വിട്ടുകൊടുക്കില്ല; ചെന്നൈ സീറ്റില്‍ ജയമുറപ്പെന്ന് വിജയ്

ചെന്നൈ: നടനും ടിവികെ പാര്‍ട്ടി അധ്യക്ഷനുമായ വിജയ്, തന്റെ പനയൂരിലെ വസതിയില്‍ നിന്ന് ഏതാനും കിലോമീറ്റര്‍ മാത്രം അകലെയുള്ള ചെന്നൈയിലെ അതിവേഗം വളരുന്ന ഐടി കേന്ദ്രമായ വേളച്ചേരിയില്‍ നിന്ന് 2026-ലെ നിയമസഭാ തിരഞ്ഞെടുപ്പില്‍ മത്സരിക്കാന്‍ സാധ്യതയുണ്ടെന്ന് തമിഴക വെട്രി കഴകത്തിലെ (ടിവികെ) മുതിര്‍ന്ന നേതാക്കള്‍ അറിയിച്ചു. ഇതൊരു പ്രതീകാത്മകമായ ഗ്രാമീണ അരങ്ങേറ്റത്തേക്കാള്‍, കൃത്യമായി ആസൂത്രണം ചെയ്ത ഒരു നഗര കേന്ദ്രീകൃത ലോഞ്ച് പാഡായാണ് പാര്‍ട്ടി കാണുന്നത്.

കഴിഞ്ഞ മാസങ്ങളില്‍ വിജയ് മത്സരിക്കുമോ എന്നതിനേക്കാള്‍ എവിടെ നിന്ന് മത്സരിക്കും എന്നതായിരുന്നു പാര്‍ട്ടിക്കുള്ളിലെ പ്രധാന ചര്‍ച്ചാവിഷയം. അദ്ദേഹത്തിന്റെ മാതാപിതാക്കള്‍ താമസിക്കുന്ന വിരുഗമ്പാക്കം മണ്ഡലത്തെക്കുറിച്ച് ആദ്യഘട്ടത്തില്‍ ആലോചനകള്‍ നടന്നിരുന്നു. കൂടാതെ 'V' അക്ഷരത്തില്‍ തുടങ്ങുന്ന വിരുധാചലം, വിക്രവാണ്ടി തുടങ്ങിയ മണ്ഡലങ്ങളെക്കുറിച്ചും പഠിച്ചു. വിജയുടേയും അദ്ദേഹത്തിന്റെ പാര്‍ട്ടിയായ തമിഴക വെട്രി കഴകത്തിന്റെയും പേരുകള്‍ക്കൊപ്പം 'V' എന്ന അക്ഷരത്തില്‍ തുടങ്ങുന്ന മണ്ഡലങ്ങള്‍ തിരഞ്ഞെടുക്കുന്നത് ഗുണകരമാകുമെന്ന് ഒരു ജ്യോത്സ്യന്‍ ഉപദേശിച്ചതായി 2025 ജൂണില്‍ 'ഇന്ത്യന്‍ എക്‌സ്പ്രസ്' റിപ്പോര്‍ട്ട് ചെയ്തിരുന്നു.

പാര്‍ട്ടിയിലെ ഉന്നത വൃത്തങ്ങള്‍ സൂചിപ്പിക്കുന്നത് പ്രകാരം, വേളച്ചേരി മണ്ഡലം തിരഞ്ഞെടുത്തതോടെ പാര്‍ട്ടി അതിന്റെ ലക്ഷ്യം ഉറപ്പിച്ചു കഴിഞ്ഞു. മറ്റേതൊരു മണ്ഡലത്തേക്കാളും വേളച്ചേരി നല്‍കുന്ന വലിയൊരു പ്രത്യേകതയുണ്ട്: യുവജനങ്ങള്‍, കന്നി വോട്ടര്‍മാര്‍, സോഫ്റ്റ്വെയര്‍ പ്രൊഫഷണലുകള്‍, മാള്‍ ജീവനക്കാര്‍, ഗിഗ് ഇക്കോണമി (ഡെലിവറി/ക്യാബ്) തൊഴിലാളികള്‍, അപ്പാര്‍ട്ട്‌മെന്റുകളില്‍ താമസിക്കുന്ന കുടിയേറ്റക്കാര്‍, തമിഴ് ഇതര നഗരവാസികള്‍ എന്നിവരുടെ വലിയൊരു സാന്നിധ്യം അവിടെയുണ്ട്. സര്‍വ്വേകള്‍ പ്രകാരം വിജയ്യുടെ ഏറ്റവും വലിയ പിന്തുണക്കാരും ഈ വിഭാഗമാണ്.

