ഇന്ത്യന്‍ രാഷ്ട്രീയത്തിലെ സൗമ്യസാന്നിധ്യം

മുംബൈ: ഇന്ത്യന്‍ രാഷ്ട്രീയത്തിലും പാര്‍ലമെന്ററി രംഗത്തും ദീര്‍ഘകാലം സജീവമായിരുന്നു മുതിര്‍ന്ന കോണ്‍ഗ്രസ് നേതാവായിരുന്നു ശിവരാജ് വി. പാട്ടീല്‍ ചക്കൂര്‍ക്കര്‍. ലോക്സഭാ സ്പീക്കര്‍, കേന്ദ്ര ആഭ്യന്തര മന്ത്രി, പഞ്ചാബ് ഗവര്‍ണര്‍ തുടങ്ങിയ നിലകളില്‍ അദ്ദേഹം സേവനമനുഷ്ഠിച്ചിട്ടുണ്ട്.

ലാത്തൂര്‍ ലോക്സഭാ മണ്ഡലത്തില്‍ നിന്ന് ഏഴ് തവണ തുടര്‍ച്ചയായി ലോക്സഭാംഗമായി തിരഞ്ഞെടുക്കപ്പെട്ട അദ്ദേഹം, ഇന്ത്യ കണ്ട ഏറ്റവും പരിചയസമ്പന്നരായ പാര്‍ലമെന്റേറിയന്മാരില്‍ ഒരാളായിരുന്നു.

1991 മുതല്‍ 1996 വരെ പത്താമത് ലോക്സഭയുടെ സ്പീക്കറായി അദ്ദേഹം നിഷ്പക്ഷതയോടെ പ്രവര്‍ത്തിച്ചു.
2004 മുതല്‍ 2008 വരെയുള്ള ഒന്നാം യുപിഎ സര്‍ക്കാരില്‍ കേന്ദ്ര ആഭ്യന്തര മന്ത്രിയായിരുന്നു.
മാത്രമല്ല, ഇന്ദിരാഗാന്ധി, രാജീവ് ഗാന്ധി സര്‍ക്കാരുകളിലും അദ്ദേഹം വിവിധ കേന്ദ്രമന്ത്രി പദങ്ങള്‍ വഹിച്ചിട്ടുണ്ട്. 2010 മുതല്‍ 2015 വരെ പഞ്ചാബ് ഗവര്‍ണറായും ചണ്ഡീഗഢ് അഡ്മിനിസ്‌ട്രേറ്ററായും സേവനമനുഷ്ഠിച്ചു. 

2008 നവംബറിലെ മുംബൈ ഭീകരാക്രമണ സമയത്ത് കേന്ദ്ര ആഭ്യന്തര മന്ത്രിയായിരുന്നു ശിവരാജ് പാട്ടീല്‍. ആക്രമണത്തിന് ശേഷം സുരക്ഷാ വീഴ്ചയുടെ ധാര്‍മ്മിക ഉത്തരവാദിത്തം ഏറ്റെടുത്ത് അദ്ദേഹം സ്ഥാനമൊഴിഞ്ഞിരുന്നു. ഈ സംഭവം അദ്ദേഹത്തിന്റെ കരിയറിലെ ഒരു പ്രധാന വഴിത്തിരിവാവുകയും ചെയ്തു. 

സൗമ്യമായ പെരുമാറ്റം കൊണ്ടും നിയമസഭ, പാര്‍ലമെന്റ് നടപടികളിലെ അഗാധമായ അറിവുകൊണ്ടും അദ്ദേഹം ശ്രദ്ധേയനായിരുന്നു. ലാത്തൂര്‍ മുനിസിപ്പാലിറ്റി പ്രസിഡന്റായാണ് അദ്ദേഹത്തിന്റെ രാഷ്ട്രീയ ജീവിതം ആരംഭിച്ചത്. 

മഹാരാഷ്ട്ര രാഷ്ട്രീയത്തിലെ അതികായനായിരുന്ന ശിവരാജ് പാട്ടീലിന്റെ വിയോഗത്തില്‍ കോണ്‍ഗ്രസ് നേതാക്കളും വിവിധ രാഷ്ട്രീയ കക്ഷികളും അനുശോചനം രേഖപ്പെടുത്തി.