ഓഹരി വിപണി തട്ടിപ്പ് കേസ്: അദാനി സഹോദരന്‍മാര്‍ കുറ്റവിമുക്തര്‍

മുംബൈ: ഓഹരി വിപണിയിൽ ക്രമക്കേട് നടത്തിയെന്ന ആരോപണത്തിൽ പ്രമുഖ വ്യവസായികളായ ഗൗതം അദാനിയെയും രാജേഷ് അദാനിയെയും ബോംബൈ ഹൈക്കോടതി കുറ്റവിമുക്തരാക്കി. ₹388 കോടിയുമായി ബന്ധപ്പെട്ട മാർക്കറ്റ് റെഗുലേഷൻ ലംഘന കേസിൽ സീരിയസ് ഫ്രോഡ് ഇൻവെസ്റ്റിഗേഷൻ ഓഫീസ് (SFIO) ഉന്നയിച്ച ആരോപണങ്ങൾക്ക് തെളിവുകളില്ലെന്ന് കണ്ടെത്തിയാണ് ഹൈക്കോടതിയുടെ നിർണായക വിധി. അദാനി എന്റർപ്രൈസസ് ലിമിറ്റഡിന്റെ ചെയർമാനായ ഗൗതം അദാനിയും മാനേജിംഗ് ഡയറക്ടറായ രാജേഷ് അദാനിയും ഉൾപ്പെട്ട കേസ് 2012 മുതൽ നിയമയുദ്ധത്തിലായിരുന്നു.2012-ൽ SFIO ആണ് അദാനി സഹോദരന്മാർ ഉൾപ്പെടെ 12 പേർക്കെതിരെ കുറ്റപത്രം സമർപ്പിച്ചത്. ഓഹരി വിപണിയിൽ തട്ടിപ്പ് നടത്തി, ക്രിമിനൽ ഗൂഢാലോചനയിലൂടെ നിയമവിരുദ്ധമായ നേട്ടം ഉണ്ടാക്കിയെന്നാണ് ആരോപണം. പ്രശസ്ത സ്റ്റോക്ക് ബ്രോക്കറായ കേതൻ പരേഖിന്റെ സഹായത്തോടെ അദാനി ഗ്രൂപ്പ് ഓഹരി വിലകൾ കൃത്രിമമായി ഉയർത്തുകയും പിന്നീട് വില കുറയുമ്പോൾ ഓഹരികൾ വാങ്ങുകയും ചെയ്തതായി SFIO ആരോപിച്ചിരുന്നു. 1999-2000 കാലഘട്ടത്തിലെ ഇന്ത്യയിലെ ഏറ്റവും വലിയ ഓഹരി വിപണി തട്ടിപ്പുമായി ബന്ധപ്പെട്ട കേതൻ പരേഖിന്റെ പങ്കാളിത്തം കേസിന് കൂടുതൽ ഗൗരവം കൂട്ടി. 2014-ൽ മജിസ്‌ട്രേട്ട് കോടതി അദാനി സഹോദരന്മാരെ കുറ്റവിമുക്തരാക്കിയെങ്കിലും, SFIO ഈ വിധിക്കെതിരെ സെഷൻസ് കോടതിയെ സമീപിച്ചു. 2019-ൽ സെഷൻസ് കോടതി മജിസ്‌ട്രേട്ട് കോടതിയുടെ ഉത്തരവ് റദ്ദാക്കി, അദാനി ഗ്രൂപ്പിന് നിയമവിരുദ്ധമായ ലാഭം ലഭിച്ചതായി സൂചിപ്പിച്ചു. എന്നാൽ, ഈ ഉത്തരവിനെതിരെ ഹൈക്കോടതിയിൽ അപ്പീൽ നൽകിയ അദാനി സഹോദരന്മാർക്ക് 2025 മാർച്ച് 17-ന് നീതി ലഭിക്കുകയായിരുന്നു. ജസ്റ്റിസ് ലദ്ധയുടെ ഏകാംഗ ബെഞ്ചാണ്, തട്ടിപ്പിനോ ഗൂഢാലോചനയ്‌ക്കോ തെളിവില്ലെന്ന് വ്യക്തമാക്കി, ഇവരെ കുറ്റവിമുക്തരാക്കിയത്.