'ചെന്നൈയിലെ ഏറ്റവും പ്രായം കുറഞ്ഞ വോട്ടര്‍മാരുള്ള നഗര മണ്ഡലമാണിത്. നിങ്ങള്‍ യുവാക്കളിലും കന്നി വോട്ടര്‍മാരിലുമാണ് വിശ്വാസമര്‍പ്പിക്കുന്നതെങ്കില്‍, അതിന് ഏറ്റവും അനുയോജ്യമായ സ്ഥലം ഇതാണ്,' ഒരു മുതിര്‍ന്ന ടിവികെ നേതാവ് പറഞ്ഞു.

ജാതി രാഷ്ട്രീയത്തിന് മുന്‍തൂക്കമുള്ള ഗ്രാമീണ മേഖലകളില്‍ നിന്ന് വിഭിന്നമായി, വെള്ളപ്പൊക്കം, ഗതാഗതം, അടിസ്ഥാന സൗകര്യങ്ങള്‍, ഭരണം തുടങ്ങിയ വിഷയങ്ങളാണ് വേളച്ചേരിയിലെ രാഷ്ട്രീയത്തെ സ്വാധീനിക്കുന്നത്. സ്ഥിരമായി ഒരു പാര്‍ട്ടിക്ക് തന്നെ വോട്ട് ചെയ്യുന്ന രീതിയും ഈ മണ്ഡലത്തിനില്ല. 2016-ല്‍ വളരെ കുറഞ്ഞ ഭൂരിപക്ഷത്തിലാണ് ഇവിടെ വിജയം തീരുമാനിക്കപ്പെട്ടത്. 2021-ല്‍ ആദ്യമായി മത്സരിച്ച കമല്‍ ഹാസന്റെ മക്കള്‍ നീതി മയ്യം സംസ്ഥാന ശരാശരിയേക്കാള്‍ വളരെ കൂടുതല്‍ വോട്ടുകള്‍ ഇവിടെ നേടി. 13.06% വോട്ടുകളോടെ (23,000-ലധികം വോട്ട്) മൂന്നാം സ്ഥാനത്തെത്താനും അവര്‍ക്ക് സാധിച്ചു.

നഗരപ്രദേശങ്ങളിലെ അഭ്യസ്തവിദ്യരായ വോട്ടര്‍മാര്‍ പുതിയ രാഷ്ട്രീയ കക്ഷികളെ പരീക്ഷിക്കാന്‍ തയ്യാറാണെന്നതിന് തെളിവാണ് ആ പ്രകടനം എന്ന് പാര്‍ട്ടി നേതാക്കള്‍ പറയുന്നു. 'പരിമിതമായ സംഘടനാ സംവിധാനങ്ങള്‍ ഉപയോഗിച്ച് എംഎന്‍എം അത് സാധിച്ചുവെങ്കില്‍, വിജയ് നേരിട്ട് മത്സരിക്കുമ്പോള്‍ എന്ത് സംഭവിക്കുമെന്ന് സങ്കല്‍പ്പിച്ചു നോക്കൂ,' ടിവികെ സൗത്ത് ചെന്നൈ ഡിസ്ട്രിക്റ്റ് കോര്‍ഡിനേറ്റര്‍ പറഞ്ഞു. 'എങ്കിലും, തികച്ചും വിരോധാഭാസമായ ഒരു കാര്യമുണ്ട്; പ്രധാനപ്പെട്ട ഒരു ടിവികെ പരിപാടി പോലും ഇതുവരെ വേളച്ചേരിയില്‍ നടന്നിട്ടില്ല,' അദ്ദേഹം കൂട്ടിച്ചേര്‍ത്തു.

വിജയ്യുടെ സ്ഥാനാര്‍ത്ഥിത്വത്തിന് പുറമെ, പാര്‍ട്ടിയിലെ പ്രമുഖരായ ചുരുക്കം ചിലര്‍ക്കായി മറ്റ് സീറ്റുകള്‍ നിശ്ചയിക്കാനുള്ള നീക്കങ്ങളും ടിവികെ നിശബ്ദമായി ആരംഭിച്ചിട്ടുണ്ട്. പാര്‍ട്ടി വൃത്തങ്ങള്‍ നല്‍കുന്ന സൂചനയനുസരിച്ച്, സെങ്കോട്ടയ്യന്‍ ഗോപിചെട്ടിപാളയത്ത് നിന്നും മത്സരിക്കാന്‍ സാധ്യതയുണ്ട്. ആദ്യം വിക്രവാണ്ടിയോ കള്ളക്കുറിച്ചിയിലോ മത്സരിക്കാന്‍ ആലോചിച്ചിരുന്ന ആദവ് അര്‍ജുന, ആഭ്യന്തര സര്‍വേയില്‍ കള്ളക്കുറിച്ചിക്ക് സാധ്യത കുറവാണെന്ന് കണ്ടതിനെത്തുടര്‍ന്ന് ഇപ്പോള്‍ തിരുവള്ളൂര്‍ മണ്ഡലം ഉറപ്പിച്ചിരിക്കുകയാണ്. 

