ഹൈദരാബാദ് ഇനി തെലങ്കാനയുടെ മാത്രം തലസ്ഥാനം

ഹൈദരാബാദ്: തെലങ്കാനയും ആന്ധ്രാപ്രദേശും രണ്ട് സംസ്ഥാനങ്ങളായി മാറിയിട്ട് പത്ത് വർഷം തികഞ്ഞു.  ഹൈദരാബാദ് ഇനി രണ്ട് സംസ്ഥാനങ്ങൾക്കും പൊതു തലസ്ഥാനമാകില്ല.

2014ലെ ആന്ധ്രാപ്രദേശ് പുനഃസംഘടന നിയമത്തിലെ വ്യവസ്ഥകൾ അനുസരിച്ച്, 2014 ജൂൺ 2 മുതൽ 10 വർഷത്തേക്ക് ഹൈദരാബാദ് ഇരു സംസ്ഥാനങ്ങൾക്കും പൊതു തലസ്ഥാനമായി പ്രവർത്തിച്ചു.

1956-ൽ, ആന്ധ്ര, തെലങ്കാന പ്രദേശങ്ങൾ സംയോജിപ്പിച്ച് ആന്ധ്രാപ്രദേശ് നിലവിൽ വന്നതിനുശേഷം, ഹൈദരാബാദ് അവിഭക്ത ആന്ധ്രാപ്രദേശിൻ്റെ തലസ്ഥാനമായി പ്രഖ്യാപിക്കപ്പെട്ടു, 2014 ജൂൺ 2 വരെ ആ സ്ഥാനം നിലനിർത്തി.

2014ലെ ആന്ധ്രാപ്രദേശ് പുനഃസംഘടന നിയമത്തിൻ്റെ 5-ാം വകുപ്പ് പ്രകാരം:  2014 ജൂൺ 2 മുതൽ, ഹൈദരാബാദ് തെലങ്കാന, ആന്ധ്രാപ്രദേശ് സംസ്ഥാനങ്ങളുടെ പൊതു തലസ്ഥാനമായിരിക്കും, പത്ത് വർഷത്തിൽ കവിയരുത്.” പ്രസ്തുത കാലാവധി കഴിഞ്ഞാൽ ഹൈദരാബാദ് തെലങ്കാനയുടെ തലസ്ഥാനമായിരിക്കുമെന്നും ആന്ധ്രാപ്രദേശിന് പുതിയ തലസ്ഥാനം ഉണ്ടായിരിക്കുമെന്നും വ്യക്തമാക്കിയിരുന്നു.

വ്യവസ്ഥ അനുസരിച്ച്, ആന്ധ്രാപ്രദേശ് സർക്കാർ തെലങ്കാനയിൽ നിന്ന് 2015 വരെ പ്രവർത്തിച്ചു. 2015-ൽ അന്നത്തെ ആന്ധ്രാപ്രദേശ് മുഖ്യമന്ത്രി എൻ ചന്ദ്രബാബു നായിഡു അമരാവതിയെ അവശിഷ്ട സംസ്ഥാനത്തിൻ്റെ തലസ്ഥാനമായി പ്രഖ്യാപിച്ചു. തൊട്ടുപിന്നാലെ, സെക്രട്ടേറിയറ്റ് ഉൾപ്പെടെ ആന്ധ്രാപ്രദേശ് സർക്കാരിൻ്റെ ഒട്ടുമിക്ക ഓഫീസുകളും അമരാവതിയിലേക്ക് മാറ്റി.

നിലവിൽ, ആന്ധ്രാപ്രദേശ് സർക്കാർ ഹൈദരാബാദിൽ മൂന്ന് കെട്ടിടങ്ങൾ മാത്രമാണ് ഉപയോഗിക്കുന്നത് - ലേക്ക് വ്യൂ ഗസ്റ്റ്ഹൗസ്, ലക്ഡികാപുലിലെ പോലീസ് കെട്ടിടം, ആദർശനഗറിലെ ഹെർമിറ്റേജ് ബിൽഡിംഗ് എന്നിവ എപി സർക്കാരിൻ്റെ കൈവശമാണ്. അടുത്തിടെ ആന്ധ്രപ്രദേശിന് അനുവദിച്ച കെട്ടിടങ്ങൾ ഏറ്റെടുക്കാൻ മുഖ്യമന്ത്രി എ രേവന്ത് റെഡ്ഡി ഉദ്യോഗസ്ഥർക്ക് നിർദേശം നൽകിയിരുന്നു.

ആ കെട്ടിടങ്ങൾ വാടകയ്‌ക്കോ പാട്ടത്തിനോ നൽകണമെന്ന് ആന്ധ്രാപ്രദേശ് സർക്കാർ തെലങ്കാന സർക്കാരിനോട് ആവശ്യപ്പെട്ടതായി വൃത്തങ്ങൾ അറിയിച്ചു. എന്നാൽ, തിരഞ്ഞെടുപ്പ് ചട്ടം നിലവിലുള്ളതിനാൽ തെലങ്കാന സർക്കാർ ഇക്കാര്യത്തിൽ തീരുമാനമെടുത്തിട്ടില്ലെന്നും വൃത്തങ്ങൾ കൂട്ടിച്ചേർത്തു.

അതേസമയം, ജൂൺ 2 ന് പത്താം സംസ്ഥാന രൂപീകരണ  വർഷം വിപുലമായി ആഘോഷിക്കുമെന്നും മുൻ കോൺഗ്രസ് അധ്യക്ഷ സോണിയ ഗാന്ധി ചടങ്ങിൽ പങ്കെടുക്കുമെന്നും തെലങ്കാന സംസ്ഥാന സർക്കാർ വ്യാഴാഴ്ച അറിയിച്ചു. സംസ്ഥാന സർക്കാർ സ്ഥാപക ദിനാചരണത്തിന് രാഷ്ട്രീയ നേതാക്കളെയും പ്രമുഖ വ്യക്തികളെയും മറ്റുള്ളവരെയും ക്ഷണിച്ചിട്ടുണ്ട്.