മുംബൈയില്‍ ടേക്ക് ഓഫിനിടെ വിമാനത്തിന് ചക്രം നഷ്ടപ്പെട്ടു; ദുരന്തം ഒഴിവായി

മുംബൈ: ടേക് ഓഫ് ചെയ്തതിനു പിന്നാലെ സ്‌പൈസ് ജെറ്റ് വിമാനത്തിന്റെ ചക്രം നഷ്ടപ്പെട്ടു. വിമാനം ഗുജറാത്തിലെ കണ്ഡ്‌ല വിമാനത്താവളത്തില്‍ നിന്ന് പറന്നുയര്‍ന്നതിന് തൊട്ടുപിന്നാലെയാണ് ഇത് സംഭവിച്ചത്. വിമാനത്തിന്റെ വലത് വശത്തെ ഒരു ചക്രമാണ് റണ്‍വേയില്‍ നിന്ന് കണ്ടെത്തിയത്. വിമാനം മുംബൈയില്‍ സുരക്ഷിതമായി ഇറങ്ങി. 

ഗുജറാത്തിലെ കാണ്ഡ്‌ലയില്‍ നിന്ന് മുംബൈയിലേക്ക് പോവുകയായിരുന്ന ക്യു 400 ടര്‍ബോപ്രോപ് വിമാനത്തിനാണ് ചക്രം നഷ്ടപ്പെട്ടത്. മുന്‍കരുതലെന്ന നിലയില്‍ മുംബൈയിലെ ഛത്രപതി ശിവാജി മഹാരാജ് അന്താരാഷ്ട്ര വിമാനത്താവളത്തില്‍ അടിയന്തരാവസ്ഥ പ്രഖ്യാപിച്ചിരുന്നു. വൈകിട്ട് 3:51ന് വിമാനം സുരക്ഷിതമായി നിലത്തിറങ്ങി. 

എല്ലാ യാത്രക്കാര്‍ക്കും സുരക്ഷിതമായി പുറത്തിറങ്ങാന്‍ കഴിഞ്ഞു. സുരക്ഷാ മുന്‍കരുതലിന്റെ ഭാഗമായി വിമാനത്താവളത്തില്‍ പൂര്‍ണ്ണ അടിയന്തരാവസ്ഥ പ്രഖ്യാപിച്ചിരുന്നതായും, വിമാനം സുരക്ഷിതമായി ഇറങ്ങിയതിന് പിന്നാലെ പ്രവര്‍ത്തനങ്ങള്‍ സാധാരണ നിലയിലായതായും മുംബൈ വിമാനത്താവള വക്താവ് സ്ഥിരീകരിച്ചു. സംഭവത്തില്‍ അന്വേഷണം ആരംഭിച്ചു.