മുന്‍ ഐടി ഉദ്യോഗസ്ഥനായ അരുണ്‍ രാജ് തിരുച്ചെങ്കോട് നിന്നും മത്സരിച്ചേക്കും. ഉസിലംപട്ടിയില്‍ നിന്ന് നിര്‍മ്മല്‍ കുമാര്‍, ചെന്നൈയിലെ പ്രമുഖ ബിസിനസ് കുടുംബാംഗമായ മേരി വില്‍സണ്‍ കുളച്ചലില്‍ നിന്ന്, കാരാക്കുടിയില്‍ നിന്ന് ഡോ. ടി.കെ.പ്രഭു, പുതുക്കോട്ടയില്‍ നിന്ന് ജില്ലാ സെക്രട്ടറി ഫര്‍വാസ് എന്നിവരെയും പാര്‍ട്ടി പരിഗണിക്കുന്നുണ്ട്. രാഷ്ട്രീയക്കാര്‍ക്ക് പകരം നഗര കേന്ദ്രീകൃതരായ പ്രൊഫഷണലുകള്‍, ബിസിനസ് കുടുംബങ്ങള്‍, പ്രാദേശിക സംഘാടകര്‍ എന്നിവരുടെ ഒരു മിശ്രിതമാണ് ഈ സ്ഥാനാര്‍ത്ഥി പട്ടികയില്‍ പ്രതിഫലിക്കുന്നത്.

തമിഴ്നാട്ടിലെ അടുത്ത തിരഞ്ഞെടുപ്പ് നാല് പ്രധാന ചേരികളിലായാണ് രൂപപ്പെടുന്നത്: ഡിഎംകെ സഖ്യം, എഐഎഡിഎംകെ-ബിജെപി സഖ്യം, ടിവികെ, കൂടാതെ നാം തമിഴര്‍ കക്ഷി. കോണ്‍ഗ്രസ് ഡിഎംകെയ്‌ക്കൊപ്പം തന്നെ തുടരുമെന്ന് ഉറപ്പാണ്. മിക്ക സ്വതന്ത്ര നിരീക്ഷകരുടെയും വിലയിരുത്തല്‍ പ്രകാരം വിജയ്യുന്റെ രാഷ്ട്രീയ പ്രവേശനം എല്ലാ ക്യാമ്പുകളെയും ഒരുപോലെ ഭീഷണിപ്പെടുത്തുന്നുണ്ട്.

വിജയ് പാര്‍ട്ടിയായ ടിവികെ 15 മുതല്‍ 20 ശതമാനം വരെ വോട്ട് വിഹിതം പിടിച്ചെടുക്കുമെന്നാണ് ഡിഎംകെയിലേയും ടിവികെയിലേയും ഉള്‍പ്പെടെയുള്ള രാഷ്ട്രീയ വിശകലന വിദഗ്ധര്‍ കണക്കാക്കുന്നത്. യുവാക്കള്‍, വനിതാ വോട്ടര്‍മാരിലെ ഒരു വിഭാഗം, ക്രിസ്ത്യന്‍ വിശ്വാസികള്‍, കന്നി വോട്ടര്‍മാര്‍ എന്നിവര്‍ക്ക് പുറമെ അന്‍പുമണി രാമദോസിന്റെ പിഎംകെ, തോല്‍ തിരുമാളവന്റെ വിസികെ എന്നിവരെ പരമ്പരാഗതമായി പിന്തുണച്ചിരുന്ന പിന്നാക്ക-ദലിത് വിഭാഗങ്ങളിലെ വലിയൊരു പങ്കും വിജയ്‌ക്കൊപ്പം നില്‍ക്കാന്‍ സാധ്യതയുണ്ട്.

