മഹാരാഷ്ട്രയില്‍ മഹാവികാസ് അഘാഡി സഖ്യം ഒഴിഞ്ഞ് സമാജ്വാദി പാര്‍ട്ടി

ബാബരി മസ്ജിദ് തകര്‍ത്തതിനെ വാഴ്ത്തി ശിവസേന ഉദ്ധവ് വിഭാഗം നേതാവ് പോസ്റ്റ് പങ്കുവച്ചതിന് പിന്നാലെ സമാജ്വാദി പാര്‍ട്ടി മഹാവികാസ് അഘാഡി സഖ്യമൊഴിഞ്ഞു.ബാബരി പൊളിച്ചവരെ ഓര്‍ത്ത് അഭിമാനം കൊള്ളുന്നു എന്ന, ഉദ്ധവിന്റെ അനുയായി മിലിന്ദ് നര്‍വേക്കറിന്റെ പോസ്റ്റ് ആണ് വിനയായത്. പോസ്റ്റ് വിവാദമായതിന് പിന്നാലെ സഖ്യമൊഴിയുന്നതായി, മഹാരാഷ്ട്ര സമാജ്വാദി അധ്യക്ഷന്‍ അബു അസിം അസ്മി അറിയിക്കുകയായിരുന്നു.രണ്ട് സീറ്റാണ് മഹാരാഷ്ട്ര നിയമസഭയില്‍ സമാജ്വാദിക്കുള്ളത്. മുംബൈയിലെ മന്‍ഖര്‍ദ്-ശിവജി നഗര്‍ എംഎല്‍എ കൂടിയായ അസ്മിയും ഭിവണ്ടി ഈസ്റ്റ് എംഎല്‍എ റയീസ് ഷെയ്ഖും. തങ്ങള്‍ക്ക് രണ്ടുപേര്‍ക്കുമായി പ്രത്യേകം സീറ്റ് വേണമെന്ന് സ്പീക്കറോട് ആവശ്യപ്പെടുമെന്നാണ് അസ്മി അറിയിച്ചിരിക്കുന്നത്. തെരഞ്ഞെടുപ്പ് സമയത്ത് ഉദ്ധവിന്റെ ഹിന്ദുത്വ അജണ്ട സഹിക്കാനാവുന്നതിനും അപ്പുറമായിരുന്നെന്നും അസ്മി കൂട്ടിച്ചേര്‍ക്കുന്നു.'ഞങ്ങള്‍ അഘാഡി സഖ്യമൊഴിയുകയാണ്. മഹായുതിയുടെയോ മഹാവികാസ് അഘാഡിയുടെയോ ഭാഗമല്ല സമാജ്വാദി. ഞങ്ങള്‍ രണ്ടുപേര്‍ക്കുമായി സഭയില്‍ പ്രത്യേകം സീറ്റ് അനുവദിക്കണമെന്ന് സ്പീക്കറോട് പറയാനാണ് തീരുമാനം. തെരഞ്ഞെടുപ്പ് സമയത്തൊന്നും ഞങ്ങളെ മീറ്റിങ്ങുകള്‍ക്ക് പോലും അഘാഡി നേതാക്കള്‍ വിളിച്ചിട്ടില്ല. സീറ്റ് വിഭജനത്തിന്റെ സമയത്തോ എന്തിന് പ്രചാരണത്തിന്റെ സമയത്തോ പോലും ഒരു സഹകരണവും സഖ്യത്തില്‍ ഇല്ലായിരുന്നു.തെരഞ്ഞെടുപ്പിന്റെ സമയത്ത് ഹിന്ദുത്വ അജണ്ട മുറുകെപ്പിടിക്കണമെന്നാണ് ഉദ്ധവ് പാര്‍ട്ടി നേതാക്കളോട് പറഞ്ഞത്. ഇപ്പോഴിതാ ബാബരി പൊളിച്ചതിനെ വാഴ്ത്തി സോഷ്യല്‍ മീഡിയയില്‍ പോസ്റ്റും പങ്കുവച്ചിരിക്കുന്നു. അതില്‍ ബാബരി പൊളിച്ചവരെ അഭിനന്ദിക്കുകയാണ് അദ്ദേഹം. എങ്ങനെയാണ് ഇതെല്ലാം സഹിക്കാനാവുക? അത്തരം പോസ്റ്റുകളൊക്കെ എല്ലാ സമുദായങ്ങളുടെയും മൂല്യങ്ങള്‍ക്കും അഭിമാനത്തിന് ക്ഷതം ഏല്‍പ്പിക്കുന്നതാണ്. ഇങ്ങനെയൊക്കെ ചെയ്യാന്‍ തുടങ്ങിയാല്‍ അഘാഡിയും ബിജെപിയുമായി എന്താണ് വ്യത്യാസം.
ഞങ്ങളിവിടെ മതസൗഹാര്‍ദമുണ്ടാക്കാനാണ് നോക്കുന്നത്. ആളുകളെ ഭിന്നിപ്പിക്കാനല്ല. അത്തരം നീക്കം നടത്തുന്നവരുടെ കൂടെ നില്‍ക്കേണ്ട ആവശ്യം സമാജ്വാദിക്കില്ല'. അസിമിനെ ഉദ്ധരിച്ച് പിടിഐ റിപ്പോര്‍ട്ട് ചെയ്തു.