയില്‍ 3600 രൂപ വീതവും. ഗുവാഹത്തി  ഹൗറ റൂട്ടിലോടാന്‍ പോകുന്ന രാജ്യത്തെ ആദ്യ വന്ദേഭാരത് സ്ലീപ്പറില്‍ 960 രൂപയാണ് തേഡ് എസിയിലെ മിനിമം നിരക്ക്. 400 കിലോമീറ്ററിന് ശേഷമുള്ള ഓരോ കിലോമീറ്ററിന് 2.40 രൂപ വീതം നല്‍കണം. നിരക്ക് കൂടിയാലും കൂടുതല്‍ സൗകര്യപ്രദമായി യാത്രചെയ്യാമെന്നതിനാല്‍ യാത്രക്കാര്‍ ഇരുകയ്യും നീട്ടി സ്വീകരിക്കുമെന്നാണു പ്രതീക്ഷ.