തങ്ങളുടെ വോട്ടുകളുടെ 25 ശതമാനം വരെ ടിവികെയിലേക്ക് പോകുമെന്ന് എന്‍ടികെ നിരീക്ഷകര്‍ ഭയപ്പെടുന്നു. 'വിജയ് ജയിക്കും. അദ്ദേഹം സീറ്റുകള്‍ ജയിക്കണമെന്നില്ല, പക്ഷേ വോട്ട് ഭിന്നിപ്പിക്കുന്നത് തന്നെ തിരഞ്ഞെടുപ്പ് ഫലങ്ങളെ അട്ടിമറിക്കും,' എന്നാണ് ഒരു മുതിര്‍ന്ന ഡിഎംകെ നേതാവ് പ്രതികരിച്ചത്. അടുത്ത കാലം വരെ എഐഎഡിഎംകെയെ നേരിട്ട് വിമര്‍ശിക്കുന്നത് വിജയ് ഒഴിവാക്കിയിരുന്നു. എന്നാല്‍ ഈ ആഴ്ച അദ്ദേഹം അവര്‍ക്കെതിരെയും ആഞ്ഞടിച്ചു. ഇതിന് മറുപടിയുമായി എഐഎഡിഎംകെ ഐടി വിങ്ങും എന്‍ഡിഎ സഖ്യകക്ഷിയായ ടിടിവി ദിനകരനും രംഗത്തെത്തി.

വിജയ്യുടെ അഴിമതി വിരുദ്ധ നിലപാടിനെ ടിടിവി ദിനകരന്‍ പരിഹസിച്ചു. 'അഴിമതി തുടച്ചുനീക്കുമെന്ന് അദ്ദേഹം പറയുന്നു, എന്നാല്‍ സ്വന്തം സിനിമകളുടെ ടിക്കറ്റ് കരിഞ്ചന്തയില്‍ വില്‍ക്കുന്നത് തടയാന്‍ പോലും അദ്ദേഹത്തിന് കഴിയുന്നില്ല. 150 രൂപയുടെ ടിക്കറ്റ് 2000 രൂപയ്ക്കാണ് വില്‍ക്കുന്നത്. വീട്ടിലിരുന്ന് അഴിമതിക്കെതിരെ പോരാടാനാവില്ല. അനാവശ്യ ആക്രമണങ്ങള്‍ തിരിച്ചടിയാകും,' അദ്ദേഹം മുന്നറിയിപ്പ് നല്‍കി.

എങ്കിലും, വിജയ് വരുന്നതിലൂടെ ഭരണവിരുദ്ധ വോട്ടുകള്‍ ഭിന്നിച്ച് ബിജെപിക്കും എഐഎഡിഎംകെയ്ക്കും തിരിച്ചടിയുണ്ടാകുമെന്നാണ് ഡിഎംകെ നേതാക്കളുടെ രഹസ്യമായ കണക്കുകൂട്ടല്‍. മുസ്ലീം വോട്ടുകള്‍ ഡിഎംകെയ്‌ക്കൊപ്പം നില്‍ക്കുമെങ്കിലും ക്രിസ്ത്യന്‍ വോട്ടുകളില്‍ ഒരു വിഭാഗം വിജയിലേക്ക് ചായുമെന്നും അവര്‍ കരുതുന്നു.

വിജയ്യെ സംബന്ധിച്ചിടത്തോളം വേളച്ചേരി എന്നത് കേവലം ഒരു മണ്ഡലമല്ല. തന്റെ പനയൂരിലെ വീടിനോടുള്ള അടുപ്പവും നഗരത്തിന്റെ പശ്ചാത്തലവും ഇതിനെ ഒരു മികച്ച തട്ടകമാക്കുന്നു. ചെന്നൈയില്‍ നേടുന്ന വിജയം സംസ്ഥാനവ്യാപകമായി വലിയ സ്വാധീനം ചെലുത്തും.

'ഇതൊരു വൈകാരികമായ തീരുമാനമല്ല, മറിച്ച് തന്ത്രപരമായ ഒന്നാണ്. നഗര കേന്ദ്രീകൃതവും ശ്രദ്ധിക്കപ്പെടുന്നതും വിജയിക്കാന്‍ സാധ്യതയുള്ളതുമായ മണ്ഡലമാണിത്,' എന്ന് ഒരു ടിവികെ നേതാവ് പറഞ്ഞു. സിനിമയും രാഷ്ട്രീയവും അഭിലാഷങ്ങളും ഇഴചേര്‍ന്നു കിടക്കുന്ന തിരക്കേറിയ ഒരിടത്ത്, ഒരു സുരക്ഷിത പന്തയം എന്ന നിലയില്‍ നടത്തുന്ന പോരാട്ടമാണിതെന്ന് അദ്ദേഹം കൂട്ടിച്ചേര്‍ത്തു.