ടൈഗർ മേമന്റെ 14 സ്വത്തു വകകൾ കേന്ദ്ര സർക്കാരിലേക്ക് കണ്ടു കെട്ടാൻ കോടതി വിധി

മുംബൈ:1993 മുംബൈ സ്ഫോടനങ്ങൾക്ക് നടന്ന് ഏകദേശം മൂന്ന് പതിറ്റാണ്ടുകൾക്ക് ശേഷം ടൈഗർ മേമന്റെ 14 സ്വത്തുക്കൾ കേന്ദ്രത്തിന് വിട്ടുകൊടുത്തു.1993 ലെ മുംബൈ സ്ഫോടന പരമ്പരയ്ക്ക് ഏകദേശം മൂന്ന് പതിറ്റാണ്ടുകൾക്ക് ശേഷം, ഇബ്രാഹിം അബ്ദുൾ റസാക്ക് മേമന്റെയും കുടുംബത്തിന്റെയും ഉടമസ്ഥതയിലുള്ള 14 സ്വത്തു വകകൾ കേന്ദ്ര സർക്കാരിന് വിട്ടുകൊടുക്കാൻ പ്രത്യേക ടാഡ കോടതിയാണ്‌ കഴിഞ്ഞ ആഴ്ച ഉത്തരവിട്ടത്. 1976 ലെ കള്ളക്കടത്തുകാരുടെയും വിദേശ വിനിമയ കൃത്രിമത്വത്തിന്റെയും (സ്വത്ത് കണ്ടുകെട്ടൽ) നിയമപ്രകാരം, കുടുംബത്തിന്റെ ഉടമസ്ഥതയിലുള്ള സ്വത്തുക്കൾ വിട്ടുകൊടുക്കണമെന്ന് ആവശ്യപ്പെട്ട് അതോറിറ്റി സമർപ്പിച്ച ഹർജി കഴിഞ്ഞ ആഴ്ച പ്രത്യേക ടാഡ കോടതി അനുവദിച്ചു.സ്വത്തുക്കൾ ഇപ്പോഴും കോടതി റിസീവറുടെ പക്കലിലാണ്. ബാന്ദ്ര വെസ്റ്റിലെ ഒരു കെട്ടിടത്തിലെ ഒരു ഫ്ലാറ്റ്, മാഹിമിലെ ഓഫീസ് പരിസരം, മാഹിമിലെ ഒരു തുറന്ന പ്ലോട്ട്, സാന്താക്രൂസിലെ ഒരു ഒഴിഞ്ഞ പ്ലോട്ടും ഒരു ഫ്ലാറ്റും, കുർളയിലെ ഒരു കെട്ടിടത്തിലെ രണ്ട് ഫ്ലാറ്റുകൾ, മുഹമ്മദ് അലി റോഡിലെ ഒരു ഓഫീസ്, ഡോംഗ്രിയിലെ ഒരു കടയും ഒരു പ്ലോട്ടും, മനീഷ് മാർക്കറ്റിലെ മൂന്ന് കടകൾ, മുംബൈയിലെ ഷെയ്ഖ് മേമൻ സ്ട്രീറ്റിലെ ഒരു കെട്ടിടം എന്നിവ ഉൾപ്പെടുന്നതാണ് 14 സ്വത്തുക്കൾ. മേമൻ കുടുംബത്തിന്റെ ഉടമസ്ഥതയിലുള്ളതും കോടതി കണ്ടുകെട്ടിയതുമായ മൂന്ന് ഫ്ലാറ്റുകളിൽ ഇളവ് തേടി അൽ ഹുസൈനി കോ-ഓപ്പറേറ്റീവ് ഹൗസിംഗ് സൊസൈറ്റി കോടതിയിൽ നൽകിയ ഹർജിയാണ്‌ തള്ളിയത്.